ছেলফি জ’নত পৰিণত জামুগুৰিহাটৰ পিংক লেণ্ড

Rashmi March 01, 2025

ডিজিটেল ডেস্কঃ জামুগুৰিহাটৰ পথাৰত ফুলা এবিধ গুলপীয়া-বেঙুনীয়া ৰঙৰ বনৰীয়া ফুলৰ দৃষ্টিনন্দন শোভাই এতিয়া মুগ্ধ কৰিছে সকলোকে। অঞ্চলটোৰ বৰাচুকৰ সমীপত তথা চাৰিলেণ্ডযুক্ত ৰাষ্ট্ৰীয় ঘাইপথৰ কাষতে কেইবা বিঘা পথৰুৱা ভূমিত ফুলা এইফুলৰ সৌন্দৰ্য্যত এতিয়া বিভোৰ সকলো।

এখন গুলপীয়া-বেঙুনীয়া ৰঙৰ কাৰ্পেটৰ দৰে বিয়পি থকা এই বনৰীয়া ফুলৰ সৌন্দৰ্য উপভোগ কৰিবলৈ এতিয়া জামুগুৰিহাটৰ বৰাচুকৰ  পথাৰখনলৈ দৈনিক সমাগম ঘটিছে বহু লোকৰ। অকল জামুগুৰিহাটৰে নহয় অসমৰ বিভিন্ন স্থানলৈ ৰাষ্ট্ৰীয় ঘাইপথৰে অহা-যোৱা কৰা ব্যক্তিসকলেও এতিয়া নিজৰ নিজৰ গাড়ী ৰখাই পথাৰখনত ফুলি থকা বনৰীয়া ফুলবিধৰ সৌন্দৰ্য উপভোগ কৰাৰ লগতে একপি ফটো উঠি ফে'চবুক ইনষ্টাগ্ৰামত দিয়াৰ প্ৰতিযোগিতাত নামি পৰাও দেখিবলৈ পোৱা গৈছে।

ইতিমধ্যেই এই পথাৰখন এতিয়া 'পিংক লেণ্ড' হিচাপে পৰিচিত হৈ পৰিছে। বনৰীয়া ফুলবিধৰ সৌন্দৰ্যই সকলোকে মুগ্ধ কৰিছে যদিও এই ফুলৰ সৌন্দৰ্য উপভোগ কৰিবলৈ আহি একাংশ যুৱকে এতিয়া ফুলবিধৰ ওপৰত বাইক-মটৰচাইকেল ঘূৰাই ফুলবিধৰ অনিষ্ট সাধন কৰা ঘটনাই কিন্তু সৌন্দৰ্যপিপাসু প্ৰতিজন লোককে ব্যথিত কৰি তুলিছে।

উৎস: প্ৰাগ নিউজ ডিজিটেল

Share This