লক্ষ লক্ষ ভকত-বৈষ্ণৱক আদৰিবলৈ এৰালতলী পথাৰত সাজু বিশাল সেৱা বাহিনী

dainik janambhumi January 30, 2025

ডিজিটেল ডেস্ক : অসমীয়া জাতীয় জীৱনত একশৰণ হৰিনাম ধৰ্ম প্ৰৱৰ্তনে জাতিটোক ধর্মীয় দর্শন, সংস্কৃতিৰ বিষয়বস্তুৰে সমৃদ্ধ কৰি প্ৰাণ দিয়া মহাপুৰুষ শ্রীমন্ত শংকৰদেৱৰ নামেৰে প্ৰতিষ্ঠা হোৱা উত্তৰ-পূৰ্বাঞ্চলৰ ভিতৰতে সৰ্ববৃহৎ ধর্মীয়, সামাজিক তথা সাংস্কৃতিক অনুষ্ঠান শ্ৰীমন্ত শংকৰদেৱ সংঘৰ ৯৪সংখ্যক বাৰ্ষিক অধিৱেশনখন অহা ৬, ৭, ৮ আৰু ৯ ফেব্ৰুৱাৰীত যোৰহাটৰ ম'হবন্ধা এৰালতলী পথাৰত বৈষ্ণৱ পণ্ডিত সোণাৰাম চুতীয়া সমন্বয় ক্ষেত্ৰত মহা আয়োজন কৰিছে। 

এৰালতলী পথাৰত প্ৰায় ১২০০ বিঘা ভূমি আৱৰি নিৰ্মাণ কৰা অধিৱেশনস্থলীত ৰাজ্যৰ উপৰি দেশৰ ভিন্ন প্ৰান্তৰ পৰা আহিব লগীয়া কেইবা লক্ষাধিক ভকত- বৈষ্ণৱক আদৰণি জনাবলৈ ইতিমধ্যে অধিৱেশনৰ আদৰণী সমিতিয়ে সকলো প্ৰকাৰৰ প্ৰস্তুতি চলাইছে। জাতি, ধর্ম, বর্ণ নির্বিশেষে আহিবলগীয়া লাখ লাখ সংগী-ভকতক আদৰণি জনাবলৈ প্রস্তুতি চলাইছে। মূল সমিতিৰ অধীনত থকা আদৰণী সমিতিৰ লগতে ৩৬ খন উপ-সমিতিয়ে অধিৱেশনখন সফল কৰাৰ বাবে দিনে-নিশাই কাম কৰিছে। ইতিমধ্যে বৃহৎ প্রেক্ষাগৃহ, নাটঘৰ, নামঘৰ, প্ৰতিনিধিৰ মণ্ডপ, ৰন্ধনশালা, ভোজনালয়, গুদামঘৰ, প্ৰদৰ্শনী, সেৱা বাহিনীৰ মণ্ডপ আদি পৃথকে পৃথকে নিৰ্মাণ কৰিছে। 

একেলগে ১০ হাজাৰ লোকে খাব পৰাকৈ ভোজনালয় নিৰ্মাণ কৰিছে। জানিব পৰা মতে, ভোজনালয়ত এবাৰত ৫ হাজাৰ ভকতে সিদ্ধ গ্ৰহণ কৰিব আৰু একে সময়তে অন্য ৫ হাজাৰ ভকতক সিদ্ধ গ্ৰহণৰ বাবে ব্যৱস্থা কৰিব। ইয়াৰ বাবে বৃহৎ ৰান্ধনীশালত ২০০টা চৌকা প্ৰস্তুত কৰিছে। সিদ্ধ বিতৰণ আৰু প্ৰকৰণৰ বাবে প্রতিদিনে বহু লোকক নিয়োগ কৰিব, যাতে চাৰিওটা দিনে দেশ-বিদেশ তথা ৰাজ্যৰ অন্য ঠাইৰ পৰা অহা ভকত-বৈষ্ণৱসকল কোনোধৰণে অসুবিধাৰ সন্মুখীন নহয়। ৰাজ্যৰ ভিন্ন প্ৰান্তৰ পৰা আহিব লগীয়া প্রতিনিধিসকলৰ বাবে বাঁহ, পাল আৰু নৰাৰে অতি আটোমটোকাৰিকৈ আঢ়ৈশ ফুট দীঘল, ২০ ফুট বহলকৈ শতাধিক প্রতিনিধিৰ শিবিৰ নিৰ্মাণ কৰিছে। যোৰহাট জিলাৰ সংঘৰ অন্তৰ্গত শাখাসমূহে নিজে শ্রমদান কৰি প্রতিনিধি শিবিৰসমূহ তৈয়াৰ কৰিছে। ইফালে ৰাষ্ট্ৰীয় ঘাইপথৰ পৰা সোমায়ে অধিৱেশনস্থলীৰ মধ্যম ভাগতে সুবিশাল প্রেক্ষাগৃহটো নির্মাণ কৰিছে। প্রায় ৮ হাজাৰ লোক বহিব পৰা সভাগৃহ তিনিশ ফুটৰো অধিক বহল আৰু ৬০০ ফুট দীঘল। 

