শংকৰ সংঘৰ অধিৱেশনত প্ৰদৰ্শিত হ'ব বাৰেচহৰীয়া ভাওঁনা

dainik janambhumi July 18, 2025

ডিজিটেল ডেস্কঃ জামুগুৰিহাটত উপ-সমিতিৰ সভাত সিদ্ধান্ত আগন্তুক ২০২৬ বৰ্ষৰ ৬-৮ ফেব্ৰুৱাৰীত শোণিতপুৰ জিলাৰ আতিথ্যত জামুগুৰিহাটৰ ধলাই বিলত অনুষ্ঠিত হ'ব লগীয়া উত্তৰ-পূৰ্বাঞ্চলৰ সৰ্ববৃহৎ ধর্মীয় অনুষ্ঠান শ্ৰীমন্ত শংকৰদেৱ সংঘৰ ৯৫সংখ্যক বার্ষিক অধিৱেশনক লৈ ইতিপূর্বে গঠন হোৱা মূল আদৰণী সমিতি আৰু ৩৫খন উপ-সমিতিয়ে নিজ নিজ দায়িত্ব গ্রহণ কৰি প্ৰস্তুতি আৰম্ভ কৰিছে।

 কালি বিয়লি ২ বজাৰ পৰা তিনিখনকৈ উপ-সমিতি ক্রমে প্রদর্শনী, গ্রন্থমেলা আৰু নিৰ্মাণ উপ- সমিতি, ৰন্ধন আৰু খাদ্য বিতৰণ উপ-সমিতি আৰু যান-বাহন নিয়ন্ত্রণ উপ-সমিতিৰ একোখনকৈ সভা জামুগুৰিহাটস্থিত শ্ৰীমন্ত শংকৰদেৱ সংঘৰ আঞ্চলিক নামঘৰত অনুষ্ঠিত হয়। সভাকেইখনত সভাপতিত্ব কৰে ক্ৰমে প্রদর্শনী উপ-সমিতিৰ সভাপতি বিশিষ্ট সমাজকৰ্মী তথা অৱসৰপ্ৰাপ্ত শিক্ষক নিতুমণি বৰা, খাদ্য বিভাগৰ সভাপতি শৈলেন শইকীয়া আৰু যান-বাহন নিয়ন্ত্রণ বিভাগৰ সভাপতি দেৱজিত শইকীয়াই। আঁত ধৰে সম্পাদক ক্রমে দীপাংকৰ বেজবৰুৱা, দুষ্মন্ত বৰা আৰু প্ৰাঞ্জল কলিতাই। সভাকেইখনত অংশগ্ৰহণ কৰে ক্ৰমে মূলৰ সাহিত্য আৰু গৱেষণা পৰিষদৰ সম্পাদক ড° মানস প্রতিম বৰা, জিলা সমিতিৰ সম্পাদক প্রদীপ ৰায়, আদৰণী সমিতিৰ উপ-সভাপতি ক্ষীৰ হাজৰিকা আৰু প্ৰধান সম্পাদক বিপুল বৰাই। উল্লেখযোগ্য যে সভাত অধিৱেশন সর্বাংগসুন্দৰ ৰূপত গঢ়ি তুলিবলৈ কেইবাগৰাকীও প্ৰস্তাৱ গ্ৰহণ কৰি অনুমোদনৰ বাবে জিলা আৰু মূল সমিতিলৈ প্ৰেৰণৰ সিদ্ধান্ত গ্রহণ কৰে। সেইমৰ্মে প্রদর্শনী বিভাগত এইবেলি শোণিতপুৰ জিলাৰ ঐতিহ্য প্ৰদৰ্শন মুখ্য বিষয় হিচাপে গ্রহণ কৰা হৈছে। এহেজাৰ কোঠাত প্রদর্শিত বিভিন্ন শিল্পকলা, থলুৱা উৎপাদিত সামগ্রী, হস্ততাঁত বস্ত্ৰ শিল্পকে ধৰি বিভিন্ন কলাৰে সজাই তোলাৰ লগতে মুকলি স্থানত জিলাখনৰ ঐতিহ্যবহনকাৰী জামুগুৰিহাটৰ বাৰেচহৰীয়া ভাওনাৰ মণ্ডপ, ঢেকীয়াজুলিৰ শ্বহীদ বেদী, ভাৰতৰ প্ৰথম ব্ৰিটিছৰ পতাকা নমাই জাতীয় কংগ্ৰেছৰ পতাকা উত্তোলন কৰা চতিয়াৰ আৰক্ষী থানা, কর্ম সংস্কৃতিক অপূর্ব নিদর্শন জামুগুৰিহাটস্থিত কন্যকা বহুমুখী পাম, জামুগুৰিহাটৰ বিখ্যাত চক্রবেহু আদি প্রদর্শিত হ'ব। তদুপৰি মাজুলীৰ মুখা শিল্প, শ্ৰীমন্ত শংকৰদেৱ কলাক্ষেত্ৰ, চৰকাৰী অনুষ্ঠান-প্রতিষ্ঠানৰ শিল্পকর্ম, বিভিন্ন জাতি-জনগোষ্ঠীৰ আপুৰুগীয়া সম্পদ আদিও প্ৰদৰ্শনৰ বাবে সভাত প্রস্তাব কৰা হয়। সভাত উক্ত বিষয়সমূহৰ ব্যাখ্যা দাঙি ধৰে প্ৰদৰ্শনী বিভাগৰ উপ-সভাপতি মিংকু কলিতাই। আনহাতে অধিবেশনত অধিক সেৱক-সেৱিকাৰ আগমন তথা জনসমাগমৰ প্ৰতি লক্ষ্য ৰাখি এইবেলি একেলগে পোন্ধৰ হাজাৰ সেৱকে আহাৰ গ্ৰহণৰ ব্যৱস্থা গ্রহণ কৰিব ৰন্ধন আৰু খাদ্য বিতৰণ উপ- সমিতিখনে। ইয়াৰ বাবে প্রয়োজনীয় তিনিশ চৌকাত তিনিশ ৰান্ধনিয়ে অহর্নিশে ৰন্ধন প্ৰকৰণ কাৰ্যত ব্ৰতী থাকিব। ঠিক সেইদৰে যান-বাহন নিয়ন্ত্রণ উপ-সমিতিখনেও কোনো কাৰণত যাতে যান-জঁটৰ সৃষ্টি নহয় তাৰ বাবে প্রয়োজনীয় ব্যৱস্থা গ্ৰহণৰ লগতে অন্যান্য কর্মসূচী প্ৰস্তুত কৰি মূল সমিতিলৈ অনুমোদনৰ বাবে প্ৰেৰণৰ সিদ্ধান্ত লয়।

Share This