অনন্য নাৰীৰ ৰূপত উদ্ভাসিত ১৪ বিশিষ্ট মহিলাক 'প্রাগ প্ৰেৰণা সন্মান' প্রদান

dainik janambhumi March 09, 2025

ডিজিটেল ডেস্ক : 'আমি সকলোৱেই আমাৰ জীৱনত মহিলাৰ গুৰুত্ব উপলব্ধি কৰোঁ। । মহিলাসকল আমাৰ মাতৃ, আমাৰ কন্যা, আমাৰ বন্ধু এনেকৈ অসংখ্য ভূমিকা তেওঁলোকে আমাৰ জীৱনত পালন কৰে। মোৰ জীৱনৰ যিবোৰ সপোন আৰু সংকল্প, সেইবোৰ আগবঢ়াই লৈ যাব মোৰ ছোৱালীয়ে। তেৱোঁ এগৰাকী মহিলা। মই অত্যন্ত আত্মবিশ্বাসী যে তেওঁ সফলভাৱে মোৰ সপোনবোৰ আগবঢ়াই লৈ যাব।'- শনিবাৰে দশম প্ৰাগ প্ৰেৰণা সম্মান অনুষ্ঠানৰ আদৰণী ভাষণ আগবঢ়াই এইদৰেই কয় প্রাগ নিউজৰ চি এম ডি ড° সঞ্জীৱ নাৰায়ণে। তেওঁ লগতে কয় যে যেতিয়া প্রাগ নিউজ আৰম্ভ কৰিছিলোঁ তেতিয়া মই ষ্টাৰ টিভিৰ কাৰণে কাম কৰিছিলোঁ আৰু ষ্টাৰ টিভিত থাকোঁতেই ভাবিছিলোঁ অসমত যদি আমি নিজাকৈ চেনেল এটা খুলি লওঁ! ২০০০ চনত যেতিয়া অসমলৈ কেমেৰা আনিছিলোঁ তেতিয়া তদানীন্তন মুখ্যমন্ত্ৰী তৰুণ গগৈয়ে মোক সুধিছিল- এইটো কি হয়, ইয়াত ইণ্টাৰভিউ দিলে কি হ'ব, কেনেকৈ ওলাব? তেতিয়া আমি কিন্তু কেতিয়াও ভাবিব পৰা নাছিলোঁ যে এদিন টেলিভিছন উদ্যোগটো ইমান বিশাল উদ্যোগ হ'ব। আজি উল্লেখৰ প্ৰয়োজন নাই টেলিভিছন উদ্যোগে কি পর্যায় পালেহি। তাতোকৈ ডাঙৰ কথা এয়ে. যে এই উদ্যোগৰ বিকাশৰ যাত্ৰাত প্ৰাগ নিউজে ২৫ বছৰ সম্পূৰ্ণ কৰিলোঁ। 

