আজিৰ পৰা উচ্চতৰ মাধ্যমিক চূড়ান্ত পৰীক্ষা

dainik janambhumi February 13, 2025

ডিজিটেল ডেস্ক: নৱগঠিত অসম ৰাজ্যিক বিদ্যালয় শিক্ষা পৰিষদৰ অধীনত এইবাৰ প্ৰথমবাৰৰ বাবে আজিৰে পৰা অনুষ্ঠিত হ'ব উচ্চতৰ মাধ্যমিক চূড়ান্ত পৰীক্ষা। ৰাজ্যৰ ৮৫৬টা কেন্দ্রত অনুষ্ঠিত হ'বলগীয়া উচ্চতৰ মাধ্যমিক চূড়ান্ত পৰীক্ষা সুকলমে অনুষ্ঠিত কৰিবৰ কাৰণে ইতিমধ্যেই শিক্ষা বিভাগৰ লগতে জিলা প্রশাসন আৰু আৰক্ষী প্রশাসনেও প্রস্তুতি সম্পূৰ্ণ কৰি তুলিছে। 

জানিব পৰা মতে, বিগত বৰ্ষৰ তুলনাত এইবাৰ ৰাজ্যব্যাপী পৰীক্ষাৰ্থীৰ সংখ্যা বৃদ্ধি পাইছে। এইবাৰ মুঠ ৩ লাখ ৬ হাজাৰ ৯২৫গৰাকী পৰীক্ষাৰ্থী উচ্চতৰ মাধ্যমিক চূড়ান্ত পৰীক্ষাত অৱতীৰ্ণ হ'ব আৰু ইয়াৰে ২ লাখ ৩০ হাজাৰ ৯১গৰাকী কলা শাখাত, ৫৭ হাজাৰ ৭২৪গৰাকী বিজ্ঞান শাখাত, ১৭৮৬৯গৰাকী বাণিজ্য শাখাত আৰু ১২৪১গৰাকী বৃত্তিমুখী শাখাত অৱতীৰ্ণ হ'ব। পৰীক্ষাৰ প্ৰস্তুতি সম্পর্কত জানিবলৈ দি শিক্ষা পৰিষদৰ সচিব নৰনাৰায়ণ নাথে কয় যে এইবাৰ এই পৰীক্ষা বিভিন্ন পৰ্যায়ৰ ৰাষ্ট্ৰীয় এন্ট্রেন্স পৰীক্ষাত বহাৰ দৰে অভিজ্ঞতা শিক্ষার্থীসকলে লাভ কৰিব।

 তেওঁ লগতে এই বুলিও কয় যে প্রত্যেকখন জিলাৰ আগশাৰীৰ কলেজৰ অধ্যক্ষক লৈ গঠিত এটা দলে পৰীক্ষা ব্যৱস্থাটো নিয়াৰিকৈ অনুষ্ঠিত কৰাৰ প্ৰক্ৰিয়াত সহায় কৰিছে। এইবাৰ ৰেকৰ্ড সংখ্যক পৰীক্ষাৰ্থীৰে পৰীক্ষা অনুষ্ঠিত হ'ব বুলি উল্লেখ কৰি সচিবজনে কয় যে মুঠ পৰীক্ষাৰ্থীৰ ভিতৰত ১ লাখ ৪৬ হাজাৰ ৫০২জন ছাত্ৰ আৰু ১ লাখ ৬২ হাজাৰ ৫২৩গৰাকী ছাত্রী। ইফালে, শিক্ষা মন্ত্রী ডাঃ ৰণোজ পেগুৱে হায়াৰ ছেকেণ্ডাৰীৰ লগতে মেট্ৰিক পৰীক্ষাও সুকলমে অনুষ্ঠিত কৰাৰ ক্ষেত্ৰত সকলো পক্ষৰে সহযোগিতা কামনা কৰে।

Share This