পুৰণিগুদাম কবি সন্মিলনৰ উদ্যোগত পুৰণিগুদাম আৰু চামগুৰি মহাবিদ্যালয়ৰ ছাত্ৰ-ছাত্ৰীলৈ কিতাপ উপহাৰ

Kakali Deka February 03, 2025

ডিজিটেল ডেস্কঃ আজি সৰস্বতী পূজা উপলক্ষে নগাঁও জিলাৰ পুৰণিগুদাম ড° বিৰিঞ্চি কুমাৰ বৰুৱা মহাবিদ্যালয় আৰু চামগুৰি মহাবিদ্যালয়ৰ একাংশ ছাত্ৰ-ছাত্ৰীৰ হাতত একোখনকৈ কিতাপ তুলি দি কিতাপৰ উৎসৱ পালন কৰে পুৰণিগুদাম কবি সন্মিলনে। লগতে এটা কিতাপৰ টোপোলা মহাবিদ্যালয়ৰ পুথিভঁৰাললৈ আগবঢ়ায়। 

পুৰণিগুদাম কবি সন্মিলনৰ সভাপতি নবীন কলিতা আৰু সম্পাদক হিৰণ্য কুমাৰ শৰ্মাৰ উদ্যোগত শিশু বন্ধু দুলাল বৰাই পুৰণিগুদাম ড° বিৰিঞ্চি কুমাৰ বৰুৱা মহাবিদ্যালয়ৰ অধ্যক্ষৰ হৈ উপাধ্যক্ষ ড° কমল শইকীয়া আৰু ড° অংকুৰ বণিয়াই আৰু চামগুৰি মহাবিদ্যালয়ৰ অধ্যক্ষৰ হৈ সহকাৰী অধ্যাপক দিলীপ কুমাৰ দাস, ৰফিকুল ইছলাম, কাৰ্যালয় সহায়ক তৰুণ বৰা আৰু মিণ্টু কমল দাসৰ হাতত দুষ্প্ৰাপ্য কিতাপৰ টোপোলা প্ৰদান কৰে। লগতে  জাতিৰ গৌৰৱ, দেশৰ গৌৰৱ ছাত্ৰ-ছাত্ৰীৰ হাতে হাতে একোখনকৈ কিতাপ তুলি দি কিতাপ পঢ়ি জগত চিনা আৰু কিতাপ জগত জিনাৰ আহ্বান জনায় শিশু বন্ধু দুলাল বৰাই। 

ভোটাই ডেকা গ্ৰন্থৰ লেখক নবীন কলিতাই হেম বৰুৱাৰ কথাৰে- "সৰস্বতী পূজা কৰি জ্ঞানী হ'বলৈ যত্ন কৰাতকৈ দুখন কিতাপ পঢ়াটো ভাল" বুলি কয়। লগতে আজি যি কেইগৰাকী ছাত্ৰ-ছাত্ৰীৰ হাতত কিতাপ তুলি দিয়া হৈছে তেখেতসকলে পঢ়ি শেষ হ'লে কিতাপখনৰ ওপৰত এটা চমু আলোচনাৰ টোকা লিখি মহাবিদ্যালয়ৰ অধ্যক্ষৰ ওচৰত জমা দিবলৈ কোৱাৰ লগতে পঢ়ি শেষ হোৱা কিতাপ আন এজন ছাত্ৰ বা ছাত্ৰী পঢ়াৰ ধাৰবাহিকতা ৰাখিবলৈ আহ্বান জনায়। কিতাপখনৰ ওপৰত ভাল চমু আলোচনা পালে কলেজৰ বাৰ্ষিক আলোচনী সম্পাদকে প্ৰকাশ কৰিব পাৰিব।

উৎস- প্ৰাগ নিউজ ডিজিটেল

Share This