কৃষি কৰ্মৰে স্বনিয়োজনৰ পথ প্ৰশস্ত মৰিগাঁৱৰ এগৰাকী মহিলাৰ

Rashmi February 28, 2025

ডিজিটেল ডেস্ক: কৃষি প্ৰধান ৰাজ্য অসমত এতিয়া মহিলাসকলে কৃষি কৰ্মৰে জড়িত হৈ গ্ৰাম্য অৰ্থনীতিৰ ভেটি সবল কৰিছে। পুৰুষৰ সমানেই মহিলাসকলেও আজি খেতি পথাৰত খোজ দিছে। কৃষি কৰ্মৰে স্বনিয়োজনৰ পথ প্ৰশস্ত কৰা তেনে এগৰাকী আদৰ্শৰ উদ্যমী মহিলা কৃষক ইলা ডেকা। মৰিগাঁও জিলাৰ জাগীৰোড কৃষি চক্ৰৰ অধীনৰ নখোলা গাঁৱৰ ইলা ডেকা নামৰ এইগৰাকী মহিলা কৃষকে ছাগলী পালন, এৰী পালন আৰু মিলেট খেতি কৰি কৃষি কৰ্মৰে সফলতাৰ বাট মুকলি কৰিছে।

প্ৰধানমন্ত্ৰী নৰেন্দ্ৰ মোদীয়ে দেশ ব্যাপি আৰম্ভ কৰা মিলেট মিছনৰ অধীনত ভিন্ন জাতৰ মিলেটৰ খেতি কৰি উৎপাদিত ফচলৰ পৰা সুস্বাদু খাদ্য সামগ্ৰী প্ৰস্তুত কৰি উপযুক্ত বজাৰ দখলৰ জৰিয়তে লাভান্বিত হৈছে। বিশেষকৈ ইলা ডেকাৰ প্ৰচেষ্টাত প্ৰায় ৫০০গৰাকী মহিলা কৃষকে সম্প্ৰতি মিলেট খেতিৰ জৰিয়তে কৃষি বিপ্লৱৰ সূচনা কৰিছে। নাৰী সবলীকৰণৰ উৎকৃষ্ট নিদৰ্শন ইলা ডেকাৰ প্ৰচেষ্টাত মহিলা কৃষকসকলে মিলেটৰ পৰা প্ৰস্তুত কৰা খাদ্য সামগ্ৰী বিক্ৰীৰ জৰিয়তে আৰ্থিকভাৱে লাভান্বিত হোৱাৰ লগতে চমক সৃষ্টি কৰিছে।

স্নাতক ডিগ্ৰীধাৰী ইলা ডেকাই ২০১৬ চনত ৬ বিঘা মাটি বন্ধকী লৈ এপাৰ্ট আঁচনিৰ অধীনত ৪ বিঘা মাটিত উন্নত জাতৰ গ্ৰেণ্ড-৯ প্ৰজাতিৰ কলৰ খেতি কৰিছিল। কিন্তু বানে ক্ষতিগ্ৰস্ত কৰাত কলৰ খেতিৰ পৰা আশানুৰূপভাৱে উপাৰ্জন নহ'ল।সমান্তৰালভাৱে নিজা ৫ বিঘা মাটিত ৰাষ্ট্ৰীয় কৃষি বিকাশ যোজনাৰ অধীনত লাভ কৰা ৰঞ্জিত চাব-১ জাতৰ ধানৰ বীজেৰে খেতি কৰি প্ৰায় ১৫ হাজাৰ টকা উপাৰ্জন কৰে। প্ৰথম বছৰতে ধান খেতিৰ জৰিয়তে লাভান্বিত হোৱা ইলা ডেকাই পৰৱৰ্তী সময়ত বহল পৰিসৰত ধান খেতি কৰাত গুৰুত্ব দিয়ে। ২০১৮-১৯ বৰ্ষত জিলা কৃষি বিভাগৰ পৰা লাভ কৰা বীজেৰে প্ৰায় ৩০ বিঘা মাটিত ৰাষ্ট্ৰীয় কৃষি বিকাশ যোজনাৰ অধীনত প্ৰদৰ্শনীমূলকভাৱে ৰঞ্জিত চাব-১ জাতৰ ধান, ৩ বিঘা মাটিত চেনি জহা, জহা, বৰা ধানৰ খেতি কৰি আৰ্থিকভাৱে লাভান্বিত হৈ উৎসাহিত হৈ পৰে। কৃষকগৰাকীয়ে উৎপাদিত ধান স্থানীয় বজাৰত বিক্ৰী কৰি প্ৰায় ১ লাখ টকা উপাৰ্জন কৰে। মহিলা সবলীকৰণৰ অন্যতম নিদৰ্শন ইলা ডেকাই ২০২০ চনত ২০ গৰাকী মহিলাক একত্ৰিত কৰি জোনবিল মহিলা কৃষক উৎপাদক কোম্পানী গঠন কৰে। সেই বছৰতে জিলা কৃষি বিভাগৰ উদ্যোগত ৰাষ্ট্ৰীয় কৃষি বিকাশ যোজনাৰ অধীনত বান প্ৰভাৱিত কৃষকৰ বাবে মহিলা কৃষকসকলে ২ হেক্টৰ মাটিত কমিউনিটি নাৰ্ছাৰী প্ৰস্তুত কৰি আৰ্থিকভাৱে লাভান্বিত হয়। 

