মৰিগাঁও আৰু জালুগুটি অসম গ্ৰামীণ বিকাশ বেংকৰ উদ্যোগত ঋণ প্ৰদান অনুষ্ঠান

Kakali Deka February 15, 2025

ডিজিটেল ডেস্ক: উদ্যমিতা হৈছে আধুনিক সমাজৰ ভৱিষ্যৎ। এই গুৰুত্বপূৰ্ণ মন্তব্য তিৱা স্বায়ত্ত পৰিষদৰ মুখ্য কাৰ্যবাহী সদস্য জীৱন চন্দ্ৰ কোঁৱৰৰ। অসম গ্ৰামীণ বিকাশ বেংক মৰিগাঁও আৰু জালুগুটি শাখাৰ যৌথ উদ্যোগত আজি মৰিগাঁও চহৰৰ পবিতৰা হাট প্ৰেক্ষাগৃহত অসম গ্ৰামীণ বিকাশ বেংকৰ উদ্যোগত ঋণ প্ৰদান অনুষ্ঠান অনুষ্ঠিত কৰা হয়। 

উক্ত ঋণ প্ৰদান অনুষ্ঠানত মুখ্য অতিথি হিচাপে অংশগ্ৰহণ কৰি তিৱা স্বায়ত্ত পৰিষদৰ মুখ্য কাৰ্যবাহী সদস্য কোঁৱৰে কয়, আত্মসহায়ক গোটৰ জৰিয়তে মহিলা সবলীকৰণ তথা গ্ৰামীণ অৰ্থনীতি উত্তৰণত নতুন মাত্ৰা প্ৰদান কৰিছে। মহিলা সবলীকৰণৰ প্ৰধান উদ্দেশ্য হৈছে তেওঁলোকক অৰ্থনৈতিকভাৱে আত্মনিৰ্ভৰশীল কৰি তোলা। মহিলাসকলে পৰিয়ালৰ এগৰাকী উৎপাদনশীল আৰু দায়িত্বশীল সদস্যৰূপে অৰ্থনৈতি দায়বদ্ধতা গ্ৰহণ কৰি উঠিব লাগিব আৰু এই ক্ষেত্ৰত মুখ্য ভূমিকা গ্ৰহণ কৰে উদ্যমিতাই। উদ্যমিতা হৈছে আধুনিক সমাজৰ ভৱিষ্যৎ। সেয়ে চৰকাৰে উদ্যমিতাৰ জৰিয়তে মহিলাৰ সবলীকৰণত অধিক গুৰুতৰ আৰোপ কৰিছে বুলি মন্তব্য কৰে। 

বেংকৰ ৪ খন আঁচনিৰ ভিতৰত মুঠ ৩ কোটি ৩৩ লাখ ৪৮ হাজাৰ টকা ঋণ প্ৰদান কৰা সভাখনত ৫০ টা আত্মসহায়ক গোটক ৩ কোটি টকা, ২০ গৰাকী মহিলা উদ্যমীক ২০ লাখ ৫০ হাজাৰ টকা, সূৰ্য ঘৰ ৬ জনক ১০ লাখ, ৯৮ হাজাৰ টকা, মুদ্ৰা আঁচনিত এজনক ২ লাখ টকা ঋণ প্ৰদান কৰে। ঋণ প্ৰদান সভাত অসম গ্ৰামীণ বিকাশ বেংকৰ মহা প্ৰবন্ধক দীপক মণ্ডল, আঞ্চলিক প্ৰবন্ধক হৃদয় দেউৰী, জ্যেষ্ঠ প্ৰবন্ধক নিতুল দত্ত, অসম গ্ৰামীণ জীৱিকা অভিযানৰ মৰিগাঁও জিলা প্ৰকল্প প্ৰবন্ধক সমীৰ চৌধুৰী, কপিলী খণ্ডৰ প্ৰকল্প প্ৰবন্ধক নাৰ্জিন চুলতানা, মৰিগাঁও শাখাৰ প্ৰবন্ধক বিনোদ গগৈ, জালুগুটি শাখাৰ প্ৰবন্ধক জ্যোতি নাথকে আদি কৰি ভালেকেইজন বেংকৰ বিষয়া-কৰ্মচাৰী উপস্থিত থাকে।

Share This