কপিলী জলবিদ্যুৎ প্ৰকল্পৰ বান্ধ খুলি দিলে নীপকোৱে

dainik janambhumi May 22, 2025

ডিজিটেল ডেস্কঃ ডিমা হাছাও জিলাৰ উমৰাংছ'ৰ খান্দং বান্ধৰ ৭খন গেট খুলি দিয়াৰ ফলত মঙলবাৰে নিশাৰ পৰা নগাঁও আৰু মৰিগাঁও জিলাৰ মাজেৰে ১১ পিঠিলৈ বৈ যোৱা কপিলী নদীৰ জলপৃষ্ঠ ক্রমশঃ বৃদ্ধি হৈছে।

 ডিমা হাছাওৰ খান্দং বান্ধ, কপিলী হাইড্ৰ পাৱাৰ ষ্টেছনৰ ৰিজাৰ্ভাৰত পানীৰ উচ্চতা বৃদ্ধি হোৱাত এই গে'টকেইখন খুলি দিয়া হৈছে বুলি জানিব পৰা গৈছে। কপিলী জলবিদ্যুৎ প্রকল্পৰ ৭ খন গে'টেৰে পানী অহাত কপিলী নৈৰ জলপৃষ্ঠ বৃদ্ধি হৈছে। বিগত কেইবাদিনো ধৰি হৈ বৰষুণৰ বাবে জলবিদ্যুৎ প্রকল্পৰ গেট মুকলি কৰি ৰাখিব লগা হৈছে। হাছাও আৰু মেঘালয়ত বৰষুণ হৈ থাকিলে কপিলী নৈৰ জলপৃষ্ঠ অধিক পাব বুলি জানিব পৰা গৈছে। ইপিনে কামপুৰত যোৱা নিশাৰ পৰা জলপৃষ্ঠ বৃদ্ধি পোৱা পৰিলক্ষিত হৈছে। যাৰ বাবে কপিলী নদীৰ লগত সংলগ্ন যমুনা, হাৰিয়া আদি নৈৰ জলপৃষ্ঠ বৃদ্ধি পোৱাৰ সম্ভাৱনাক নুই কৰিব নোৱাৰি। কপিলী নৈৰ পানী বাগৰিলে বকুলগুৰি, পদুমণি, কলনি, যমুনামুখ, কচুৱা, কামপুৰ, চাংচকী, গাৰোখুন্দা আদিকে ধৰি মধ্য অসমৰ বহু অঞ্চল বানপানীৰ কবলত পৰাৰ সম্ভাৱনা আছে। 

ইতিমধ্যে নগাঁও জিলা প্রশাসনে কপিলীৰ নৈ পৰীয়া লোকক সতর্ক হৈ থাকিবৰ বাবে জাননী জাৰি কৰিছে। বাতৰি লিখাৰ সময়ত কামপুৰত বৰষুণ কমিছে যদিও কপিলীৰ জলপৃষ্ঠ বৃদ্ধি হৈ আছে। কপিলী জলবিদ্যুৎ প্রকল্পৰ এক সূত্র মতে খান্দং বান্ধৰ ৭ খন গেট মুকলি হৈ আছে আৰু পানীৰ গতি স্বাভাৱিক অৱস্থাত আছে।

Share This