৫০খন দেশৰ ৰাষ্ট্ৰদূতে ছাফাৰী কৰিব কাজিৰঙাত

Dainik janambhumi February 22, 2025

ডিজিটেল ডেস্ক: গুৱাহাটীত অনুষ্ঠিত হ'ব লগা এডভাণ্টেজ আছাম ২.০ লৈ অংশগ্ৰহণ কৰিবলৈ অহা প্রায় ৫০খন দেশৰ ৰাষ্ট্ৰদূত- উচ্চাযুক্তৰ লগতে বিদেশৰ অতিথিক কাজিৰঙালৈ আদৰণি জনাবলৈ সাজু হৈছে কাজিৰঙা ৰাষ্ট্ৰীয় উদ্যান কর্তৃপক্ষ আৰু গোলাঘাট জিলা প্রশাসন। এডভাণ্টেজ আছাম অনুষ্ঠানত অংশগ্রহণ কৰিবলৈ অহা বিদেশৰ ৰাষ্ট্রদূত, উচ্চাযুক্ত, অতিথি, উদ্যোগপতি আদিয়ে ২৪ ফেব্রুৱাৰীত বিশ্বৰ সর্বাধিক এটা খর্গ থকা গঁড়ৰ বাসস্থান তথা বিশ্ব ঐতিহ্য ক্ষেত্র কাজিৰঙা ৰাষ্ট্ৰীয় উদ্যান ভ্ৰমণ কৰাৰ কথা। এডভাণ্টেজ আছামলৈ অহা অতিথিসকলক আদৰণি জনোৱা, নিৰাপত্তা আদি সকলো কথা পর্যবেক্ষণ কৰিবলৈ ইতিমধ্যে ৰাজ্যখনৰ অতিৰিক্ত মুখ্য সচিবৰ নেতৃত্বত এক গোট গঠন কৰা হৈছে। 

জানিব পৰা মতে, এডভাণ্টেজ আছাম অনুষ্ঠানত অংশগ্রহণ কৰিবলৈ অহা অতিথি প্রধানকৈ প্রায় ৫০ খন দেশৰ ৰাষ্ট্ৰদূত, উচ্চাযুক্ত আদি অতিথি ২৩ ফেব্ৰুৱাৰীত যোৰহাট বিমান বন্দৰত অৱতৰণ কৰিব। অতিথিসকল যোৰহাটৰ পৰা পোনে পোনে উক্ত দিনা গাড়ীৰে কাজিৰঙালৈ আহিব। ২৩ ফেব্ৰুৱাৰীত অতিথিসকল কাজিৰঙাৰ বিভিন্ন পর্যটন নিৱাসত ৰাত্রি যাপন কৰি পিছদিনা অর্থাৎ ২৪ ফেব্ৰুৱাৰীত কাজিৰঙা ৰাষ্ট্ৰীয় উদ্যানত জীপ আৰু এলিফেন্ট ছাফাৰী কৰিব। বিভাগীয় এক সূত্রে জানিব পৰা মতে কাজিৰঙালৈ অহা অতিথিসকলক ৰাত্রি যাপনৰ বাবে ইতিমধ্যে কাজিৰঙাৰ কেইবাখনো বিশেষকৈ ব্যক্তিগত পর্যটন নিৱাস আগতীয়াকৈ সংৰক্ষণ কৰি ৰখা হৈছে। ইফালে অতিথিসকলক কাজিৰঙা ৰাষ্ট্ৰীয় উদ্যান দর্শন কৰোৱাবৰ বাবে উদ্যান কর্তৃপক্ষই বিশেষভাৱে ২০ খন জীপছী গাড়ী মজুত কৰি ৰাখিছে। অতিথিৰ সুবিধার্থে নির্বাচিত ২০জন টুৰিষ্ট গাইডৰ ব্যৱস্থা কৰা হৈছে। কাজিৰঙা ৰাষ্ট্ৰীয় উদ্যান দর্শন কৰিব লগা অতিথিসকলৰ যাতে কোনো বেমেজালি সৃষ্টি নহয় তাৰ প্ৰতি লক্ষ্য ৰাখি ট্যুৰিষ্ট গাইডসকলক লৈ নির্বাচিত জীপছী গাড়ীসমূহক ৰাষ্ট্ৰীয় উদ্যানৰ ট্যুৰিষ্ট ট্রেকত আজি আখৰা কৰা হ'ব। উল্লেখযোগ্য যে এডভান্টেজ আছামলৈ অহা অতিথিসকলক কাজিৰঙা ৰাষ্ট্ৰীয় উদ্যানৰ কেৱল কঁহৰা বনাঞ্চলতহে ছাফাৰী কৰোৱা হ'ব।অতিথিসকলে জীপ ছাফাৰী কৰাৰ পূৰ্বে উক্ত দিনা কঁহৰা বনাঞ্চলৰ অধীনত মিহিমুখত এলিফেন্ট ছাফাৰী কৰাৰ কথা। 

