মাটিৰ লালসাত হাউলীৰ দুই পিতা-পুত্ৰক হত্যা! গ্ৰেপ্তাৰ ৩

Rashmi March 03, 2025

ডিজিটেল ডেস্কঃ ভূমি বিবাদৰ পৰিণতিতে বুধবাৰে বৰপেটাৰ হাউলীত সংঘটিত হ'ল দুই পিতা-পুত্ৰৰ নৃশংস হত্যাকাণ্ড।

হত্যাকাণ্ডৰ ঘটনাটোক দুৰ্ঘটনাৰ ৰূপ দিবলৈ বিচাৰিছিল হত্যাকাৰীয়ে। ইতিমধ্যে হত্যাকাণ্ডৰে জড়িত তিনি অভিযুক্তক গ্ৰেপ্তাৰ কৰাৰ লগতে হত্যাকাণ্ডত ব্যৱহৃত গাড়ীখন জব্দ কৰিছে আৰক্ষীয়ে।

আৰক্ষীয়ে গ্ৰেপ্তাৰ কৰা দুই অভিযুক্ত হৈছে নুৰুল লস্কৰ আৰু নাজিব আলী। ধৃত নুৰুল আৰু নাজিব হৈছে হত্যাৰ বলি হোৱা আব্দুল ৰেজ্জাকৰ নিজ খুৰাকৰ পুত্ৰ।

আনহাতে হত্যাত ব্যৱহৃত ব'লেৰো বাহনখনৰ চালক মনোৱাৰ আলীকো ইতিমধ্যে আৰক্ষীয়ে গ্ৰেপ্তাৰ কৰিছে।

আৰক্ষীৰ জেৰাত দুই অভিযুক্তই বাকসাৰ মৈৰাঝাৰ গাঁৱৰ গাড়ীচালক মনোৱাৰ আলীক ২০ হাজাৰ টকাৰ বিনিময়ত চুপাৰী দিয়াৰ কথা স্বীকাৰ কৰিছে।

উল্লেখ্য যে বুধবাৰে নিশা বৰপেটাৰ হাউলীৰ জয়পুৰত সংঘটিত এক মটৰ চাইকেল দুৰ্ঘটনাত নিহত হৈছিল আব্দুল ৰেজ্জাক আৰু আব্দুল মান্নান নামৰ দুই পিতা-পুত্ৰ।

আৰক্ষীৰ আগত তিনি অভিযুক্তই স্বীকাৰ কৰা মতে, বুধবাৰে নিশা হাউলী চহৰত থকা ফাৰ্ণিচাৰ দোকান বন্ধ কৰি AS 15 U 9517 নম্বৰৰ মটৰচাইকেলেৰে পুত্ৰ আব্দুল মান্নানৰ সৈতে পিতৃ আব্দুল ৰেজ্জাক ঘৰলৈ গৈ থকা অৱস্থাত জয়পুৰত AS 01 EH 6196 নম্বৰৰ ব'লেৰো বাহনখনে পিছ পিনৰ পৰা প্ৰচণ্ড জোৰে খুন্দা মাৰি দুয়োকে পেলাই দিছিল।

ইয়াৰ পাছ এছতে নিহত আব্দুল ৰেজ্জাকৰ খুড়াকৰ দুই পুত্ৰ নুৰুল লস্কৰ আৰু নাজিব আলীয়ে গাড়ীৰ পৰা নামি গৈ দুই পিতা-পুত্ৰক হাতুৰীৰে মূৰত আঘাত কৰে ।

হাতুৰীৰ আঘাতত পুত্ৰ আব্দুল মান্নান থিতাতে নিহত হোৱাৰ বিপৰীতে পিতৃ আব্দুল ৰেজ্জাকৰ বৰপেটা মেডিকেল কলেজত চিকিৎসাধীন অৱস্থাত বৃহস্পতিবাৰে নিশা মৃত্যু হয়।

আৰক্ষীয়ে তিনি দিন ধৰি চলোৱা অনুসন্ধানত বৰপেটাৰ ভেল্লাৰ পৰা ভাড়া কৰি অনা ব'লেৰো বাহন এখনেৰে দুৰ্ঘটনা সংঘটিত কৰি দুই পিতা- পুত্ৰক হত্যা কৰা বুলি পোহৰলৈ আহে৷

এটুকুৰা ভূমিক লৈ চলি থকা বিবাদৰ বাবেই নিজ খুড়াকৰ পুত্ৰই এনেদৰে দুই পিতা-পুত্ৰক নৃশংসভাৱে হত্যা কৰাৰ ঘটনাক লৈ হাউলীত
চাঞ্চল্যৰ সৃষ্টি হৈছে।

কোনো ক্লু নথকাৰ পিছতো মাথোঁ তিনি দিনৰ ভিতৰতে হত্যাকাৰীক বিচাৰি উলিওৱাৰ বাবে হাউলী আৰক্ষীৰ শলাগ লৈছে ৰাইজে।

ইপিনে এনে নৃশংস হত্যাৰে জড়িত তিনি অভিযুক্তক ফাষ্ট ট্ৰেক আদালতত ফাঁচি দিবলৈ দাবী জনাইছে আমছুৱে।

উৎস: প্ৰাগ নিউজ ডিজিটেল