'ভাৰত এতিয়া বিশ্বৰ পঞ্চম বৃহত্তম নাৱিক ৰাষ্ট্ৰ হিচাপে জিলিকি উঠিছে'

dainik janambhumi July 25, 2025

ডিজিটেল ডেস্কঃ কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্র্যালয়ে নতুন দিল্লীত আয়োজন কৰা সামুদ্রিক বিত্তীয় সম্মিলন ২০২৫ সফলতাৰে সম্পন্ন হয়। সন্মিলনত জ্যেষ্ঠ নীতি নির্ধাৰক, ঔদ্যোগিক নেতা, বিশ্বৰ বিভিন্ন প্রান্তৰ বিনিয়োগকাৰী আৰু সামুদ্রিক বিশেষজ্ঞসকলে ভাৰতৰ সামুদ্রিক ভৱিষ্যতৰ পৰিৱৰ্তনশীল বিত্তীয় কৌশলৰ সন্দৰ্ভত আলোচনা কৰিবলৈ একত্রিত হয়।

এই সম্মিলন ভাৰতৰ সামুদ্রিক অমৃতকাল দৃষ্টিভংগী ২০৪৭ৰ সৈতে সংগতি ৰাখি আয়োজন কৰা হৈছে, যাৰ লক্ষ্য হৈছে জাহাজ নির্মাণ, বন্দৰৰ আন্তঃগাঁথনি আৰু বিত্তীয় স্থিতিস্থাপকতা শক্তিশালী কৰি ভাৰতক বিশ্বৰ শীর্ষ সামুদ্রিক শক্তিৰ মাজত অন্তর্ভুক্ত কৰা। অনুষ্ঠানত উপস্থিত থাকি মুখ্য ভাষণ দিয়ে কেন্দ্রীয় বন্দৰ, জাহাজ পৰিবহণ আৰু জলপথ মন্ত্ৰী সর্বানন্দ সোণোৱালে। কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰ্যালয়ৰ ৰাজ্যিক মন্ত্রী শান্তনু ঠাকুৰ আৰু মন্ত্ৰ্যালয়ৰ উচ্চপদস্থ বিষয়াসকলে কেন্দ্রীয় মন্ত্রী সর্বানন্দ সোণোৱালক সংগ দিয়ে।

কেন্দ্রীয় মন্ত্রী সর্বানন্দ সোণোৱালে আজি ভাষণত কয়, 'প্রধানমন্ত্রী নৰেন্দ্ৰ মোদীৰ বলিষ্ঠ নেতৃত্বত ভাৰত এখন সামুদ্রিক ৰাষ্ট্ৰ হিচাপে জিলিকি উঠিবলৈ ধৰিছে। শক্তিশালী সামুদ্রিক নীতি আৰু ক্রমবর্ধমান বিনিয়োগৰ দ্বাৰা ভাৰতে অভূতপূৰ্ব ৰূপান্তৰৰ মাজেৰে আগুৱাই গৈছে। প্ৰধানমন্ত্ৰী নৰেন্দ্ৰ মোদীৰ গতিশীল নেতৃত্বত আমি ২০৪৭ৰ ভিতৰত বিকশিত ভাৰতৰ দৃষ্টিভংগী অনুসৰণ কৰি আছোঁ, য'ত সামুদ্রিক খণ্ডই এক গুৰুত্বপূৰ্ণ ভূমিকা পালন কৰিব। আমাৰ বন্দৰসমূহে কাৰ্যকৰী দক্ষতা উল্লেখযোগ্যভাবে উন্নত কৰিছে, গড় টার্ন এৰাউণ্ড সময় ৪ দিনৰ পৰা এদিনৰো কমলৈ হ্রাস পাইছে, যিয়ে বহু উন্নত ৰাষ্ট্ৰকো পিছ পেলাইছে। দেশৰ প্ৰধান বন্দৰসমূহত কণ্টেইনাৰৰ ক্ষমতা ৭০% তকৈ অধিক বৃদ্ধি পাইছে আৰু উপকূলীয় তথা অভ্যন্তৰীণ জলপথৰ জৰিয়তে সামগ্ৰীৰ সঞ্চালনৰ পৰিমাণ বহুগুণ বৃদ্ধি পাইছে। তদুপৰি দেশৰ জাহাজ পৰিবহণ ১০০% বৈদেশিক প্রত্যক্ষ বিনিয়োগৰ অনুমতি, সৰলীকৃত শুল্ক প্রক্রিয়া আৰু গিফ্ট চিটি আই এফ এছ চিৰ কৌশলগত সুবিধাৰ সৈতে ভাৰতে এতিয়া সামুদ্রিক ক্ষেত্ৰত বিশ্বৰ অন্যতম আকর্ষণীয় বিনিয়োগৰ পৰিৱেশ প্রদান কৰিছে। আমাৰ লক্ষ্য স্পষ্ট- ভাৰতক কেৱল বাণিজ্যতে নহয়; বিত্ত, জাহাজ নির্মাণ আৰু সেউজ সামুদ্রিক আন্তঃগাঁথনিতো বিশ্বৰ সামুদ্রিক প্রাণকেন্দ্র হিচাপে গঢ়ি তোলা। ভাৰত এতিয়া পঞ্চম বৃহত্তম নাৱিক ৰাষ্ট্ৰ হিচাপে জিলিকি উঠিছে। কার্গ' হেণ্ডলিং ক্ষমতা দুগুণতকৈও অধিক বৃদ্ধি, সাগৰীয় ক্রুজ পর্যটন ৫০০% বৃদ্ধি, অভ্যন্তৰীণ জল পৰিবহণ কার্গ' ৭০০% তকৈ অধিক বৃদ্ধি পাইছে।' দেশৰ সামুদ্রিক খণ্ডৰ সৈতে জড়িত এটা গুৰুত্বপূৰ্ণ ঘোষণা হ'ল প্ৰস্তাৱিত সামুদ্রিক উন্নয়ন নিধি, যি এটা নির্দিষ্ট মিশ্রিত বিত্তীয় প্রক্রিয়া, যাৰ লক্ষ্য হৈছে মূলধনৰ খৰচ হ্রাস কৰা আৰু জাহাজ নির্মাণ, উপকূলীয় আন্তঃগাঁথনি আৰু অভ্যন্তৰীণ জলপথত দীর্ঘম্যাদী বিনিয়োগ আকৰ্ষিত কৰা। এই নিধি ১০০ৰো অধিক অংশীদাৰৰ বিস্তৃত পৰামৰ্শৰ ভিত্তিত গঢ়ি তোলা হৈছে, য'ত বিশ্বৰ বিভিন্ন প্ৰান্তৰ বিনিয়োগকাৰী, জাহাজৰ মালিক, বীমা কোম্পানী আৰু বিত্তীয় প্রতিষ্ঠানসমূহ অন্তর্ভুক্ত। বৃহৎ জাহাজক আন্তঃগাঁথনি সম্পত্তি হিচাপে স্বীকৃতি দিয়া, জাহাজ নির্মাণৰ বিত্তীয় সহায় আঁচনি (SBFAS) সম্প্ৰসাৰণ কৰি খৰচৰ অসুবিধা দূৰ কৰা, গিফ্ট চিটি আই এফ এছ চিৰ জৰিয়তে জাহাজৰ লিজিং সক্ষম কৰাৰ দৰে নীতিগত পদক্ষেপসমূহে ভাৰতৰ সামুদ্রিক আৰু জাহাজ নির্মাণ খণ্ডক কিদৰে শক্তিশালী কৰিব, সেই সন্দৰ্ভত সন্মিলনত আলোচনা কৰা হয়। উল্লেখযোগ্য যে শেহতীয়াকৈ সংসদত বিলছ অব্ লেডিং বিল ২০২৫ গৃহীত হৈছে, যাৰ লক্ষ্য হৈছে জাহাজৰ নথি-পত্ৰৰ বাবে আইনী পৰিকাঠামো সৰলীকৰণ কৰা।

