'ঝুমইৰ বিনন্দিনী'ৰ প্ৰতিগৰাকী শিল্পীয়ে ২৫ হাজাৰ টকাকৈ পাব

Dainik janambhumi February 23, 2025

ডিজিটেল ডেস্ক: 'ঝুমইৰ বিনন্দিনী' অনুষ্ঠানত অংশগ্রহণ কৰিবলগীয়া শিল্পীসকলক ২৫ হাজাৰ টকাকৈ আৰু নৃত্য শিল্পীসকলক তেওঁলোকৰ অনুষ্ঠান পৰিৱেশনত সহায় কৰা বিশেষজ্ঞ দলৰ প্ৰতিজন সদস্যক ৩০ হাজাৰ টকাকৈ প্ৰদান কৰা হ'ব। এই কথা ঘোষণা কৰিছে মুখ্যমন্ত্রী ড° হিমন্ত বিশ্ব শৰ্মাই। শনিবাৰে সৰুসজাই ক্রীড়া প্রকল্পত উপস্থিত হৈ মুখ্যমন্ত্রী ড° শৰ্মাই প্রধানমন্ত্রী নৰেন্দ্ৰ মোদীৰ উপস্থিতিত অনুষ্ঠিত হ'বলগীয়া ঝুমইৰ বিনন্দিনী অনুষ্ঠানৰ প্ৰস্তুতিৰ বুজ লোৱাৰ লগতে শিল্পীসকলে পৰিৱেশন কৰা ঝুমইৰ নৃত্যৰ আখৰাও প্রত্যক্ষ কৰে। 

পৰম্পৰাগত সাজ-পোছাক পৰিধান কৰি প্ৰায় ৮,৮০০ পুৰুষ-মহিলাই ঢোল, মাদল, ধমছা আৰু বাঁহী বজাই পৰিৱেশন কৰা সংগীত-নৃত্যৰে সৰুসজাই ক্রীড়া প্রকল্পত অনুষ্ঠিত হোৱা আখৰাই সমগ্ৰ পৰিৱেশ মুখৰিত কৰি তোলে। অনুষ্ঠান প্ৰত্যক্ষ কৰি মুখ্যমন্ত্রী ড° শৰ্মাই অহা ২৪ ফেব্ৰুৱাৰীত অনুষ্ঠিত হ'বলগীয়া চূড়ান্ত প্রদর্শন সম্পর্কে কেইবাটাও গুৰুত্বপূৰ্ণ পৰামৰ্শ প্ৰদান কৰাৰ লগতে মাষ্টাৰ ট্ৰেইনাৰ্ছকে ধৰি অনুষ্ঠান পৰিৱেশন কৰা পুৰুষ-মহিলা নির্বিশেষে সকলো শিল্পীলৈ ২৫ হাজাৰ টকাকৈ আগবঢ়োৱাৰ কথা ঘোষণা কৰে। নৃত্য শিল্পীসকলক তেওঁলোকৰ অনুষ্ঠান পৰিৱেশনত সহায় কৰা বিশেষজ্ঞ দলৰ প্ৰতিজন সদস্যক ৩০ হাজাৰ টকাকৈ প্ৰদান কৰা হ'ব। তদুপৰি সাংস্কৃতিক সংঘ স্থাপনৰ বাবে প্ৰতিখন চাহ বাগিচালৈ ২৫ হাজাৰ টকাকৈ আগবঢ়োৱা হ'ব বুলিও তেওঁ সদৰী কৰে। মুখ্যমন্ত্ৰীয়ে লগতে কয় যে এই ধনৰাশিয়ে সংঘসমূহক চাহ বাগিচা এলেকাৰ চহকী সংস্কৃতিক প্ৰচাৰ আৰু প্ৰসাৰৰ দিশত সহায় কৰিব।

 আনহাতে, ঝুমইৰ বিনন্দিনী অনুষ্ঠানটোক সাফল্যমণ্ডিত কৰি তোলাৰ বাবে অহোপুৰুষাৰ্থ কৰা প্ৰতিগৰাকী শিল্পী, কলা-কুশলীক ধন্যবাদ জ্ঞাপন কৰি মুখ্যমন্ত্ৰীয়ে লগতে কয় যে অহা ২৩ ফেব্ৰুৱাৰীত পৰিৱেশন হ'বলগীয়া চূড়ান্ত আখৰা উপভোগ কৰাৰ বাবে আগ্রহী লোকসকলে সৰুসজাই ক্রীড়া প্রকল্পলৈ আহি সন্ধিয়া ৬ বজাৰ পৰা অনুষ্ঠান উপভোগ কৰিব পাৰিব। উল্লেখযোগ্য যে ২৪ ফেব্ৰুৱাৰীত অনুষ্ঠিত হ'বলগীয়া চূড়ান্ত প্ৰদৰ্শন ৰাজ্যৰ চাহ বাগিচাসমূহত বাস কৰা সকলো লোকে যাতে প্রত্যক্ষ কৰিব পাৰে তাৰ বাবে আয়ুক্তসকলক বিশেষ নির্দেশ দিয়া হৈছে।

Share This