আজি জনপ্ৰিয় মুখ্যমন্ত্ৰী ড° হিমন্ত বিশ্ব শৰ্মাৰ ওপজা দিন

Kakali Deka February 01, 2025

ডিজিটেল ডেস্ক: ছাত্ৰ ৰাজনীতিৰ পৰা অসমৰ মুখ্যমন্ত্ৰী পদলৈ। যাত্ৰা পথত আছিল অজস্ৰ প্ৰত্যাহ্বান। সেইগৰাকীয়ে হৈছে অসমৰ জনপ্ৰিয় মুখ্যমন্ত্ৰী হিমন্ত বিশ্ব শৰ্মা। জীৱনৰ ৫৫টা বসন্ত গৰকি ৫৬ বছৰত ভৰি দিলে মুখ্যমন্ত্ৰী ড৹ হিমন্ত বিশ্ব শৰ্মাই। আজি মুখ্যমন্ত্ৰী ড° হিমন্ত বিশ্ব শৰ্মাৰ ওপজা দিন। মুখ্যমন্ত্ৰীৰ জন্মবাৰ্ষিকী উপলক্ষে শুকুৰবাৰৰ নিশাৰে পৰা ৰাজধানী দিছপুৰৰ মুখ্যমন্ত্ৰীৰ বাসভৱনত দেখা গ’ল গুণমুগ্ধ আৰু অনুৰাগীসকলৰ দীঘলীয়া শাৰী । পৰিয়ালৰ সদস্যৰ লগতে অনুৰাগীসকলৰ উপস্থিতিত জন্মবাৰ্ষিকীৰ কেক কাটে মুখ্যমন্ত্ৰীগৰাকীয়ে। 

শুকুৰবাৰে নিশা সামাজিক মাধ্যমযোগে মুখ্যমন্ত্ৰী ড° হিমন্ত বিশ্ব শৰ্মাই নিজৰ ওপজা দিনত ৰাজ্যবাসীৰ পৰা আশীৰ্বাদ কামনা কৰে। আনহাতে মুখ্যমন্ত্ৰী হিমন্ত বিশ্ব শৰ্মাক জন্মদিনৰ শুভেচ্ছা দিবলৈ বহিঃৰাজ্যৰ পৰাও আহিল অনুৰাগী। হাৰিয়ানাৰ অনুৰাগীয়ে মুখ্যমন্ত্ৰীক দিলে বিশেষ উপহাৰ। ৰাজনীতিৰ ক্ষেত্ৰখনক এক শক্তিশালী ৰূপত সজাই তোলা মুখ্যমন্ত্ৰী ড° হিমন্ত বিশ্ব শৰ্মাই কংগ্ৰেছৰ পৰা বিজেপিলৈ গৈ বিজেপি দলক শক্তিশালী কৰি তোলে। ৰাজনীতিত থাকিলেও কিন্তু মুখ্যমন্ত্ৰীগৰাকীৰ মনটো সুকোমল। সকলোৰে মামা স্বৰূপ মুখ্যমন্ত্ৰী হিমন্ত বিশ্ব শৰ্মাই সকলোৰে হৃদয়ত এক সাঁচ বহুৱাই ৰাখিছে।

উল্লেখযোগ্য যে ড° হিমন্ত বিশ্ব শৰ্মাই ১৯৬৯ চনৰ ১ ফেব্ৰুৱাৰীত জন্মগ্ৰহণ কৰিছিল।১৯৮৫ চনত কামৰূপ একাডেমিৰ পৰা মেট্ৰিক পাছ কৰাৰ পাছত তেওঁ উচ্চ শিক্ষাৰ বাবে কটন কলেজত নামভৰ্তি কৰে। আৰু ১৯৯১-৯২ত কটন কলেজ ছাত্ৰ সন্থাৰ সাধাৰণ সম্পাদক আছিল তেওঁ। তেওঁ কটন কলেজৰ পৰা ৰাজনীতি বিজ্ঞানত ১৯৯০ চনত স্নাতক আৰু ১৯৯২ চনত স্নাতকোত্তৰ পৰীক্ষা পাছ কৰাৰ লগতে গুৱাহাটীৰ চৰকাৰী আইন মহাবিদ্যালয়ৰ পৰা আইনৰ স্নাতক আৰু গুৱাহাটী বিশ্ববিদ্যালয়ৰ পৰা ডক্টৰেট ডিগ্ৰী লাভ কৰে। 

২০০২ৰ পৰা ২০১৪ চনলৈ অসম চৰকাৰৰ কৃষি, পৰিকল্পনা আৰু উন্নয়ন, বিত্ত, স্বাস্থ্য, শিক্ষা বিভাগৰ মন্ত্ৰী হিচাপে সেৱা প্ৰদান কৰে মুখ্যমন্ত্ৰীগৰাকীয়ে। তেওঁ অসম বিধানসভাৰ জালুকবাৰী সমষ্টিৰ পৰা পাঁচবাৰকৈ ২০০১, ২০০৬ আৰু ২০১১ চনত ভাৰতীয় জাতীয় কংগ্ৰেছৰ আৰু ২০১৬ আৰু ২০২১ চনত ভাৰতীয় জনতা পাৰ্টিৰ বিধায়ক হিচাপে নিৰ্বাচিত হৈছিল। ভাৰতীয় জাতীয় কংগ্ৰেছৰ পূৰ্বৰ সদস্য মুখ্যমন্ত্ৰীগৰাকীয়ে ২০১৫ চনৰ আগষ্ট মাহত ভাৰতীয় জনতা পাৰ্টিত যোগদান কৰে। পৰৱৰ্তী সময়ত তেওঁ ২৪ মে' ২০১৬ত কেবিনেট মন্ত্ৰী হিচাপে শপত গ্ৰহণ কৰে। তেওঁৰ ৰাজনৈতিক দক্ষতাৰ স্বীকৃতি হিচাপে বিজেপি নেতৃত্বই তেওঁক নৱ-গঠিত উত্তৰ-পূব গণতান্ত্ৰিক মৰ্চাৰ আহ্বায়ক ৰূপে নিযুক্তি দিছিল।

আনহাতে ২০২১ চনৰ ১০ মে'ত সোণোৱালৰ পাছত ৰাজ্যপাল জগদীশ মুখীয়ে অসমৰ ১৫সংখ্যক মুখ্যমন্ত্ৰী হিচাপে হিমন্ত বিশ্ব শৰ্মাক শপত গ্ৰহণ কৰোৱায়। এনেদৰে নিজৰ মনোবল আৰু সকলোৰে আশীৰ্বাদত হিমন্ত বিশ্ব শৰ্মাই আজিও মুখ্যমন্ত্ৰীৰ আসনত বহি অসমখনক এক ব্যতিক্ৰমী ৰূপত সজাই তোলাৰ বাবে প্ৰচেষ্টা অব্যাহত ৰাখিছে।জনপ্ৰিয় মুখ্যমন্ত্ৰীগৰাকীৰ ওপজা দিনটোত মুখ্যমন্ত্ৰীগৰাকীলৈ জনালোঁ অলেখ শুভকামনা।

Share This