উল্লেখযোগ্য যে আন্তর্জাতিক নাৰী দিৱসৰ লগত সংগতি ৰাখি বিভিন্ন ক্ষেত্ৰত 'জীৱনতকৈও বিশাল বৰঙনিৰে সমাজ জীৱনৰ লগতে জাতিটোক মহীয়ান কৰি তোলা ১৪গৰাকী বিশিষ্ট নাৰীক সন্মান জনাবলৈ অনুষ্ঠিত কৰা দশম প্ৰাগ প্ৰেৰণা সন্মান অনুষ্ঠানত আদৰণী ভাষণ আগবঢ়াই এইদৰেই কয় প্ৰাগ নিউজৰ চি এম জি ড° সঞ্জীৱ নাৰায়ণে। তেওঁ কয় যে যিসকল মহিলাই আজি এই সন্মান লাভ কৰিলে তেওঁলোকে আগবঢ়োৱা বৰঙনিৰ তুলনাত এইটো নিচেই সৰু সন্মান। তেওঁ লগতে প্ৰাগ নিউজৰ ২৫ বছৰীয়া যাত্ৰাত সহযোগী হোৱা সকলোকে আন্তৰিক ধন্যবাদ আৰু কৃতজ্ঞতা জনায়। টাই আহোমসকলৰ ধৰ্মীয় পৰম্পৰাৰ লগত জড়িত লাই লুংখা নৃত্যৰে আৰম্ভ হোৱা এই অনুষ্ঠানটো বন্তি প্রজ্বলনেৰে আনুষ্ঠানিকভাৱে মুকলি কৰে পদ্মশ্ৰী অনুৰাধা পড়োৱাল, ড° সঞ্জীৱ নাৰায়ণ, সাংস্কৃতিক বিভাগৰ মন্ত্ৰী বিমল বৰা, গুৱাহাটী লোক সভা সমষ্টিৰ সাংসদ বিজুলী কলিতা মেধি, মেঘালী নাৰায়ণ আৰু প্ৰাগ নিউজৰ মুখ্য সম্পাদক প্রশান্ত ৰাজগুৰুৱে। অনুষ্ঠানটোত উপস্থিত থাকি সাংসদ বিজুলী কলিতা মেধিয়ে কয় যে ভাৰতবৰ্ষত মহিলাসকল সদায়েই পূজনীয়। তেওঁ কয় যে আমি অতিশয় ভাগ্যৱান যে আমি যিখন ভূমিত জন্মগ্রহণ কৰিছোঁ সেইখন মা কামাখ্যাৰ ভূমি, সতী বেউলাৰ ভূমি। আমি মাত্ৰ নিজৰ ভিতৰত থকা শক্তিক চিনি পাব লাগে আৰু নিজক প্রতিষ্ঠিত কৰাত আত্মনিয়োগ কৰিব লাগে। অনুষ্ঠানটোত বিশিষ্ট অতিথি ৰূপে উপস্থিত থাকি মন্ত্রী বিমল বৰাই আন্তর্জাতিক নাৰী দিৱসৰ তাৎপর্য ব্যাখ্যা কৰি কয় যে আজিৰ দিনটো নতুন চিন্তাৰে, নতুন আংগিকেৰে নাৰী শক্তিক আগুৱাই নিয়াৰ দিন। আনহাতে, গ্রুপ প্রেছিডেন্ট ডাঃ অক্ষতা নাৰায়ণে অনুষ্ঠানত দিয়া ভাষণত 'প্রাগ নিউজ' তথা এ এম টেলিভিছনে মহিলাৰ শক্তিক দি অহা প্রাধান্যৰ বিষয়ে উল্লেখ কি কৰি কয় যে মহিলা সবলীকৰণতকৈ মহিলাৰ নেতৃত্বহে গুৰুত্বপূর্ণ।আহিবলগীয়া দিনবোৰত উন্নয়নৰ যাত্ৰাত মহিলায়েই নেতৃত্ব দিব বুলি তেওঁ আশা প্রকাশ কৰে। 

