পাঁচ-ছয় বছৰত অসমলৈ ঘূৰাই আনিব কম দৰমহাত বাহিৰত কাম কৰা যুৱক-যুৱতীক

Dainik janambhumi March 01, 2025

ডিজিটেল ডেস্কঃ অসমত উদ্যোগীকৰণৰ এটা বাতাৱৰণ গঢ়ি তুলিব লাগিব। বহিঃৰাজ্যত সাত-আঠ হাজাৰ টকাত কাম কৰি থকা আমাৰ ল'ৰা-ছোৱালীখিনিক অসমলৈ পাঁচ-ছয় বছৰৰ ভিতৰত ঘূৰাই আনিব লাগিব। যিসকলে ৪০/৫০ হাজাৰ টকা বেতনৰ বাবে বহিঃৰাজ্যলৈ গৈছে তেওঁলোক যাওক। কিন্তু বাকীসকলৰ বহিঃগমন বন্ধ কৰিব লাগিব। এই বিষয়ত মোৰ লগত অসমৰ সকলো লোক একমত। আজি গুৱাহাটীত অনুষ্ঠিত এখন সংবাদমেলত এই মন্তব্য প্রকাশ কৰিছে মুখ্যমন্ত্রী ড° হিমন্ত বিশ্ব শৰ্মাই।

কভিডৰ সময়ত অসমৰ বাহিৰত কাম কৰি থকা সাত লাখ লোক অসমলৈ ঘূৰি আহিছিল বুলি জনাই তেওঁ লগতে কয় যে তেওঁলোকৰ যিসকলে কম বেতনত কাম কৰি আছে তেওঁলোকক অসমলৈ ঘূৰাই অনাটো আমাৰ নৈতিক দায়িত্ব। আনহাতে, আমি দেখি থকা অসমখন সঁচা অসম নহয় বুলি জনাই তেওঁ কয় যে আজি অসমখনত সম্পূৰ্ণ শান্তি বিৰাজ কৰিছে। ইয়াত কোনো গণ্ডগোল নাই। বেংগালুৰু, মুম্বাইৰ দৰে চহৰলৈ গৈ অসম কেতিয়া তেনেকুৱা চহৰ হ'ব বুলি প্রশ্ন সোধাসকলে বা প্রবাসী অসমীয়ায়ো অসমৰ দুৰৱস্থাক লৈ চিঠি লিখিব নালগে। আগন্তুক দহ বছৰত আমি তেনে এখন অসমেই গঢ়াৰ চেষ্টা চলাম। এয়াই নতুন অসমৰ আৰম্ভণি।

ইফালে, সেই সময়ত কোন ক্ষমতাত থাকিব সেয়া ডাঙৰ কথা নহয় বুলি জনাই ড° শর্মাই স্পষ্টভাৱে কয়, 'মই আছোঁ নাই, কোন ৰাজনৈতিক দল থাকিব বা নাথাকিব, কোনো মুখ্যমন্ত্রী থাকিব, নাথাকিব সেয়া সকলো সংকীর্ণ চিন্তা। এয়াই সময় অসম গঢ়াৰ। যিসকলে অসমক সঁচাই ভাল পায়, যাৰ কোনো কৃত্রিমতা নাই তেওঁলোক ওলাই আহক। ইফালে, লাচিত সেনাই জৈন মুনিৰ সন্দৰ্ভত কি ক'লে তাক হাইলাইট নকৰি অসমৰ কোনজন যুৱকে ছেটেলাইট নির্মাণ কৰি আছে সেয়া প্ৰচাৰ কৰিব লাগে বুলি উল্লেখ কৰি তেওঁ কয়- এনেবোৰ কথা প্ৰচাৰ হ'লেহে নতুন অসম হ'ব।। মুখ্যমন্ত্ৰীগৰাকীয়ে আছাম ষ্টেট ৰুৰেল লাইভলি হুড মিছনৰ সৈতে ৰাজ্যৰ ৪০ লাখ মহিলা জড়িত হৈ থকাৰ কথা জনাই লগতে কয় যে এই ৪০ লাখ মহিলাক কেঁচা সামগ্রী দি দিলে তেওঁলোকে কাম কৰি দেখুৱাই দিব পাৰে। কোনোবাই তেওঁলোকক যদি ধূপ বনোৱাৰ কেঁচা সামগ্রী দি দিয়ে তেনেহ'লে দেশৰ গোটেই ধূপ উদ্যোগটোৱেই অসমৰ হৈ যাব। আজিৰ তাৰিখত প্ৰকৃততে 'আমূল'ৰ দৰে অসমতো এক বিপ্লৱৰ প্রয়োজন হৈছে।' অসমৰ পৰিৱেশ কিদৰে সলনি হৈছে তাৰ ব্যাখ্যা আগবঢ়াই ড° শর্মাই লগতে কয়- ২০০৬ চনত ইনফ'চিচৰ নাৰায়ণমূৰ্তিক মাতি আনিছিলোঁ। তেওঁ কৈছিল অসমত নেটৱৰ্ক ছিষ্টেম, ফাইভ ষ্টাৰ হোটেল আদি নথকালৈকে আমি একো কৰিব নোৱাৰোঁ।

এতিয়া কিন্তু তেওঁলোক নিজেই আগবাঢ়ি আহিছে। দহ বছৰত অসমৰ আন্তঃগাঁথনিৰ উন্নয়নত ব্যাপক উন্নতি হোৱাৰ বাবেই আজি উদ্যোগপতিসকলেও বিনিয়োগ কৰিবলৈ আগবাঢ়ি আহিছে। টাটাৰ ছেমি কণ্ডাক্টৰ হৈছে গে'ম চেঞ্জাৰ। ইয়াৰ আগলৈকে কোনেও একো কথা ভাবিব পৰা নাছিল। কোনেও অসমলৈ আহিবলৈ সাহস কৰা নাছিল। পূর্বতে বন্ধ, প্রতিবাদ, সন্ত্রাসবাদ আদিৰ লগতে ভৌগোলিক অৱস্থানৰ বাবে কোনো অসমলৈ অহা নাছিল। কিন্তু অসমৰ পৰিস্থিতি এতিয়া সলনি হৈছে। অসমৰ যুৱকসকল হৈছে আমাৰ ব্ৰেণ্ড এম্বেছেডৰ।

বিশেষকৈ অসমৰ বাহিৰত থকা অসমৰ যুৱকসকল হৈছে অসমৰ ব্ৰেণ্ড এম্বেছেডৰ। অসমৰ সকলো উদ্যোগী হৈছে ৪০ বছৰৰ তলৰ। তেওঁলোকৰ বাবেই অসমৰ ইমেজ এতিয়া সলনি হৈছে। যোৱা তিনি-পাঁচ বছৰত অসমত কোনো প্রতিবাদ হোৱা নাই। এই সময়ত এক হাজাৰ লোক সমৱেত হোৱা অসমত কোনো প্রতিবাদ হোৱা নাই। এয়াই হৈছে নতুন অসমৰ নতুন দিনৰ শুভাৰম্ভণি।

Share This