মৰিগাঁও জিলাত বিষাক্ত কাঠফুলা সেৱনৰ বিৰুদ্ধে সজাগতামূলক কাৰ্যসূচী

Rashmi March 21, 2025

ডিজিটেল ডেস্ক: কাঠফুলা সেৱনৰ ফলত সৃষ্টি হ'ব পৰা ভয়াৱহ পৰিস্থিতিৰ বিষয়ে জনসাধাৰণক অৱগত কৰাৰ লগতে সজাগতা সৃষ্টি কৰিবলৈ মৰিগাঁও জিলাৰ ঝাৰগাঁও,লাহৰিঘাট আৰু ভুৰবন্ধা ব্লকৰ অন্তৰ্গত চিকিৎসা কেন্দ্ৰ সমূহৰ লগতে ৰাজহুৱা স্থানত মাইকিং কৰা হয়। 

ইয়াৰ মূল উদ্দেশ্য আছিল বনৰীয়া কাঠফুলা সেৱন কৰাৰ ফলত সৃষ্টি হোৱা ভয়াৱহ বিপদৰ বিষয়ে জনসাধাৰণক অৱগত কৰোৱা আৰু সজাগতাৰ সৃষ্টি কৰা। কিছুমান অঞ্চলত খাদ্য  হিচাপে বহু লোকে অজানিতে কাঠফুলাৰ বিষাক্ত প্ৰজাতি সেৱন কৰে, যাৰ ফলত প্ৰতি বছৰে অসমৰ বিভিন্ন ঠাইত ৰোগীৰ সংখ্যা বৃদ্ধি পোৱা পৰিলক্ষিত হয়। সাধাৰণতে বিষাক্ত কাঠফুলা ভক্ষণৰ কিছু সময়ৰ পাছৰে পৰা প্রায় ছঘণ্টাৰ ভিতৰত বিষক্রিয়াজনিত বাহ্যিক কাৰকসমূহৰ প্রকাশ ঘটে ।

যিবোৰক লৈ জনসাধাৰণ অধিক অৱগত নহয়, ইয়াৰ ফলত ৰোগীৰ অৱস্থা সংকটজনক হৈ জীৱনৰ প্রতি ভাবুকিৰ সৃষ্টি হোৱাৰ শংকা নামি আহে, এনেধৰণৰ পৰিস্থিতিৰ সৈতে কেনেদৰে যুঁজ দিব পৰা যায় সেই উদ্দেশ্যে মৰিগাঁও জিলাখনৰ বিভিন্ন  ঠাইত কাঠফুলা সেৱনৰ বিৰুদ্ধে সজাগতাৰ বাবে এই মাইকিং ব্যৱস্থা কৰাৰ লগতে লিফলেট বিতৰণ কৰা হয়।

উৎস: প্ৰাগ নিউজ ডিজিটেল

 

Share This