বিদেশলৈ ৰপ্তানি নলবাৰীৰ জাপি

dainik janambhumi February 09, 2025

ডিজিটেল ডেস্ক: টিহুৰ নামবৰভাগ মৌজাৰ বৰভাগজাৰী গাঁৱৰ ৰাতুল বৈশ্য আৰু ৰঞ্জু তামুলী বৈশ্যই ব্যতিক্রমী শৈলীৰে বেজ জাপি প্রস্তুত কৰি স্বাৱলম্বিতাৰ পথ মোকলাইছে। সৰু সৰু জাপি বনাই ৰাজ্যৰ বিভিন্ন প্ৰান্তৰ লগতে বহিঃৰাজ্য আৰু অন্য দেশলৈও ৰপ্তানি কৰিবলৈ সক্ষম হৈছে। কোনো ধৰণৰ চৰকাৰী সা-সুবিধা অবিহনেই নলবাৰীৰ বিখ্যাত জাপি উদ্যোগৰ সৈতে জড়িত হৈ আছে এইটো দম্পতী। 

জাপিৰ বাবে বিখ্যাত গাঁও মুগকুছিৰ জীয়াৰী ৰঞ্জু তামুলীয়ে ২০০০ চনৰে পৰা এই শিল্পৰ সৈতে জড়িত হৈ আছে। বিবাহৰ পিছতো নলবাৰীৰ টিহুৰ বৰভাগজাৰীত কল্পতৰু ষ্টোৰ এণ্ড বেম্বো ক্রাফটৰ জৰিয়তে জাপি উদ্যোগটো গঢ় দি আগবঢ়াই নিছে। এইক্ষেত্রত সমানেই সহায় আগবঢ়াইছে স্বামীয়ে। 

ৰাজ্যৰ লগতে বহিঃৰাজ্যতো এই বেজ জাপিৰ আছে যথেষ্ট সমাদৰ। সৰু বাবেই এই জাপি বাহিৰলৈ ৰপ্তানি কৰিবলৈও যথেষ্ট সুবিধাজনক, কেৱল বেজ জাপিয়েই নহয় আন আন বিভিন্ন আটকধুনীয়া জাপিও প্রস্তুত কৰে ৰঞ্জু তামুলী বৈশ্যই। এই বৃত্তিৰে পৰিয়াল সুন্দৰকৈ পোহপাল দিব পাৰি বুলি জনাই নতুন প্রজন্মক এই জাপি শিল্পৰ প্ৰতি আগবাঢ়ি আহিবলৈ আহ্বান জনায় ৰঞ্জু তামুলীয়ে।

Share This