ভাৰতীয় সেনাই পাহৰিলে পথৰুঘাটৰ কৃষক শ্বহীদক

dainik janambhumi February 09, 2025

ডিজিটেল ডেস্ক: সশস্ত্র বাহিনী বিশেষ ক্ষমতা আইনখন প্রত্যাহাৰৰ ফলশ্রুতিত অসমৰ আন আন জিলাৰ লগতে দৰঙৰ পৰাও উগ্রপন্থী দমনৰ বাবে নিয়োজিত সেনা বাহিনী প্রত্যাহাৰ কৰা হয়। তাৰ পাছৰে পৰা যেন ভাৰতীয় সেনাই পাহৰি গ'ল পথৰুঘাটৰ কৃষক শ্বহীদসকলক। ২০০১ চনৰ পৰা ভাৰতীয় সেনাৰ ৰেড হর্নছ ডিভিজনে সামৰিক মর্যাদাৰে উদযাপন কৰি অহা কৃষক শ্বহীদ দিৱস এইবাৰ সেনা বাহিনীৰ উদ্যোগত অনুষ্ঠিত কৰা নহ'ল। 

উল্লেখ্য যে ১৮৯৪ চনৰ ২৮ জানুৱাৰীত দৰং জিলাৰ পথৰুঘাটত সংঘটিত ঐতিহাসিক কৃষক বিদ্রোহত অংশগ্ৰহণ কৰি ব্ৰিটিছৰ গুলীত প্রাণাহুতি দিয়া সাতকুৰি কৃষকৰ সোঁৱৰণত অসমৰ তদানীন্তন ৰাজ্যপাল লেফটেনেন্ট জেনেৰেল (অৱসৰপ্ৰাপ্ত) এছ কে সিনহাৰ বিশেষ উদ্যোগত জিলা প্রশাসনে আবণ্টন দিয়া ধনেৰে ভাৰতীয় সেনাই ২০০১ চনত পথৰুঘাটত নিৰ্মাণ কৰিছিল এটি সুদৃশ্য কৃষক শ্বহীদ স্মাৰক। তেতিয়াৰে পৰাই ভাৰতীয় সেনাৰ ৰেড হৰ্নছ ডিভিজনে প্ৰতি বছৰে সামৰিক মর্যাদাৰে কৃষক শ্বহীদ দিৱস উদযাপন কৰি আহিছিল। পথৰুঘাটৰ কৃষক বিদ্রোহ আৰু এই বিদ্রোহত অংশগ্রহণ কৰি প্ৰাণাহুতি দিয়া সাতকুৰি কৃষক শ্বহীদৰ সৰ্বোচ্চ বলিদানে ৰাষ্ট্ৰীয় স্বীকৃতি নাইবা ভাৰতৰ স্বাধীনতা সংগ্ৰামৰ ইতিহাসৰ পৃষ্ঠাত স্থান লাভ নকৰিলেও ভাৰতীয় সেনাই উদযাপন কৰি অহা কৃষক শ্বহীদ দিবসটিয়ে সমগ্ৰ দৰং জিলাবাসীক বিশেষভাৱে আকৰ্ষণ কৰি আহিছিল। 

সেনা বাহিনীয়ে পথৰুঘাটত নিৰ্মাণ কৰা কৃষক শ্বহীদ স্মাৰকটিয়েই হৈছে অসামৰিক লোকৰ স্মৃতিত সেনা বাহিনীয়ে নিৰ্মাণ কৰা ভাৰতৰ একমাত্ৰ স্মাৰক। ২৮ জানুৱাৰীৰ দিনটো ৰাইজে চৰকাৰ আৰু প্ৰশাসনৰ সহযোগত কৃষক শ্বহীদ দিৱস হিচাপে উদযাপন কৰি অহা বাবে সেনা বাহিনীয়ে ২৯ জানুৱাৰীৰ দিনটো কৃষক শ্বহীদ দিৱস হিচাপে বিগত তেইশ বছৰে উদযাপন কৰি আহিছিল। ২০২৩ চনৰ কৃষক শ্বহীদ দিৱসত ভাৰতীয় সেনাৰ ইষ্টার্ন কমাণ্ডৰ সেনাধ্যক্ষ লেফটেনেন্ট জেনেৰেল ৰাণা প্রতাপ কলিতাই মুখ্য অতিথি হিচাপে অংশগ্ৰহণ কৰাত দৰং জিলাবাসী আনন্দিত আৰু অনুপ্রাণিত হৈছিল। ২০২৪ চনৰ কৃষক শ্বহীদ দিৱসটো ভাৰতীয় সেনাৰ এটি ব্রিগেডৰ ব্রিগেড কমাণ্ডাৰ এগৰাকীয়ে অংশগ্ৰহণ কৰিছিল। কিন্তু অসমৰ কেইখনমান জিলাৰ পৰা সশস্ত্র বাহিনী বিশেষ ক্ষমতা আইনখন প্ৰত্যাহাৰ কৰাৰ লগে লগে দৰঙৰ পৰাও সেনা বাহিনী প্রত্যাহাৰ কৰাত পথৰুঘাটৰ কৃষক শ্বহীদ দিৱসটি উদযাপনৰ প্রতি ভাৰতীয় সেনাৰ উদাসীনতা আৰু নির্লিপ্ত মনোভাবৰ প্ৰতিফলন ঘটিল।কেৱল মাথোঁ স্মৃতি হৈ ৰৈ গ'ল সেনাই নিৰ্মাণ কৰা কৃষক শ্বহীদ স্মাৰকটি।

Share This