নতুন জাহাজ নির্মাণ ক্লাষ্টাৰ সৃষ্টিৰ জৰিয়তে গ্রীণফিল্ড ক্ষমতা সম্প্ৰসাৰণ আৰু বিদ্যমান জাহাজ নির্মাণ ক্ষমতা সম্প্ৰসাৰণৰ ক্ষেত্ৰত ব্রাউন ফিল্ড ক্ষমতা সম্প্ৰসাৰণৰ বাবে কেন্দ্ৰ আৰু ৰাজ্য চৰকাৰৰ মাজত সমন্বিত পদ্ধতিৰে মূলধনৰ সমৰ্থনৰ পৰিকল্পনা কৰা হৈছে। এই সন্মিলনত উদ্ভাৱনীমূলক বিত্তীয় ব্যৱস্থা, বন্দৰৰ কাৰ্যকৰী ডিজিটেল পৰিপক্কতা, জাহাজৰ লিজিং আৰু মালিকীস্বত্বৰ নিয়ন্ত্ৰণ পৰিকাঠামো, বীমা আৰু বহনক্ষম জাহাজ নির্মাণ আৰু পুনৰ চক্ৰণৰ সন্দৰ্ভত গুৰুত্বপূৰ্ণ আলোচনা অনুষ্ঠিত হয়। ইয়াৰ এটা প্রধান আকর্ষণ আছিল ফিনান্সিয়েল ডিজিটেল মেছুৰিটি মেট্রিক্স (FDMM)ৰ উন্মোচন, ই এটা বিস্তৃত পৰিকাঠামো, যিয়ে প্রধান বন্দৰসমূহত ডিজিটেল বিত্তীয় ক্ষমতা মূল্যায়ন অধিক উন্নত কৰিব, বিনিয়োগৰ বাবে সাজু কৰি তুলিব আৰু উচ্চ-কার্যক্ষম আন্তঃগাঁথনি সক্ষম কৰাত সহায় কৰিব। উল্লেখযোগ্য যে নৰৱে, ইটালি, গ্রীচ, ছিংগাপুৰ, নেদাৰলেণ্ড, জাপান, জার্মানি, ডেনমার্ক, অস্ট্রেলিয়া আৰু চাইপ্ৰাছৰ দূতাবাসৰ প্ৰতিনিধি, ৰাজ্যিক সামুদ্রিক ব'ৰ্ডৰ পৰা গুজৰাট, মহাৰাষ্ট্ৰ আৰু অন্ধ্রপ্রদেশৰ মুখ্য বিষয়াসকল, কোচিন শ্বিপয়ার্ড লিমিটেড আদি শীর্ষ জাহাজ নিৰ্মাণ প্ৰতিষ্ঠানৰ বিষয়া এই সময়ছোৱাত উপস্থিত আছিল।

Share This