গুৰুত্বপূৰ্ণ কথা যে ৰাষ্ট্ৰীয় উদ্যানখনৰ কঁহৰা বনাঞ্চলত যথেষ্ট সংখ্যক বন বিভাগৰ পোহনীয়া হাতী নথকাত বাগৰি বনাঞ্চলৰ পৰা অতিৰিক্ত হাতী অনা হ'ব বুলিও জানিব পৰা গৈছে। ইফালে এডভাণ্টেজ আছামত অংশগ্ৰহণ কৰিবলৈ অহা অতিথিয়ে কাজিৰঙা ৰাষ্ট্ৰীয় উদ্যান ভ্ৰমণ কৰাৰ প্ৰতি লক্ষ্য ৰাখি ইতিমধ্যে কাজিৰঙা ৰাষ্ট্ৰীয় উদ্যান কর্তৃপক্ষই উদ্যানৰ ভিতৰত থকা ট্যুৰিষ্ট ট্রেক মেৰামতি কৰাৰ লগতে ৰং সানি দর্শন চূড়া আদি সজাই-পৰাই তুলিছে। উল্লেখযোগ্য যে কাজিৰঙা ৰাষ্ট্ৰীয় উদ্যান দৰ্শন কৰিবলৈ অহা বিদেশী অতিথিসকলে কঁহৰাৰ মিহিমুখত থকা পিলখানাত ২৪ ফেব্ৰুৱাৰীৰ পুৱা বন বিভাগৰ পোহনীয়া হাতীক খাদ্য খুৱাব আৰু ফটো ছেছন কৰাৰ কথা। অন্যহাতে, অতিথিসকলৰ কাজিৰঙা আগমনৰ প্ৰতি লক্ষ্য ৰাখি আজি কাজিৰঙাৰ ৰয়েল ডি কাছা পৰ্যটন নিৱাসত ৰাজ্যখনৰ অতিৰিক্ত মুখ্য সচিব, প্রধান মুখ্য বন সংৰক্ষক, কাজিৰঙা ৰাষ্ট্ৰীয় উদ্যান কর্তৃপক্ষ, বোকাখাত সম জিলা আৰু গোলাঘাট জিলা প্ৰশাসনৰ মুৰব্বীয়ে আলোচনাত মিলিত হয়। অতিৰিক্ত মুখ্য সচিবে সংশ্লিষ্ট বিভাগৰ বিষয়াৰ পৰা কাজিৰঙা ৰাষ্ট্ৰীয় উদ্যান দর্শন, ৰাত্রি যাপন, নিৰাপত্তা আদি সকলো কথাৰ বুজ লোৱাৰ লগতে পৰ্যবেক্ষণ কৰে। উল্লেখযোগ্য যে দেশৰ প্ৰধানমন্ত্ৰী নৰেন্দ্ৰ মোদীয়ে কাজিৰঙা ৰাষ্ট্ৰীয় উদ্যান দৰ্শন কৰি যোৱাৰ পিছতেই দেশ-বিদেশৰ পৰ্যটকে বিশ্বৰ সৰ্বাধিক এটা খৰ্গ থকা গঁড়ৰ বাসস্থান তথা বিশ্ব ঐতিহ্য ক্ষেত্ৰ দৰ্শন কৰিবলৈ অধিক আগ্রহ প্রকাশ কৰিছে বুলি বিভাগীয় সূত্রে প্রকাশ।

Share This