ভয়ংকৰ পথ দুৰ্ঘটনাত দৃষ্টিশক্তি হেৰুৱালে দ্বীপৰঞ্জন তালুকদাৰে

Kakali Deka January 27, 2025

ডিজিটেল ডেস্কঃ এটা ভয়ংকৰ পথ দুর্ঘটনা। এই পথ দুর্ঘটনাটোৱে কাল অমানিশা নমাই আনিলে নলবাৰীৰ এটা পৰিয়াললৈ। পথ দুৰ্ঘটনাত দ্বীপৰঞ্জন তালুকদাৰে দৃষ্টিশক্তি হেৰুৱাব লগা হয়। পখিলা খেদা বয়সতে দৃষ্টিশক্তি হেৰুৱাইছিল নলবাৰী জিলাৰ মুকালমুৱাৰ চতেমাৰী গাঁৱৰ দ্বীপৰঞ্জন তালুকদাৰে। সেই সময়ত দ্বীপৰঞ্জনৰ বয়স হৈছিল মাত্র ১১ বছৰ।

সপ্তম শ্রেণীত পঢ়ি থাকোঁতেই ভাঙি-ছিঙি চূৰমাৰ হৈছিল পঢ়ি-শুনি ডাঙৰ মানুহ হোৱাৰ এটি আলফুলীয়া সপোন।

২০১২ চনৰ এটি অভিশপ্ত দিনত সংঘটিত হৈছিল এই বুকু কঁপি উঠা এক হৃদয়বিদাৰক পথ দুর্ঘটনা। ঘৰৰ পৰা এখন টেম্পো গাড়ীৰে মুকালমুৱালৈ গৈ থাকোঁতেই দুর্ঘটনাত পতিত হৈ দ্বীপৰঞ্জন গুৰুতৰভাৱে আহত হোৱাত তেওঁক সংকটজনক অৱস্থাত গুৱাহাটীৰ এখন ব্যক্তিগত চিকিৎসালয়ত ভৰ্তি কৰোৱা হৈছিল।

১৮ টা দিন ICUত থাকি ভগৱানৰ কৃপাত আৰু চিকিৎসকৰ আপ্রাণ চেষ্টাত দ্বীপৰঞ্জনৰ জীৱন
ৰক্ষা পৰিছিল যদিও চিৰদিনৰ বাবে হেৰুৱাবলগীয়া হৈছিল তেওঁৰ দৃষ্টিশক্তি।

কৃষক পিতৃ মহেন্দ্র তালুকদাৰে কনিষ্ঠ পুত্ৰ দ্বীপৰঞ্জনৰ দৃষ্টিশক্তি ঘূৰাই আনিবলৈ ঘৰৰ পোহনীয়া গৰু, ছাগলীকে ধৰি মাটি-সম্পত্তি বিক্ৰী কৰি গুৱাহাটীৰ লগতে দেশৰ বিভিন্নজন চিকিৎসকৰ ওচৰলৈ চিকিৎসাৰ বাবে লৈ যায়।

কিন্তু টকাৰ অভাৱত চিকিৎসা আধাতে সামৰি দ্বীপৰঞ্জনক ঘৰলৈ ওভতাই আনে দৰিদ্ৰ পিতৃয়ে। আনহাতে দুবছৰ পূৰ্বে পিতৃও দুর্ঘটনাত পতিত হৈ চিকিৎসাধীন হৈ আছে।

সেই দিন ধৰি আজি ১২ বছৰে কেৱল ধনৰ অভাৱতে উপযুক্ত চিকিৎসাৰ পৰা বঞ্চিত হৈ আছে দ্বীপৰঞ্জন তালুকদাৰ। পৃথিৱীৰ পোহৰ দেখিবলৈ নোপোৱাৰ দুখত দিকবিদিক হেৰুৱাইছে দ্বীপৰঞ্জনে।

দ্বীপৰ মনত এটাই আশা- উপযুক্ত চিকিৎসা পালে হয়তো চকু দুটা পুনৰ ঘূৰাই পাব।

পৃথিৱীৰ পোহৰ চাবলৈ মনত হেঁপাহ পুহি ৰখা দ্বীপে মুখ্যমন্ত্ৰী হিমন্ত বিশ্ব শৰ্মাৰ পৰা বিচাৰিছে সহায়।

আনহাতে, কোনো সদাশয় লোকে পৰিয়ালটোক চিকিৎসাৰ বাবে আর্থিক সকাহ দিব বিচাৰিলে দ্বীপৰঞ্জন তালুকদাৰৰ লোহাৰকাঠাস্থিত Bank of India, BKID0005003 আৰু বেংক একাউণ্ট নম্বৰ 500310510001261-ত সহায় কৰিব পাৰিব বা পৰিয়ালৰ লগত যোগাযোগ কৰিব পাৰিব 93948 57077- এই নম্বৰত।