২০২০ চনতে HMNEH আঁচনিৰ অধীনত লাভ কৰা বীজেৰে ১ হেক্টৰ মাটিত ষ্ট্ৰবেৰি খেতি কৰে। উৎপাদিত ষ্ট্ৰবেৰি প্ৰতি কেজি ২৫০ টকা দৰত বিক্ৰীৰ জৰিয়তে প্ৰায় ডেৰ লাখ টকা উপাৰ্জন কৰে মহিলাসকলে। ইয়াৰ উপৰি প্ৰায় ৩০ বিঘা মাটিত কৃষি বিভাগৰ পৰা লাভ কৰা বীজেৰে ৰঞ্জিত চাব-১ জাতৰ লগতে বিভিন্ন থলুৱা জাতৰ ধান যেনে বৰা, জহা, চেনি জহা, কোমল ধান খেতিৰ জৰিয়তে মহিলাসকলে সফলতাৰ মূখ দেখিবলৈ সক্ষম হয়। ইফালে অসম মিলেট মিছনৰ অধীনত ২০২২ চনত প্ৰথমবাৰৰ বাবে ২ বিঘা মাটিত প্ৰদৰ্শনীমূলকভাৱে ফিংগাৰ মিলেটৰ খেতি কৰিছিল ইলা ডেকাই । উৎপাদনৰ দিশত প্ৰথম বছৰতে সফলতা লাভ কৰি প্ৰতি বিঘা মাটিত প্ৰায় ডেৰ কুইণ্টল মিলেট উৎপাদন কৰিবলৈ সক্ষম হয়। সেই সময়ত মিলেটৰ ধাৰণা প্ৰচাৰ হোৱাই নাছিল। সেয়েহে উপযুক্ত বজাৰ লাভ নকৰাত কিছু অসুবিধাৰ সন্মুখীন হয়। পৰৱৰ্তী সময়ত ইলা ডেকাই উৎপাদিত মিলেটৰ পৰা বিভিন্ন খাদ্য সামগ্ৰী মহিলাসকলৰ সহযোগত প্ৰস্তুত কৰি স্থানীয় বজাৰ দখলৰ জৰিয়তে উৎসাহী হৈ পৰে। অধিক উৎসাহী মহিলাসকলে একে বছৰতে জিলা কৃষি বিভাগৰ পৰা লাভ কৰা বীজেৰে প্ৰায় ৭ বিঘা মাটিত ফক্সটেইল মিলেটৰ খেতি কৰে।

উৎপাদিত ফচলৰ পৰা মিলেটৰ গুড়ি প্ৰস্তুত কৰি প্ৰতি কেজি ১৫০ টকা দৰত বিক্ৰী কৰি উপযুক্ত বজাৰ দখল কৰে। ইমানতেই থমকি নাথাকি শেহতীয়াকৈ মিলেটৰ পৰা সুস্বাদু লাড়ু, পিঠা, কে'ক, চকলেট, বিস্কুট প্ৰস্তুত কৰি আন এখন বজাৰ দখল কৰাৰ লগতে প্ৰায় ৫০০গৰাকী মহিলাই চমক সৃষ্টি কৰি আৰ্থিকভাৱে উপকৃত হৈছে। ২০২৪ বৰ্ষত ইলা ডেকাৰ প্ৰচেষ্টাত ১০০ বিঘা মাটিত ফিংগাৰ মিলেটৰ খেতি কৰি কৃষি বিপ্লৱৰ সূচনা কৰাৰ লক্ষ্য স্থিৰ কৰিছে মহিলা কৃষকসকলে। উল্লেখযোগ্য যে অসম চৰকাৰৰ কৃষি বিভাগৰ দ্বাৰা আয়োজিত অসম কৃষি উদ্যান শস্য মেলা ২০২২-২৩ত মিলেটৰ পৰা প্ৰস্তুত কৰা খাদ্য সামগ্ৰী প্ৰদৰ্শনী কৰি দ্বিতীয় আৰু তৃতীয় স্থান লাভ কৰে অগ্ৰণী কৃষক ইলা ডেকাই। অকলে কৃষি কৰ্মৰ জৰিয়তে নিজৰ যাত্ৰাপথ আৰম্ভ কৰা ইলা ডেকাই সম্প্ৰতি ৫০০ গৰাকী মহিলাক একত্রিত কৰি কৃষি কৰ্মত নিয়োজনেৰে স্বাৱলম্বিতাৰ উৎকৃষ্ট নিদৰ্শন দাঙি ধৰিছে। শূণ্যৰ পৰা যাত্ৰা আৰম্ভ কৰা ইলা ডেকাই বৰ্তমান বছৰি প্ৰায় ৭ লাখ টকা উপাৰ্জন কৰিবলৈ সক্ষম হৈছে। বিশেষকৈ মহিলা কৃষকসকলৰ বাবে সফলতাৰ আদৰ্শ হৈ পৰিছে ইলা ডেকা।

Share This