মৈৰাবাৰীত এজন ছাত্ৰৰ নাভূত-নাশ্ৰুত কাণ্ড 

Kakali Deka January 21, 2025

ডিজিটেল ডেস্ক: ম’বাইল ফ'নটো এতিয়া সকলোৰে দৈনন্দিন জীৱনৰ অন্যতম সংগী হৈ পৰিছে৷ ম’বাইল ফ'নটো অবিহনে যেন কোনেও দিনটো আৰম্ভই কৰিব নোৱাৰে৷ ডাঙৰৰ কথা বাদেই, শিশুসকলৰ মাজতো এতিয়া ম’বাইল ফ'নৰ প্ৰতি আসক্তি বৃদ্ধি পোৱা পৰিলক্ষিত হৈছে৷ কিন্ত আপোনাৰ শিশুটিয়ে অত্যধিক ম’বাইল ফ'ন ব্যৱহাৰ কৰি কঢ়িয়াই আনিব পাৰে ভয়ংকৰ বিপদ৷

হয়, তেনে এক ঘটনা সংঘটিত হৈছে মৰিগাঁও জিলাৰ মৈৰাবাৰীত।মৈৰাবাৰীৰ ম'বাইল আসক্ত এজন ছাত্ৰই সংঘটিত কৰিলে এক ভয়ংকৰ কাণ্ড।বিচৰা ম'বাইল ফ'ন নিদিয়াৰ বাবেই ঘৰৰ পৰা পলায়ন কৰে ছাত্ৰজনে। কিয়নো অষ্টম শ্রেণীৰ ছাত্রজনে পিতৃ-মাতৃক বিচাৰিছিল এটা এন্ড্ৰইড ম'বাইল ফ'ন।বিচৰা ম'বাইল ফ'ন ছাত্ৰজনক পিতৃ-মাতৃয়ে নিদিয়াৰ বাবেই ঘৰ এৰি পলায়ন কৰাৰ পিছতেই এতিয়া হাহাকাৰ লাগিছে পৰিয়ালটোৰ মাজত ।

চাৰিদিনে নিৰুদ্দেশ হৈ থকা একমাত্ৰ পুত্রক বিভিন্ন ঠাইত বিচাৰি নাপাই ভুক্তভোগী পৰিয়ালটোৱে বৰ্তমান কাষ চাপিছে সংবাদ মাধ্যমৰ।নিৰুদ্দেশ হোৱা ছাত্ৰজন সূতাৰ গাঁৱৰ আছাদ হুছেইন বুলি জানিব পৰা গৈছে।নিৰুদ্দেশ হোৱা ছাত্ৰজনক উদ্ধাৰ কৰিবলৈ ইতিমধ্যে ধিং আৰক্ষী থানাত এজাহাৰ দাখিল কৰিছে পৰিয়ালে।

উল্লেখ্য যে যি সময়ত নৱপ্ৰজন্মৰ যুৱক-যুৱতীসকলক ম'বাইলৰ আসক্ত দূৰ কৰিবলৈ বিভিন্ন কাৰ্য ব্যৱস্থা গ্ৰহণ কৰা হৈছে, ঠিক তেনে সময়তে এটা ম'বাইল ফ'নৰ বাবে অষ্টম শ্রেণীৰ ছাত্রজনে ঘৰ এৰি পলায়ন কৰা বিষয়টোৱে চিন্তিত কৰি তুলিছে সচেতন মহলক। এতিয়া নিৰুদ্দিষ্ট ছাত্ৰজনক উদ্ধাৰৰ বাবে‌ আৰক্ষীয়ে কেনেধৰণৰ ব্যৱস্থা গ্ৰহণ কৰে‌ সেইয়া পৰৱৰ্তী সময়তহে লক্ষণীয় হ'ব।

Share This