জামুগুৰিহাটত দিন দুপৰতে চুৰিকাণ্ড , লুটি নিলে লক্ষাধিক টকাৰ সোণৰ আ-অলংকাৰসহ নগদ ধন

Kakali Deka May 06, 2025

ডিজিটেল ডেস্কঃ জামুগুৰিহাটত ক্ৰমাৎ বৃদ্ধি পাইছে চুৰিকাণ্ডৰ ঘটনা৷ 
এটাৰ পিছত  আনটো চুৰিকাণ্ডৰ ঘটনাই  এতিয়া যেন দিনতে নিদ্ৰা হৰিছে অঞ্চলটোৰ লোকসকলৰ৷ 

আজিও জামুগুৰিহাটৰ মধুপুৰ গাঁৱত দিনদুপৰতে সংঘটিত হয় এক চুৰিকাণ্ড৷ গাঁওখনৰ দূৰ্গেশ্বৰ বৰা নামৰ লোকজনৰ বাসগৃহত  কোনো লোক নথকাৰ সুযোগ গ্ৰহণ কৰি চোৰৰ দলে লুটি নিলে  লক্ষাধিক টকাৰ সোণৰ আ-অলংকাৰৰ লগতে নগদ ধন৷ 

দূৰ্বত্তৰ দলে ঘৰৰ কাষৰ খিৰিকীয়েদি ভিতৰত প্ৰৱেশ কৰি আলমাৰীৰ লকাৰ ভাঙি লুটি নিয়ে চাৰি লক্ষাধিক টকাৰ সোণৰ আ-অলংকাৰৰ লগতে নগদ প্ৰায় ৯ হাজাৰ টকা৷ 

উল্লেখযোগ্য যে, ঘৰখনৰ গৃহিণী মাত্ৰ ১০ মিনিটৰ বাবে কাষৰীয়া নামঘৰলৈ বুলি ওলাই যাওঁতেই দূৰ্বৃত্তৰ দলে সংঘটিত কৰে এই চুৰিকাণ্ডটো ৷ 

মন কৰিবলগীয়া যে জামুগুৰিৰ  আৰক্ষীক বুঢ়া আঙুলি দেখুৱাই  অঞ্চলটোৰ ভিন্ন প্ৰান্তত নিতৌ সংঘটিত হ’বলৈ ধৰা এনে চুৰিকাণ্ডই এতিয়া চিন্তিত কৰি তুলি সৰ্বসাধাৰণ ৰাইজক৷ 

চুৰিকাণ্ডৰ ঘটনাসমুহক লৈ আৰক্ষীক কঠোৰ হোৱাৰো আহবান জনাইছে অঞ্চলটোৰ ৰাইজে ৷

Share This