১.২৪ লাখ টকালৈ বৃদ্ধি সাংসদৰ দৰমহা

dainik janambhumi March 25, 2025

ডিজিটেল ডেস্ক : সাংসদসকলৰ দৰমহা আৰু ভাত্তা  ২৪% বৃদ্ধি কৰা হৈছে। সংসদীয় পৰিক্ৰমা মন্ত্ৰ্যালয়ে আজি প্ৰকাশ কৰা এখন অধিসূচনাৰ পৰা এই কথা জানিব পৰা গৈছে।অধিসূচনাত প্ৰকাশ কৰা অনুসৰি সাংসদসকলৰ দৰমহা আৰু ভাত্তা বৃদ্ধি ২০২৩ চনৰ ১ এপ্ৰিলৰ পৰা কাৰ্যকৰী হ'ব। দৰমহা আৰু ভাত্তাসমূহ বৃদ্ধি কৰাৰ পাছত এতিয়া সাংসদসকলে প্রতিমাহে ১ লাখ ২৪ হাজাৰ টকাকৈ দৰমহা লাভ কৰিব। 

ইয়াৰ আগতে তেওঁলোকে প্রতিমাহে ১ লাখ টকাৰ দৰমহা লাভ কৰিছিল। ইফালে প্ৰাক্তন সাংসদসকলৰ পেঞ্চন ২৫ হাজাৰ টকাৰ পৰা ৩১ হাজাৰ টকালৈ বৃদ্ধি কৰা হৈছে। ১৯৫৪ চনৰ সাংসদসকলৰ দৰমহা, ভাত্তা আৰু পেঞ্চন আইনৰ অধীনত এই দৰমহা বৃদ্ধি কৰা হয়। সাংসদসকলৰ দৈনিক ভাত্তা বৰ্তমানৰ ২ হাজাৰ টকাৰ পৰা ২,৫০০ টকালৈ বৃদ্ধি কৰে। আনহাতে, পাঁচ বছৰৰ অধিক সেৱা আগবঢ়োৱা সাংসদসকলে অতিৰিক্ত প্ৰতিবছৰত লাভ কৰা পেঞ্চন ২ হাজাৰ টকাৰ পৰা আঢ়ৈ হাজাৰ টকালৈ বৃদ্ধি কৰা হয়। উল্লেখযোগ্য যে ২০১৮ চনত নৰেন্দ্ৰ মোদী চৰকাৰে সাংসদসকলৰ বেতন আৰু ভাত্তা প্রতি পাঁচ বছৰৰ মূৰত পৰ্যালোচনা কৰাৰ সিদ্ধান্ত লৈছিল। এই পর্যালোচনা মুদ্রাস্ফীতিৰ হাৰক ভিত্তি কৰি কৰা হয়। 

উল্লেখযোগ্য যে সাংসদসকলে দৰমহা আৰু ভাত্তাৰ উপৰি প্ৰতিবছৰে ফ'ন আৰু ইন্টাৰনেট ব্যৱহাৰ কৰাৰ বাবত ভাত্তা লাভ কৰে। লোক সভাৰ সদস্যসকলে ১.৫ লাখ আৰু ৰাজ্য সভাৰ সদস্যসকলে ৫০ হাজাৰ বিনামূলীয়া কলৰ সুবিধা লাভ কৰে। ইয়াৰ লগতে সাংসদ আৰু তেওঁৰ পৰিয়ালৰ লোকে এবছৰত ৩৪বাৰ বিনামূলীয়াকৈ ঘৰুৱা ভ্ৰমণৰ সুবিধা লাভ কৰে। তদুপৰি চৰকাৰী কাম বা ব্যক্তিগত কাৰণত যিকোনো সময়তে ৰে'লত বিনামূলীয়াকৈ প্ৰথম শ্ৰেণীত ভ্ৰমণৰ সুবিধা, পথত কৰা যাত্ৰাৰ বাবত ইন্ধন, প্রতিবছৰে বিনামূলীয়াকৈ ৫০ হাজাৰ ইউনিট বিদ্যুৎ আৰু ৪ হাজাৰ কিল'লিটাৰ পানী লাভ কৰে। সাংসদসকলে চৰকাৰী আৰু ব্যক্তিগত চিকিৎসালয়ত বিনামূলীয়াকৈ সকলোধৰণৰ চিকিৎসা লাভো কৰে। আনহাতে, ২০১৮ চনত কৰা সংশোধন অনুসৰি সাংসদসকলে নিজৰ কাৰ্যালয়ত কৰ্মচাৰী নিয়োগ আৰু নিজৰ জিলাত তথা সমষ্টিত ভোটাৰৰ সৈতে মত বিনিময় কৰাৰ বাবত সমষ্টি ভাত্তা হিচাপে ৭০ হাজাৰ টকা লাভ কৰি আহিছে। এতিয়া এই ভাত্তাও বৃদ্ধি পাব।

Share This