কাৰ দখললৈ যাব ৰাভা হাছং স্বায়ত্তশাসিত পৰিষদ

Rashmi April 01, 2025

ডিজিটেল ডেস্ক : ২ এপ্ৰিল অৰ্থাৎ কাইলৈৰ পৰা অনুষ্ঠিত হ'ব ৰাভা হাছং স্বায়ত্তশাসিত পৰিষদৰ নিৰ্বাচন। কাইলৈ পুৱা ৭ বজাৰ পৰা আবেলি ৩ বজালৈ অনুষ্ঠিত হ'ব ভোটগ্ৰহণ প্ৰক্ৰিয়া। ৰাভা হাছং স্বায়ত্তশাসিত পৰিষদৰ মুঠ সমষ্টি হৈছে ৩৬টা।ইয়াৰে ২০টা সমষ্টি গোৱালপাৰা জিলাৰ অন্তৰ্গত আৰু ১৬টা সমষ্টি কামৰূপ জিলাৰ অন্তৰ্গত। এই নিৰ্বাচনত মুঠ ৪ লাখ ৪৫ হাজাৰ ৫৮৬গৰাকী ভোটাৰে ভোটদান সাব্যস্ত কৰিব।

ইতিমধ্যে ৰাভা হাছং স্বায়ত্তশাসিত পৰিষদৰ নিৰ্বাচনৰ ভোট গ্ৰহণৰ বাবে প্ৰস্তুতি প্ৰায় সম্পূৰ্ণ হৈ উঠা পৰিলক্ষিত হৈছে। ভোট গ্ৰহণ কেন্দ্ৰসমূহলৈ ৰাওনা হৈছে নিৰ্বাচনৰ কামত নিয়োজিত বিষয়া-কৰ্মচাৰীসকল। উল্লেখযোগ্য যে ৰাভা হাছং স্বায়ত্তশাসিত পৰিষদৰ নিৰ্বাচনৰ মনোনয়ন পৰ্ব আৰম্ভ হৈছিল ১৫ মাৰ্চত । 

ইফালে নিৰ্বাচনী প্ৰচাৰত বহু হাইপ্ৰফাইল নেতাই অংশ লোৱা দেখিবলৈ পোৱা যায়। এইবাৰ বিজেপিয়ে ৬ টা আৰু ৰাভা হাছং যৌথ মঞ্চই ৩০ টা সমষ্টিত প্ৰতিদ্বন্দ্বিতা কৰিছে। আনহাতে ৩৬ টা সমষ্টিৰ ভিতৰত ২৫ টা সমষ্টি জনজাতি লোকৰ বাবে সংৰক্ষিত। ৬ টা সমষ্টি মহিলাৰ বাবে সংৰক্ষিত হোৱাৰ বিপৰীতে ১১ টা সমষ্টি সংৰক্ষণমুক্ত। মুঠ ৬৩০ টা ভোট গ্ৰহণ কেন্দ্ৰত এই নিৰ্বাচনৰ ভোট গ্ৰহণ অনুষ্ঠিত হ'ব। ৪ এপ্ৰিলত হ'ব ৰাভা হাছং স্বায়ত্তশাসিত পৰিষদৰ ভোট গণনা।

Share This