ভতিজাকৰ বিয়া খাই শংকৰ সংঘৰ পৰা এঘৰীয়া হ'ল দুই ভাতৃ

dainik janambhumi March 23, 2025

ডিজিটেল ডেস্কঃ বৌদ্ধিক পংগুত্ব নে মানসিক নির্যাতন। ক্ৰমাৎ ইটোৰ পাছত সিটো বিতর্কত সাঙোৰ খাইছে শ্ৰীমন্ত শংকৰদেৱ সংঘ।

এইবাৰ নিজা ভতিজাকৰ বিয়াত উপস্থিত থকাৰ বাবে শ্ৰীমন্ত শংকৰদেৱ সংঘৰ পৰা এঘৰীয়া হ'ল দুগৰাকী খুড়াক। 

ঘটনাটো সংঘটিত হৈছে গহপুৰ সম-জিলাত। ১ নং ডলা প্রাথমিকৰ সংগী দুগৰাকী ভাতৃৰ অভিযোগ অনুসৰি শ্ৰীমন্ত শংকৰদেৱ সংঘৰ ১ নং ডলা প্রাথমিকৰ বিৰুদ্ধে। ভতিজাক বিতোপন ভূঞাৰ বিয়ালৈ যোৱাৰ বাবেই শংকৰ সংঘৰ পৰা এঘৰীয়া কৰিলে দিনৌ ভূঞা আৰু শিৱ ভূঞা নামৰ দুই ভাতৃক। 

জানিব পৰা মতে, দিনৌ ভূঞা আৰু শিৱ ভূঞা হৈছে শংকৰ সংঘৰ ১ নং ডলা প্রাথমিকৰ সদস্য। শিৱ ভূঞাৰ মৃত খুড়াক যোগেশ্বৰ ভূঞাৰ এক মাহৰ পূৰ্বে মৃত্যুৰ সংস্কাৰৰ কামখিনিও কৰি নিদিয়াৰ অভিযোগ উত্থাপন হৈছে উক্ত প্রাথমিকখনৰ বিৰুদ্ধে। তদুপৰি দিনৌ ভূঞাই সংস্কাৰৰ বাবে ঘৰলৈ নিমন্ত্ৰণ দিছিল উক্ত প্রাথমিকৰ কেইজনমান ভকতক। সেই ভকতকেইজনেও নিমন্ত্ৰণ ৰক্ষা কৰিলে যদিও মা-প্রসাদ গ্রহণ নকৰি দিনৌ ভূঞাক অপমান কৰি গুচি যায়। যাৰ বাবে এতিয়া মুকলিভাৱে শংকৰ সংঘ ত্যাগ কৰি পুনৰ বৈদিক বৈষ্ণৱ সমাজলৈ ঘূৰি আহিছে দুই ভাতৃয়ে।

 এতিয়া প্রশ্ন হয় ধৰ্মৰ নামত একাংশ ব্যক্তিয়ে এনেধৰণৰ অর্থহীন নীতি-নিয়ম ৰচনাৰে কিছু সাধাৰণ শ্ৰেণীৰ ৰাইজক মানসিক নির্যাতন চলোৱা নাইনে? 

উল্লেখযোগ্য যে ৰাজ্যখনৰ বৌদ্ধিক সমাজত সম্প্রতি অতি চর্চিত শ্ৰীমন্ত শংকৰদেৱ সংঘৰ সংবিধানত সঁচাকৈয়ে মানৱতা বিৰোধী মতাদর্শ বা নীতি-নিয়ম সন্নিৱিষ্ট কৰা হৈছে নেকি? মহাপুৰুষ শ্ৰীমন্ত শংকৰদেৱ গুৰুজনাৰ একশৰণ নামধৰ্মৰ দৰ্শনে এনে কথাবোৰকেই সূচায় নেকি আদি অনেক বিষয়ৰ সম্পৰ্কে আলোচনা কৰা দেখিবলৈ পোৱা গৈছে। 

আচলতে শ্ৰীমন্ত শংকৰদেৱ সংঘৰ সংবিধানক দোহাই একাংশই এনে মানৱতাহীন, সমাজবিৰোধী কেতবোৰ নীতি-নিয়ম সমাজত প্ৰতিষ্ঠা কৰিবলৈ প্ৰয়াস কৰাৰ অপচেষ্টা কৰিছে নেকি বুলিও বৌদ্ধিক সমাজত প্রশ্ন উত্থাপন হৈছে। আচলতে ধর্মীয় নীতি-আদর্শক অচিলা হিচাপে লৈ ভাৰতীয় সংবিধানক বৃদ্ধাংগুষ্ঠ দেখুৱাইছে নেকি বাৰু একাংশ ধর্মানুষ্ঠানে?

Share This