সেইদৰে শণ খেৰে চোৱা অতি নিপুণতাৰে নিৰ্মাণ কৰা নামঘৰত প্ৰতিদিনে নাম-প্রসংগ হৈ আছে। নামঘৰত গুৰু আসন স্থাপন কৰি ধর্মীয় কাৰ্যসমূহ কৰি আহিছে। নামঘৰৰ সমীপতে নিৰ্মাণ কৰিছে নাটঘৰ। আনহাতে, গ্রন্থমেলা আৰু প্রদর্শনীৰ বাবেও পৃথকে পৃথকে বৃহৎ মণ্ডপ তৈয়াৰ কৰিছে। আদৰণী সমিতিয়ে অহা ৪ ফেব্ৰুৱাৰীৰ দিনা সকলো প্রস্তুতি সমাপন কৰিবলৈ নিৰ্ধাৰণ কৰিছে। অধিৱেশন উপলক্ষে অতি চকুত লগাকৈ নিৰ্মাণ কৰিছে পতাকা উত্তোলনৰ বেদী। পতাকা বেদী নির্মাণ সমিতিৰ সভাপতি বসন্ত বৰুৱাই জনায় যে পতাকাৰ বেদীটো এটা কাছসদৃশ ৰূপত দেখুওৱা হৈছে। চাৰিওফালে পুখুৰীৰ পানীত পদুমফুল, ৰাজহংস, বৰটোকোলা, বগলী আদি চৰাই বিচৰণ কৰি থকা দেখুওৱা হৈছে। ইয়াৰ পাৰত হৰিণা চৰি থাকিব। কাছটোৰ ওপৰতে ১৮ ফুট ওখকৈ পতাকাৰ বেদীটো নিৰ্মাণ কৰা হৈছে। ৫০ ফুট ব্যাসার্ধৰ বেদীটোত চাৰিটা খলপ থাকিব। এই খলপসমূহৰ চৌদিশে ফুলেৰে সুশোভিত কৰা হ'ব। 

বেদীটোত সংঘৰ মূল পতাকা থকাৰ উপৰি চৌদিশে ৫৫খন জিলাৰ পতাকা উত্তোলন হ'ব। সুদৃশ্যভাৱে নিৰ্মাণ কৰা পতাকাৰ বেদীটো ২০গৰাকী কাৰিকৰৰ জৰিয়তে ঢেকীয়াখোৱাৰ পৱিত্ৰ শইকীয়াৰ তত্ত্বাৱধানত নিৰ্মাণ কৰিছে। লক্ষণীয় যে শংকৰদেৱ সংঘৰ মূল চালিকা শক্তি হৈছে সংঘৰ সেৱা বাহিনী। অধিৱেশনখনত ১০ হাজাৰ সেৱক-সেৱিকাই অধিৱেশনখন সাফল্যমণ্ডিত কৰাত প্রস্তুতি চলাব। ইতিমধ্যে সেৱা বাহিনীৰ সেৱক-সেৱিকাসকল অধিৱেশনৰ কেইদিন থাকিবলৈ ৬০০ ফুট দীঘল আৰু তিনিশ ফুট বহল শিবিৰ নিৰ্মাণ কৰিছে। সেৱা বাহিনীৰ পৰিচালনা সমিতিৰ সভাপতি ৰঞ্জিত বৰা আৰু সম্পাদক নিৰঞ্জন বৰুৱাই জনোৱা মতে, সংঘৰ ১০ হাজাৰ সেৱক-সেৱিকাই অধিৱেশনৰ কেইদিন ৰাইজৰ সেৱাৰ্থে কাম কৰিব।

অধিৱেশনলৈ আহিবলগীয়া লক্ষ লক্ষ ভক্তক আদৰণি জনোৱাৰ পৰা ভোজনালয়ৰ অভ্যর্থনা, প্রতিনিধি শিবিৰৰ অভ্যর্থনা, চিকিৎসা সম্পর্কীয় তথা যান-বাহন নিয়ন্ত্রণতো সেৱা বাহিনীৰ সেৱক-সেৱিকাসকলে সেৱা আগবঢ়াব। ইফালে সেৱা বাহিনীৰ বাবে এশটা শৌচাগাৰৰ ব্যৱস্থা কৰিছে। সেৱা বাহিনীৰ শিবিৰতে সেৱক-সেৱিকাসকলৰ থকা-খোৱাৰ ব্যৱস্থা থাকিব। ৰাজ্যৰ ভিন্ন প্ৰান্তৰ পাঁচ হাজাৰ আৰু যোৰহাটৰ ১৬খন আঞ্চলিকৰ ৫হাজাৰ সেৱক-সেৱিকাই অধিৱেশনত সেৱা আগবঢ়াই সংগী তথা ভকত- বৈষ্ণৱসকলক সহায় কৰিব। সেৱা বাহিনীৰ শিবিৰৰ সন্মুখত গাঁৱৰ আর্হি নিৰ্মাণ কৰি সৌন্দৰ্য বৃদ্ধি কৰিছে। লক্ষণীয় যে কাৰ্বি আংলঙৰ হাওৰাঘাটৰ নৰ্থ ডেকৰেটৰে মণ্ডপসমূহ নিৰ্মাণ কৰিছে। বৰ্তমানলৈকে অধিৱেশনৰ বাবে ৭০ হাজাৰৰো অধিক বাঁহ আনিছে বুলি জানিব পৰা গৈছে। ইফালে অধিৱেশনস্থলী যোৰহাটৰ লগতে কাষৰীয়া জিলাসমূহৰ পৰা অহা ভকত-বৈষ্ণৱসকলৰ হৰিনামৰ ধ্বনিৰে মুখৰিত হৈছে। নিজে শ্রমদান কৰি অধিৱেশনখন সাফল্যমণ্ডিত কৰিবলৈ সংগীসকলে যৎপৰোনাস্তি প্রচেষ্টা চলাইছে।

Share This