নয়ন অসমৰ মৃত্যুৰ নিশ্চিত বাৰ্তা দিলে পৰেশ বৰুৱাই

dainik janambhumi July 16, 2025

ডিজিটেল ডেস্ক : আলফাৰ শীৰ্ষ নেতা তথা বজালীৰ ডুমুৰীয়া গাঁও নিৱাসী নয়ন কলিতা ওৰফে নয়ন অসম সেনাৰ ড্ৰ'ন আক্ৰমণত নিহত হোৱাৰ পাছত মঙলবাৰে পৰিয়ালটোক সান্ত্বনা দিবলৈ আলফাৰ সেনাধ্যক্ষ পৰেশ বৰুৱাৰ বাৰ্তা লৈ ডুমুৰীয়াৰ বাসগৃহত উপস্থিত হয় আলফাৰ প্ৰাক্তন নেতা প্রাণজিৎ শইকীয়া। শইকীয়া উপস্থিত হোৱাৰ পাছতে নয়ন অসমৰ পৰিয়ালৰ সৈতে ফ'নযোগে কথা পাতি নয়নৰ নিশ্চিত মৃত্যুৰ বাৰ্তা দিয়ে পৰেশ বৰুৱাই। সংগঠনৰ নিয়ম অনুসৰি সোমবাৰে নয়নক সমাধিস্থ কৰাৰ কথা পৰিয়ালক অৱগত কৰে পৰেশ বৰুৱাই।

আনহাতে নয়ন অসমৰ ভনীয়েকৰ অনুৰোধমর্মে নয়নৰ অস্থি ঘৰলৈ প্ৰেৰণৰ প্ৰতিশ্রুতিও দিয়ে পৰেশ বৰুবাই। ইপিনে আলফাৰ প্ৰাক্তন নেতা প্রাণজিৎ শইকীয়াই সংবাদ মাধ্যমৰ আগত আলফাত থকা সময়ৰ কথা কিছু প্ৰকাশ কৰি কয়- নয়ন আমাতকৈ বহুত সৰু আছিল। দেশৰ কাৰণে মৃত্যুক আঁকোৱালি লোৱা নয়নৰ বাবে সমাজে নিশ্চয় তেওঁৰ বাবে কিবা কৰিব। এই বীৰ শ্বহীদগৰাকীৰ ত্যাগ বীৰত্ব অথলে নাযাবলৈ সমাজলৈ আহ্বান জনায় প্রাক্তন আলফাগৰাকীয়ে।

আনহাতে সংগঠনত থাকোঁতে এবাৰ নয়নৰ ডিঙিৰ টনচিলৰ কথা উল্লেখ কৰি পৰেশ বৰুৱাৰ নিৰ্দেশমৰ্মে বালাংদেশৰ ঢাকাৰ এখন চিকিৎসালয়ত চিকিৎসা প্রদান কৰাৰ কথাও উল্লেখ কৰে।

ম্যানমাৰত টিকেন্দ্ৰ অসমৰ মৃত্যুৰ খবৰ পাই শোকস্তব্ধ ছিপাঝাৰৰ কদমতলি গাঁওবাসী : ছিপাঝাৰ থানাৰ অন্তৰ্গত কদমতলী গাঁৱৰ দিন হাজিৰা কৰি ঘৰখনৰ পোহপাল দিয়া অতি দুখীয়া কুশল নাথৰ একমাত্র পুত্র ভাস্কৰজ্যোতি নাথৰ ম্যানমাৰত থকা আলফা শিবিৰত সদ্য ড্র'ন আক্রমণত নিহত হোৱা খবৰ মঙলবাৰে পুৱাৰ ভাগত ঘৰখনত পোৱাৰ লগে লগে শোকাকুল পৰিৱেশৰ সৃষ্টি হয়। উল্লেখ্য যে বিগত ১০ জুনৰ পৰা সন্ধানহীন হৈ আছিল ছিপাঝাৰৰ কদমতলী গাঁৱৰ যুৱক ভাস্কৰজ্যোতি নাথ ওৰফে টিকেন্দ্ৰ অসম।

মাতৃহাৰা ভাস্কৰজ্যোতি নাথৰ আলফাৰ ম্যানমাৰ কেম্পত মৃত্যু হোৱা বুলি খবৰ বিয়পি পৰাৰ পাছতেই শোকাকুল পৰিৱেশৰ সৃষ্টি হৈছে সমগ্ৰ গাঁওখনত। দিন হাজিৰা কৰি ঘৰ চলোৱা পিতৃৰ একমাত্র পুত্ৰ ভাস্কৰজ্যোতিৰ বয়স আছিল মাত্র ২২ বছৰ। উল্লেখযোগ্য যে পূর্বতে এনে কাৰ্যকলাপৰ সৈতে জড়িত থকাৰ উমান পোৱা নাছিল পৰিয়ালৰ লোকে। বিপৰীতে ভাস্কৰৰ সৈতে মঙলদৈৰ আন এজন যুৱক জিন্টু নাথৰ সৈতে আছিল বন্ধুত্ব। দুয়োৱে একেলগে ওলাই গৈছিল কামৰ সন্ধানত। পৰিয়ালৰ লোকে জনোৱা মতে, ১১ জুনত কামৰ কথা উল্লেখ কৰিছিল মৃত ভাস্কৰ নাথে। পিছে কালি ভাস্কৰ নাথৰ মৃত্যুৰ পিছত ৰহস্যময় হৈ পৰিছে জিন্টু নাথ নামৰ বন্ধুজনৰ স্থিতি। ইফালে নিষিদ্ধ সংগঠনটোত কেনেকৈ দুয়োৱে যোগদান কৰিলে সেই কথাও পৰিয়ালৰ লোকে জানিব পৰা নাই। মৃত্যুৰ সময়ত ভাস্কৰজ্যোতি নাথে নিজৰ পিতৃৰ সৈতে একমাত্র ভনীয়েক আৰু আত্মীয়-কুটুম্বক ইহ সংসাৰত এৰি যায়।

ইতিমধ্যে ভাস্কৰ নাথৰ বাসগৃহত অসম আৰক্ষীৰ বিশেষ বাহিনী উপস্থিত হৈছে।

Share This