'অ' মোৰ আপোনাৰ দেশ' গাই বিশ্ব অভিলেখ গঢ়িব ১ কোটি লোকে

dainik janambhumi March 12, 2025

ডিজিটেল ডেস্কঃ এইবাৰ ৰাজ্যখনৰ ভিন ভিন প্ৰান্তৰ ১ কোটি মানুহে একেলগে 'অ' মোৰ আপোনাৰ দেশ' গাই সৃষ্টি কৰিব এক নতুন বিশ্ব অভিলেখ। মঙলবাৰে বিধানসভাৰ বাজেট বিতৰ্কত অংশগ্ৰহণ কৰি এই কথা ঘোষণা কৰি মুখ্যমন্ত্ৰী ড° হিমন্ত বিশ্ব শর্মাই কয় যে 'অ' মোৰ আপোনাৰ দেশ' গাই দিলে বড়োৱেই হওক বা গোর্খাই হওক, কাৰো মনত একো বেলেগ ভাব নাহে।

এয়াই যুগদ্ৰষ্টাৰ অপূর্ব সৃষ্টি, য'ত জাতি-বর্ণ নির্বিশেষে সমাহিত হৈ পৰে সকলো। মুখ্যমন্ত্রীজনে লগতে এই বুলিও কয় যে বিহু আৰু ঝুমইৰৰ পাছত এইবাৰ বাগৰুম্বা আৰু বৰদৈচিখলাকো লৈ যোৱা হ'ব বিশ্ব মঞ্চলৈ। এইক্ষেত্ৰত উদাহৰণ দি মুখ্যমন্ত্রীজনে কয় যে অলপতে গুৱাহাটীত অনুষ্ঠিত ঝুমুইৰ বিনন্দিনী অনুষ্ঠান উপভোগ কৰি যোৱা ইউৰোপিয়ান ইউনিয়নৰ এম্বেছেডৰজনে শেহতীয়াকৈ দিল্লীত তেওঁক লগ কৰিব বিচৰাত তেওঁ যথেষ্ট আচৰিত হ'ল।

কাৰণ এজন মুখ্যমন্ত্ৰীৰ লগত এজন ৰাষ্ট্ৰদূতক লগ পোৱাৰ বিশেষ কোনো প্রয়োজন নাথাকে। অন্য সময়ত মুখ্যমন্ত্রীজনে তেওঁক লগ কৰাত ৰাষ্ট্ৰদূতজনে জনালে যে ঝুমুইৰ বিনন্দিনী উপভোগ কৰি তেওঁ ইমানেই অভিভূত হ'ল যে অনুষ্ঠানটোত অংশগ্ৰহণ কৰা যুৱক-যুৱতীসকলক অভিনন্দন আৰু ধন্যবাদ জনাবৰ বাবেহে ৰাষ্ট্ৰদূতজনে মুখ্যমন্ত্রী ড° শৰ্মাক সাক্ষাৎ কৰিব বিচাৰিছিল।

এয়াই নতুন অসমৰ আৰম্ভণি বুলি উল্লেখ কৰি মুখ্যমন্ত্রীজনে কয় যে এইখন নতুন অসমৰ চমকৰ বাবেই সততে বিজেপি চৰকাৰ আৰু প্রধানমন্ত্রী নৰেন্দ্ৰ মোদীক সমালোচনা কৰি অহা নিউয়র্ক টাইমছৰ দৰে বাতৰি কাকতে ক'ব লগা হৈছে যে বিশ্বৰ ৫২টা শ্রেষ্ঠ পর্যটন ডেষ্টিনেশ্যনৰ ভিতৰত অসমৰ স্থান চতুর্থ। মুখ্যমন্ত্রীজনে কয়, 'আমি এক নতুন অসম গঢ়িছোঁ। শেষ কৰিছোঁ সকলো সংঘাত। কংগ্রেছে মহকুমা সৃষ্টিৰ গইনা লৈ মৰাণ-নাহৰকটীয়াৰ মাজত কৃত্ৰিম যুদ্ধৰ সৃষ্টি কৰিছিল- আমি এই যুদ্ধবোৰ শেষ কৰিছোঁ।'

Share This