ৰাজ্যত ইটোৰ পাছত সিটোকৈ সংঘটিত হৈছে কিশোৰী ধৰ্ষণৰ ঘটনা

Kakali Deka February 07, 2025

ডিজিটেল ডেস্কঃ  দুই পাষণ্ডৰ কামনা বলি হয় এগৰাকী ৮ বছৰীয়া কিশোৰী। উক্ত ঘটনাটো সংঘটিত হৈছে কাৰ্বি আংলং জিলাৰ বৰলাংফাৰত।
ধৰ্ষণকাৰী দুটা হৈছে লালবাবু ৰাম আৰু অজয় গোড়।

ঘটনা অনুসৰি, ৩ ফেব্ৰুৱাৰী অৰ্থাৎ সৰস্বতী পূজাৰ দিনা সন্ধিয়াৰ ভাগত স্কুলৰ পৰা লগৰীয়াৰ সৈতে ঘৰলৈ আহি থকা অৱস্থাত দুই পাষণ্ডই হাবিলৈ টানি নি ধৰ্ষণ কৰিছিল ৮ বছৰীয়া এগৰাকী কিশোৰীক। উক্ত ঘটনাৰ পাছতেই কিশোৰীগৰাকীৰ অৱস্থা গুৰুতৰ হোৱাত আদিবাসী ছাত্ৰ সন্থাৰ তৎপৰতাত আৰু স্থানীয় ৰাইজৰ সহযোগত কিশোৰী গৰাকীক ভৰ্তি কৰোৱা হয় ডিফু মেডিকেল কলেজ হস্পিটেল (DMCH)ত।

ঘটনাৰ পাছতেই কিশোৰীগৰাকীৰ পৰিয়ালে বৰলাংফাৰ আৰক্ষী থানাত দাখিল কৰিছিল এখন এজাহাৰ। কিন্তু বৰলাংফাৰ থানাৰ আৰক্ষীয়ে ঘটনাটোক লৈ এক ৰহস্যজনক ভূমিকা গ্ৰহণ কৰাৰ অভিযোগ উত্থাপিত হৈছে। দুই পাষণ্ডক ৰাইজে ধৰি আনি থানাত গতাই দিয়াৰ পাছতো অ' চি নথকাৰ বাবে দুয়োটাকে পঠিয়াই দিয়াৰো অভিযোগ কৰে আদিবাসী ছাত্ৰ সন্থাই।

লগে লগে ছাত্ৰ সংগঠনটোৰ নেতৃত্বই ফ'নযোগে গোটেই বিষয়টো জিলা আৰক্ষী অধীক্ষকক অৱগত কৰে আৰু
তাৰ পাছতেই আৰক্ষী অধীক্ষকগৰাকীৰ তৎপৰতাত তাৎক্ষণিকভাৱে দুই ধৰ্ষণকাৰীক গ্ৰেপ্তাৰ কৰি জে'ললৈ প্ৰেৰণ কৰে। সমান্তৰালভাৱে বৰলাংফাৰ আৰক্ষীৰ থানাৰ অ' চিজনকো তাৎক্ষণিকভাৱে বদলিৰ নিৰ্দেশ দিয়া হয়।
আৰক্ষী অধীক্ষকজনৰ এনে পদক্ষেপক শলাগ লোৱাৰ লগতে দুই পাষণ্ডক দৃষ্টান্তমূলক শাস্তিৰ দাবী জনাইছে স্থানীয় ৰাইজ তথা দল-সংগঠনে। উক্ত ঘটনাক লৈ জিলাখনত সৃষ্টি হৈছে তীব্ৰ চাঞ্চল্যৰ।

Share This