বাপতিসাহোন ৰঙালী বিহু সমাগত , সীমাহীন ব্যস্ততা নলবাৰীৰ সৰুদৈয়া জাপি শিল্পীৰ 

dainik janambhumi April 03, 2025

ডিজিটেল ডেস্কঃ বাপতিসাহোন ৰঙালী বিহু সমাগত। জাতীয় জীৱনৰ প্ৰাণকেন্দ্ৰ স্বৰূপ এই সাতামপুৰুষীয়া বহাগ বিহু উদযাপনক লৈ ইতিমধ্যে আয়োজক সমিতিসমূহে প্ৰস্তুতি আৰম্ভ কৰিছে। 

ইয়াৰ সমান্তৰালকৈ ইতিমধ্যে সাজু হৈছে শিল্পী তথা কলা-কুশলীসকল। ৰাজ্যখনৰ ৰঙালী বিহুতলীসমূহত প্রতিবছৰে গ্ৰাম্য চহা জীৱনৰ প্ৰতীক তথা থলুৱা কুটীৰ শিল্পৰ অনন্য নিদর্শন জাপি শিল্পই প্রাধান্য লাভ কৰি আহিছে।

মন কৰিবলগীয়া যে ৰাজ্যখনৰ ভিতৰতেই জাপি নির্মাণকার্যত প্রথম স্থান অধিকাৰ কৰি অহা নলবাৰী জিলাৰ জাপি শিল্পীসকলে এইবাৰো জাপি নির্মাণত দিনে-নিশাই অহৰহ ব্যস্ত হৈ পৰা পৰিলক্ষিত হৈছে। ৰাজ্যৰ উজনি-নামনি সর্বত্র জনপ্রিয় হৈ পৰা ফুলাম জাপিয়ে বিহুতলী-বিহু মঞ্চসমূহক শুৱনি কৰাৰ প্ৰতি লক্ষ্য ৰাখি জিলাখনৰ প্রায় ডেৰ-দুই সহস্রাধিক কুটীৰ শিল্পীয়ে বিগত ডেৰ-দুমাহ ধৰি জাপি নিৰ্মাণ কৰাৰ বাবে ব্যস্ত হৈ পৰা দেখা গৈছে। 

বিশেষকৈ জিলাখনৰ তিলানা, বালামুগকুছি সূতাৰকুছি, তেৰেছিয়া, কর্দৈতোলা, এলেংগীদল আদি গাঁৱৰ কুটীৰ শিল্পীসকলে নিজৰ ঘৰখনকে একো একোটা ক্ষুদ্র উদ্যোগলৈ ৰূপান্তৰিত কৰি সমাজৰ পৰা প্ৰশংসিত হ'বলৈ সক্ষম হোৱাৰ লগতে আর্থিকভাৱেও স্বাৱলম্বী হৈ আহিছে। 

কর্দৈতোলা (কটলাকুছি)ৰ দক্ষ তথা বিশিষ্ট জাপি শিল্পী মোহন কলিতাই জানিবলৈ দিয়া মতে, এইবাৰ তেওঁ আঠ ফুট ডাঙৰ আকাৰৰ এটা ফুলাম জাপি নির্মাণত বর্তমান অধিক ব্যস্ত হৈ পৰাৰ লগতে ইতিমধ্যে তেওঁৰ 'এম কলিতা শিল্প উদ্যোগ'ত কেইবাশ আকর্ষণীয় ফুলাম জাপি অৰ্ডাৰ অনুযায়ী নিৰ্মাণ কৰি উলিয়াইছে।

জিলাখনৰ তিলানা, মুগকুছি, এলেংগীদল, কর্দৈতোলা, সূতাৰকুছি, দীঘেলী এই অখ্যাত গাঁওকেইখনৰ প্ৰায় সহস্রাধিক ডেকা-বৃদ্ধ কুটীৰ শিল্পীয়ে আপাততঃ সৰুদৈয়া জাপি নির্মাণত ব্যস্ত হৈ থকা দেখা গৈছে। এইসকল শিল্পীয়ে প্ৰতি বছৰে বিহুতলীক লক্ষ্য কৰি ফুলাম জাপি, বেজ জাপি (সৰু), হালোৱা জাপি আদি নিৰ্মাণ কৰি আহিছে। তেওঁলোকৰ হাতৰ চানেকিত তৈয়াৰী জাপিসমূহ স্থানীয়ভাৱে বিক্ৰী কৰাৰ লগতে গুৱাহাটী, শিৱসাগৰ, ডিব্ৰুগড়, ধেমাজি, মাজুলী, জোনাই, তিনিচুকীয়া, চিলাপথাৰ আদি জিলাৰ উপৰি অসমৰ বাহিৰলৈও আমদানি হয়। কিন্তু পৰিতাপৰ বিষয় যে আধুনিকীকৰণৰ ক্ষেত্ৰত চৰকাৰী উদাসীনতাৰ ফলত কুটীৰ শিল্পবিধক বৃহৎ উদ্যোগলৈ ৰূপান্তৰিত কৰাৰ সপোন শিল্পীসকলৰ অদ্যাপি বাস্তৱত পৰিণত হোৱা নাই। তথাপি শিল্পবিধক আগুৱাই নিয়াৰ ক্ষেত্ৰত আহি পৰা প্ৰতিবন্ধকতাক প্রত্যাহ্বান হিচাপে গ্রহণ কৰি জিলাখনৰ এইসকল শিক্ষিত-অশিক্ষিত যুৱক-যুৱতী, পুৰুষ-মহিলাৰ লগতে অশীতিপৰজনেও শিল্পবিধৰ লগত জড়িত হৈ আহিছে। আনহাতে, শিল্পবিধ বৃহৎ উদ্যোগ হিচাপে গঢ় লৈ নুঠাত ১০-১৫টা পৰিয়াল একলগ হৈ নিৰ্মাণ কৰা জাপিসমূহ ৰাজ্যৰ প্রান্তে প্রান্তে বিক্রী কৰি কিছু হ'লেও অর্থ উপাৰ্জন কৰি আহিছে। কুটীৰ শিল্পীসকলৰ সুনিপুণ হাতৰ কৌশলেৰে জাতীয় জীৱনৰ সংস্কৃতিক প্রতিনিধিত্ব কৰি অহা এই শিল্পবিধৰ প্ৰতি চৰকাৰৰ সু-দৃষ্টি পৰাৰ বাবে সচেতন ৰাইজে আহ্বান জনাইছে। আনকি জিলাখনৰ কেইবাটাও জাতীয় সংগঠনে শিল্পবিধৰ সৈতে জড়িত হৈ অহা দৰিদ্ৰ শিল্পীসকলক সহায় কৰাৰ বাবেও দাবী জনাই আহিছে। এইসকল শিল্পীৰ ৰাজসাহায্য যাতে নিশ্চিত হয় চৰকাৰে পদক্ষেপ লোৱাৰ বাবে সচেতন ৰাইজে আহ্বান জনাইছে।

Share This