৭ ৰ পৰা ৯ মাৰ্চলৈ মৰিগাঁৱৰ কিংবদন্তি কইনা কন্দা শিল মহোৎসৱ

Kakali Deka February 14, 2025

ডিজিটেল ডেস্ক: নদ-নদী, পাহাৰ-পৰ্বত,জান-জুৰি আদিয়ে পৰিবেষ্টিত অসম। প্ৰকৃতিৰ লালিতা-পালিতা এই ৰূপহী অসমীৰ বুকুত ঠাহ খাই আছে অলেখ কিংবদন্তি শিলা খণ্ড। তেনে এক কিংবদন্তি শিলা খণ্ড হৈছে মৰিগাঁও চহৰৰ পৰা ৮ কিল'মিটাৰ দূৰত্বত অৱস্থিত কইনা কন্দা শিল। এই শিলৰ আছে এক লোকগাথা। মৰিগাঁও জিলাৰ বঘৰাৰ এক জীৱন্ত কিংবদন্তি কইনা কন্দা শিল। 

প্ৰচলিত লোককথা অনুসৰি মধ্যযুগত বঘৰা ৰাজ্যৰ ৰজাৰ দিপলিপ ৰাজকুমাৰীৰ লগত বিয়া ঠিক হৈছিল যাদুৰ দেশ মায়ং ৰাজ্যৰ ৰজাৰ ৰাজকুমাৰৰ লগত।ধাৰ্য কৰা দিনত ৰাজকুমাৰীক বিয়া শেষ কৰি দৰা-কইন বঘৰা পাহাৰ লুংলুঙীয়া পথৰে গৈ থকা সময়তে আহে কাল ধুমুহা, শিলা বৃষ্টিপাত। শিলাবৃষ্টি আৰু ধুমুহাৰ পৰা ৰক্ষা পাবলৈকে দৰা- কইনাৰ সহিতে দৰাঘৰীয়া লোকসকলে শিলৰ গুহাত আশ্ৰয় লয়। কিন্তু তেওঁলোকে আশ্ৰয় গ্ৰহণ কৰা শিলৰ গুহাৰ মুখখন ভূমিস্খলনত বন্ধ হৈ পৰাত তেওঁলোক অকাল মৃত্যুক সাবটিব লগাত পৰে। জনশ্ৰুতি অনুসৰি শনিবাৰ আৰু মঙলবাৰে ৰাজকুমাৰ আৰু ৰাজকুমাৰীৰ কৰুণ বিননি নিজান পৰত ভাহি আহে বুলি স্থানীয় লোকে কয়। তেতিয়াৰে পৰা বঘৰা পাহাৰ এই অংশটোৰ নাম দিয়ে কইনা কন্দা পাহাৰ। কিংবদন্তিৰ এই পাহাৰটোক লৈ ছবি,তথ্যচিত্ৰ নিৰ্মাণ কৰাৰ লগতে নাটকো ৰচনা হৈছে।ইয়াৰ মাজতে মৰিগাঁৱৰ দুই নাট্যগোষ্ঠী সজাগ থিয়েটা আৰু ছন্দ নাট্যগোষ্ঠীয়ে ঐক্যবদ্ধভাৱে শ্বলংকিৰি সামাজিক সাংস্কৃতিক অনুষ্ঠানৰ উদ্যোগত বঘৰাৰ কিংবদন্তি কইনা কন্দা শিল নামকৰণেৰে গলছেপা পাহাৰৰ নান্দনিক সমতল ভূমিত অহা ৭ মাৰ্চৰ পৰা ৯ মাৰ্চলৈ ৬খনকৈ নাট মঞ্চস্থ কৰিবলৈ ব্যাপক প্ৰস্তুতি চলাই আছে। 

বিশিষ্ট অভিনেতা ৰাতুল ভূঞাক সভাপতি, এডিচন দেউৰীক কাৰ্যকৰী সভাপতি, গোবিন কুমাৰ নাথক সাধাৰণ সম্পাদক আৰু শৰৎ চন্দ্ৰ ডেকাক কোষাধ্যক্ষ হিচাপে লৈ গঠিত উদযাপন সমিতিয়ে প্ৰস্তুতি চলাই আছে। উদযাপন সমিতিয়ে ঘোষণা কৰা কাৰ্যসূচী অনুসৰি ৭ মাৰ্চৰ আবেলি ২ বজাত বিশ্বজিৎ ডেকাৰ পৰিচালনাত মঙ্গলদৈৰ জেংৰাই অসম নাট্যগোষ্ঠীৰ দ্বাৰা মঞ্চস্থ কৰিব চন পৰা বৃন্দাবন নাটক। আবেলি ৩-৩০ বজাত কনক বৰুৱাৰ ৰচনা, টুলুমনি দাসৰ পৰিচালনাত মৰিগাঁৱৰ অংকুৰণ কলা কেন্দ্ৰই মঞ্চস্থ কৰিব আই নহ'লে পিতাইক ক'ম,পিতাই নহ'লে কাক ক'ম নাটক। ৮ মাৰ্চৰ আবেলি ২ বজাত মুকুল ইদিপাছৰ ৰচনা আৰু ধ্ৰুৱৰাজ পাঠকৰ পৰিচালনাত সৰভোগৰ বনছাই অসম নাট্যগোষ্ঠীয়ে মঞ্চস্থ কৰিব 
অ' ফুল অ' ফুল নাটক। আবেলি ৩-৩০ বজাত নৱজ্যোতি বৰাৰ ৰচনা আৰু পৰিচালনাত নগাঁৱৰ জ্যোতিশিল্প নাট্যগোষ্ঠিয়ে মঞ্চস্থ কৰিব বলুকাত বিয়লি বেলা নাটক। ৯ মাৰ্চৰ আবেলি ২ বজাত প্ৰশান্ত সূত্ৰধাৰৰ ৰচনা আৰু পৰিচালনাত পশ্চিমবঙ্গৰ প্ৰজেক্ট এক্টৰ লেৱ নাট্যগোষ্ঠিয়ে মঞ্চস্থ কৰিব এক্স ৱাই জেদ নাটক। আবেলি ৩-৩০ বজাত ৰণহাং চৌধুৰীৰ ৰচনা আৰু পৰিচালনাত গুৱাহাটীৰ অভিজ্ঞানম নাট্যগোষ্ঠীয়ে মঞ্চস্থ কৰিব গান্ধী ভাইচেছ গডছে নাটক। নাট মহোৎসৱখনি সফল কৰি তোলাৰ বাবে সকলো নাট্যপ্ৰেমী ৰাইজৰ সহায় সহযোগিতা কামনা কৰিছে উদযাপন সমিতিয়ে ।

Share This