ইয়াৰ পাছতে 'ফিউচাৰ ইজ ফিমেল' টেগলাইনেৰে সজোৱা প্ৰাগ প্ৰেৰণা সন্মান প্ৰদান কৰা হয়। প্রথমতেই এই সন্মান গ্রহণ কৰে বিগত প্রায় ৪টা দশক ধৰি নাগাৰা নাম পৰিৱেশন কৰি অসমৰ লোক সংস্কৃতিক চহকী কৰা বৈজয়ন্তী নাথ তালুকদাৰে। এইগৰাকী মহিলাৰ নাগাৰা নামে দেশৰ বিভিন্ন স্থানতো সমাদৰ লাভ কৰাৰ উপৰি স্কটলেণ্ডৰ এটা প্রতিষ্ঠানে ৰেকৰ্ড কৰি গ্লাছগ' মিউজিয়ামতো সংৰক্ষণ কৰি ৰাখিছে, ইয়াৰ পাছতে এই সন্মান গ্রহণ কৰে জয়মতী কৃষি উৎপাদক গোটৰ যোগেদি ৪০০০ বিঘা মাটিত খেতি কৰি ৬৫০গৰাকী মহিলাক নাৰী সবলীকৰণৰ প্রকৃত অর্থত সমাজলৈ প্ৰেৰণ কৰা শোণিতপুৰৰ কৃষক কমল কুমাৰী বড়োৱে। বড়োৱে এই বঁটা গ্রহণ কৰি অহাবাৰ ১০০০গৰাকী মহিলাক কর্মসংস্থাপন দিয়াৰ প্ৰেৰণা লাভ কৰিলে বুলি মন্তব্য কৰে। অসমৰ ইমূৰৰ পৰা সিমূৰলৈ নৃত্য প্ৰদৰ্শন কৰি নৃত্যক এক সুকীয়া মাত্রা দিবলৈ সক্ষম হোৱা নৃত্য শিল্পী দীপালী শৰ্মা বৰদলৈক শনিবাৰে প্ৰদান কৰা হয় প্ৰাগ প্ৰেৰণা সন্মান। তেওঁ অসমৰ প্ৰথমগৰাকী মহিলা ৰূপসজ্জাকৰ হিচাপেও খ্যাতি লাভ কৰিছিল। শনিবাৰে প্ৰাগ প্ৰেৰণা সন্মান প্রদান কৰা হয় অভিনেত্ৰী, ৰাজনীতিক, অধ্যাপিকা, অসম চলচ্চিত্ৰ নিগমৰ প্ৰাক্তন অধ্যক্ষ, লেখক ববিতা শৰ্মাক। সেইদৰে শনিবাৰে অসমৰ অভিনেত্রী, লেখিকা, গীতিকাৰ জীমণি চৌধুৰীকো প্ৰাগ প্ৰেৰণা সন্মান প্রদান কৰা হয়। ইয়াৰ পাছতে এই সন্মান প্রদান কৰা হয় পাট-মুগাক বিশ্বত প্ৰতিষ্ঠা কৰা, নিজৰ সৃষ্টিৰাজিক পেৰিছৰ লগতে বিশ্বৰ বিভিন্ন দেশত বস্ত্ৰৰ আৰ্হি প্ৰদৰ্শন কৰি প্ৰশংসা বুটলিবলৈ সক্ষম হোৱা অঞ্জু বুঢ়াগোহাঁই, হাড়ে- হিমজুৱে অসমীয়া বুলি প্রতিষ্ঠা কৰা শিল্পী জয়া শীল, গায়িকা মনোজোৎস্না মহন্ত, নিজৰ সুৰীয়া কণ্ঠৰ বাবে কাৰ্বি আংলঙৰ লতা মংগেশকাৰ আখ্যা পোৱা পখিলা লেকথেপি, সূত্ৰধাৰ, অসমবাণীৰ পৰা অসমীয়া প্রতিদিনলৈকে সংগ্রামী যাত্রা অব্যাহত ৰাখি সাংবাদিকতাক এক সুকীয়া মাত্ৰা প্ৰদান কৰা স্বপ্না বেজবৰুৱা, কমনৱেলথ গেমছ, এছিয়ান লন বল চেম্পিয়নশ্বিপত সোণৰ পদক অর্জন কৰি লন বলক ৰাজ্য তথা দেশত জনপ্ৰিয় কৰি তোলা নয়নমণি শইকীয়া, এসময়ত পথৰ কাষত পাচলিৰ দোকান দি ফাষ্ট ফুড বিক্ৰী কৰি আৰু আজি বিশাল নাৰ্ছাৰী স্থাপন কৰি বহু ঠাইলৈ মুখ্য গছপুলি যোগানকাৰী 'নাইটকুইন নাৰ্ছাৰী'ৰ স্বত্বাধিকাৰী গীতাঞ্জলি শইকীয়া, সংগীতেই জীৱন আৰু নামেই পৰিচয় হৈ পৰা বিউটী শৰ্মা বৰুৱা আৰু প্ৰকৃতাৰ্থত নাৰী সবলীকৰণৰ ধ্বজাবাহক ৰাইডাৰ মীনাক্ষি দাসক। সকলো প্রাগ প্ৰেৰণা সন্মানপ্রাপকক এখন এৰী কাপোৰ, চেলেং চাদৰ, এখন বানকাঁহী, এটা ফুলৰ বুকে, অসমীয়া গহনা, হাতৰ চাপ আৰু প্ৰাগ প্ৰেৰণা ট্ৰফীৰে সন্মানিত কৰে প্ৰাগৰ চি এম ডি ড° সঞ্জীৱ নাৰায়ণ, মেঘালী নাৰায়ণ, মন্ত্রী বিমল বৰা আৰু সাংসদ বিজুলী কলিতা মেধিয়ে। ইফালে, শনিবাৰৰ এই অনুষ্ঠানতে কোকিলকণ্ঠী গায়িকা পদ্মশ্রী অনুৰাধা পড়োৱালক ড° সঞ্জীবৱ নাৰায়ণ, মেঘালী নাৰায়ণ আৰু প্ৰাগ নিউজৰ মুখ্য সম্পাদক প্রশান্ত ৰাজগুৰুৱে এখন গামোচা, চেলেং, এৰী চাদৰ, ফুলৰ বুকে, হাতৰ চাপ আদিৰে বিশেষ সন্মান প্রদান কৰে। দেশৰ বিশিষ্ট শিল্পীগৰাকীয়ে
নিজৰ সুৰীয়া কণ্ঠৰ যাদুৰে উপস্থিতসকলক মন্ত্রমুগ্ধ কৰি তোলে।

Share This