ৰাহুল গান্ধীৰ উচটনিতে পাইকানত আৰক্ষীৰ ওপৰত চলিল আক্রমণ

dainik janambhumi July 18, 2025

ডিজিটেল ডেস্ক : গোৱালপাৰাৰ পাইকান সংবক্ষিত বনাঞ্চলত উচ্ছেদ চলাবলৈ যোৱাৰ সময়ত আৰক্ষীৰ ওপৰত চলোৱা আক্রমণৰ ঘটনা বুধবাৰে কংগ্রেছ নেতাসকলে দিয়া উচটনিৰ ফল বুলি বৃহস্পতিবাৰে প্রকাশ কৰিছে মুখ্যমন্ত্ৰী ড° হিমন্ত বিশ্ব শর্মাই। সামাজিক মাধ্যমত তেওঁ উল্লেখ কৰে যে ৰাহুল গান্ধী বুধবাৰে অসমলৈ আহিছিল আৰু মুকলিকৈ বেদখলকাৰীক বনভূমি দখল কৰিবলৈ উৎসাহিত কৰি গ'ল। তেওঁৰ অযুক্তিকৰ কথাৰ দ্বাৰা উৎসাহিত হৈ আজি পাইকান সংৰক্ষিত বনাঞ্চলত পুনৰ বলপূর্বক বেদখল কৰিবলৈ চেষ্টা চলাই থকা সময়ত হিংসাত্মক পন্থা অৱলম্বন কৰি এচামে আৰক্ষী আৰু বনকর্মীসকলক আক্রমণ কৰে। কৰ্তব্যৰত অৱস্থাত ২১জন সাহসী আৰক্ষী বিষয়া আৰু বনৰক্ষী গুৰুতৰভাৱে আঘাতপ্রাপ্ত হৈছে। বিকল্প ব্যবস্থা নোহোৱাৰ হেতু আৰক্ষীয়ে পৰিস্থিতি পুনৰুদ্ধাৰ কৰিবলৈ গুলীচালনা কৰিব লগা হৈছিল, যাৰ ফলত এজন বেদখলকাৰীৰ দুৰ্ভাগ্যজনকভাবে মৃত্যু হৈছিল। 

এয়া হৈছে ৰাহুল গান্ধীৰ এদিনীয়া অসম ভ্ৰমণৰ ধ্বংসাত্মক পৰিণাম। তেওঁৰ দায়িত্বজ্ঞানহীন বক্তব্যই আমাৰ ৰাজ্যৰ সমাজ জীৱনক পোনপটীয়াকৈ ব্যাঘাত জন্মাইছে আৰু শান্তি বিঘ্নিত কৰিছে। অসমৰ ৰাইজে এই বিশ্বাসঘাতকতাক কাহানিও নাপাহৰে আৰু ক্ষমা নকৰে বুলিও তেওঁ কয়। তেওঁ সংবাদ মাধ্যমৰ আগত কয় যে পাইকানত যে উচ্ছেদ হৈ গ'ল, এতিয়া গছ ৰোৱা কাৰ্যসূচী আৰম্ভ কৰা হ'ব। পাইকানত বৃক্ষৰোপণ কৰি মাটিখিনি বনাঞ্চললৈ ৰূপান্তৰ কৰাটো লক্ষ্য হ'ব। উচ্ছেদিত ৰাইজে আৰক্ষীৰ ওপৰত কৰা আক্ৰমণৰ প্ৰসংগত তেওঁ কয় যে আৰক্ষীক আক্ৰমণ কৰিলে গোচৰ হ'ব আৰু ব্যৱস্থাও হ'ব। বিজেপিৰ ৰাজ্যিক সভাপতি দিলীপ শইকীয়াই প্রতিক্রিয়া প্রকাশ কৰি কয় যে বেদখলকাৰী, আক্রমণকাৰীৰ বিৰুদ্ধে কঠোৰ ব্যৱস্থা হ'ব লাগে। ন্যায়ালয়ৰ নির্দেশ বা হুকুমত উচ্ছেদ কৰা হৈছে। সমাজ-বিৰোধী ৰাষ্ট্ৰ-বিৰোধীক উচ্ছেদ কৰা হৈছে। লোক সভাৰ বিৰোধী দলপতি তথা কংগ্ৰেছ নেতা ৰাহুল গান্ধীয়ে কালি অসমলৈ আহি মুখ্যমন্ত্রী ড° হিমন্ত বিশ্ব শর্মাক জে'ললৈ পঠিওৱাৰ যি ভাবুকি দিলে, তাৰ প্ৰত্যুত্তৰত আজি পুনৰ সৰৱ হৈ পৰিছে মুখ্যমন্ত্রী ড° শৰ্মা আৰু মন্ত্রী পীযূষ হাজৰিকা। 

মুখ্যমন্ত্রী ড° শর্মাই কংগ্রেছ নেতা ৰাহুল গান্ধীৰ প্ৰসংগত বৃহস্পতিবাৰে সংবাদ মাধ্যমৰ আগত কয়- 'জে'লত মোক পঠোৱাৰ আগতে নিজে যাবলগীয়া যে নহ'ব তাৰ কি গেৰাণ্টী আছে।' অসমত লাখ লাখ নিবনুৱাই সংস্থাপন লাভ কৰা নাই বুলি উল্লেখ কৰি ৰাজ্য চৰকাৰক কংগ্ৰেছ নেতাসকলে ভাষণত সমালোচনা কৰিছিল। এই সমালোচনাৰ প্ৰত্যুত্তৰত মুখ্যমন্ত্রী ড° শৰ্মাই কয় যে অসমৰ মানুহে জানে কিমান কাম কৰি থকা হৈছে। কোনোবাই ভাষণ এটা দিলেই ৰাইজৰ মৰমবোৰ নাইকিয়া হৈ নাযায়। চাকৰি দিয়া হৈছে নে নাই সেই কথা ৰাইজে জানে। এখন ৰাজ্যলৈ আহি ৰাষ্ট্ৰীয় নেতা এজনে এনেধৰণৰ ভাষণ দিয়াটো শোভা নাপায়। মুখ্যমন্ত্রীয়ে কয়-'মই তেওঁলোকৰ বাবে কিমান ইম্প'র্টেন্ট সেই কথা ভাষণত ওলাই পৰিছে।' মুখ্যমন্ত্রী ড° শৰ্মাৰ সুৰতে মন্ত্ৰী পীযূষ হাজৰিকাই ৰাহুল গান্ধীৰ বক্তব্যৰ প্ৰত্যুত্তৰত কয় যে বিষ নোহোৱা সাপৰ ফোঁচ-ফোঁচনি বেছি। অর্থহীন মানুহৰ কথাও বেছি। ওকণিৰ ভয়ত চুলি খুৰোৱা মানুহ মুখ্যমন্ত্রী হিমন্ত বিশ্ব শৰ্মা নহয়। অসমত চৰকাৰ গঠন কৰিবলৈ ৬৪খন আসনত জয়ী হ'ব লাগিব। যিটো কংগ্ৰেছৰ বাবে অসম্ভৱ বুলি মন্তব্য কৰে মন্ত্ৰী হাজৰিকাই।

Share This