৫ দিনে 'জনতা ভৱন'ত অচলাবস্থা

dainik janambhumi February 14, 2025

ডিজিটেল ডেস্ক : ৰাজ্যৰ প্ৰশাসন যন্ত্ৰৰ হৃৎপিণ্ডস্বৰূপ জনতা ভৱনৰ কাম-কাজ বিগত ৫ দিন ধৰি অচল হৈ আছে। ছার্ভাৰ বিকল হৈ পৰাৰ বাবে ৰাজ্যৰ ই গভর্নেন্স অচল হৈ পৰিছে। বিগত পাঁচ দিন ধৰি জনতা ভৱনৰ পৰা পৰিচালিত হোৱা ৰাজ্য চৰকাৰৰ ই-অফিচৰ কাম-কাজ স্তব্ধ হৈ পৰিছে। কেৱল জনতা ভৱনেই নহয়, কেইবাখনো জিলা আয়ুক্তৰ কার্যালয়তো একেই অচলাৱস্থাৰ সৃষ্টি হৈছে। ৰাজ্য চৰকাৰৰ এনে পৰিস্থিতিত অসম সচিবালয় হেকাৰৰ কবলত পৰাৰ আশংকা কৰা হৈছে। 

ফলত ৰাজ্য চৰকাৰৰ গোপনীয় আৰু গুৰুত্বপূৰ্ণ নথিসমূহৰ সুৰক্ষাক লৈও আশংকাৰ সৃষ্টি হৈছে। প্রণিধানযোগ্য যে বিগত পাঁচ দিন ধৰি অসম সচিবালয়ৰ ই-অফিচৰ প্রায় সকলো কাম-কাজ বন্ধ হৈ আছে। কেৱল সচিবালয়ৰে নহয়, ৰাজ্য চৰকাৰৰ বিভিন্ন বিভাগৰ ই-অফিচৰ কাম-কাজো স্থবিৰ হৈ পৰিছে। এই সন্দর্ভত ই-অফিচৰ দায়িত্বত থকা 'ৰেইলটেল' (Railtel) নামৰ সংস্থাটোৱে ৰেইলটেইলৰ ডাটা চেণ্টাৰত কিছু কাৰিকৰী বিসংগতিৰ সন্মুখীন হোৱা বুলি প্রকাশ কৰিছে। অসম সচিবালয়ক পেপাৰবিহীন কার্যালয়লৈ ৰূপান্তৰ কৰাৰ পাছত এনেদৰে ই-অফিচৰ কাম-কাজ স্থবিৰ হৈ পৰাত ৰাজ্যৰ প্ৰশাসন ব্যৱস্থাটোলৈ চৰম অনিশ্চয়তা নামি আহিছে। উল্লেখযোগ্য যে কিছুদিন পূর্বে দেশৰ অন্যতম বৃহৎ তৈল উদ্যোগ প্রতিষ্ঠান অইল ইণ্ডিয়া লিমিটেডৰ অসমস্থিত মুখ্য কাৰ্যালয়ো হেকাৰৰ কবলত পৰিছিল। কেইবাদিন ধৰি উদ্যোগটো একপ্ৰকাৰ অচল হৈ পৰিছিল। এই ভয়ংকৰ চক্ৰান্তৰ আঁৰত এটা আন্তঃৰাষ্ট্ৰীয় চক্র জড়িত থকাৰ সন্দেহ কৰা হৈছে। 

বিগত ৭ ফেব্ৰুৱাৰীৰ পৰা অসম চৰকাৰৰ ই-অফিচৰ ছাৰ্ভাৰ ডাউন হৈ আছে। শনি আৰু দেওবাৰ দুটাত কার্যালয় বন্ধ আছিল যদিও পাঁচ দিন ধৰি অসম চৰকাৰৰ সকলো বিভাগৰ ছাৰ্ভাৰ খোল খোৱা নাই। ফলত এইকেইদিন চৰকাৰী অনলাইন ফাইল পৰিচালনা ব্যৱস্থাটোৱেই অচল হৈ আছে। প্রণিধানযোগ্য যে অসম চৰকাৰে বিশ্বৰ বিশিষ্ট উদ্যোগপতি আৰু বাণিজ্যিক নেতৃত্বক আমন্ত্রণ জনাই এডভান্টেজ আছামৰ দ্বিতীয় সংস্কৰণৰ দিনে-ৰাতিয়ে আয়োজনৰ কাম কৰি আছে। তেনে সময়তে অসম চৰকাৰৰ ছাৰ্ভাৰ ডাউন হৈ সকলো কাম স্তব্ধ হৈ পৰা কাৰ্য অতি স্পৰ্শকাতৰ বিবেচিত হৈছে। প্রাপ্ত তথ্য অনুসৰি অসম চৰকাৰৰ ই-অফিচ ব্যৱস্থা বন্ধ হৈ পৰাৰ ফলত এতিয়া পূৰ্বৰ দৰে অসম চৰকাৰৰ কাম-কাজ তথা ফাইল 'ফিজিকেলী' চলাবলগীয়া হৈছে। 'ফিজিকেলী' ফাইলবোৰৰ কাম চলাই আছে বুলি সদৰী কৰে ৰাজ্যৰ সাংস্কৃতিক পৰিক্ৰমা আৰু উদ্যোগ তথা বাণিজ্য মন্ত্রী বিমল বড়াই। ইফালে এই গুৰুত্বপূৰ্ণ আৰু স্পৰ্শকাতৰ সমস্যাৰ উৎস বিচাৰি মুখ্যমন্ত্রী ড° হিমন্ত বিশ্ব শর্মাই ইতিমধ্যে তদন্তৰ নিৰ্দেশ দিয়া বুলি জানিব পৰা গৈছে। লগতে শীঘ্ৰে চৰকাৰৰ ই-অফিচ ব্যৱস্থা পুনৰ আৰম্ভ কৰিবলৈ নিৰ্দেশ দিছে।

Share This