মধ্যাহ্ন ভোজনত এইবাৰ স্বাস্থ্যসন্মত পানীয়

Dainik janambhumi February 06, 2025

ডিজিটেল ডেস্ক: মধ্যাহ্ন ভোজনত দাইল, ভাত, কণীয়েই নহয়, এইবাৰ শিক্ষার্থীয়ে খাবলৈ পাব এবিধ বিশেষ পানীয়। বিদ্যালয়লৈ আহি প্ৰাৰ্থনা কৰাৰ পাছত অৰ্থাৎ শ্ৰেণী আৰম্ভ হোৱাৰ আগত এবিধ বিশেষ পানীয় পান কৰোৱা হ'ব শিক্ষার্থীসকলক। এই চাউলৰ গুড়ি, ৰাগীৰ গুড়ি, চর্বিবিহীন চয়াবিন, হালধি, নিমখ, ডালচেনি পাউদাৰ আৰু গুড়ৰ মিশ্রণেৰে প্ৰস্তুত কৰা বিশেষ পানীয়বিধ শিক্ষার্থীয়ে পান কৰিবলৈ যোগান ধৰিব সমগ্র শিক্ষাই। উল্লেখযোগ্য যে শিক্ষার্থীৰ পুষ্টিসাধনৰ বাবে পি এম পোষানৰ অধীনত ইতিমধ্যে বিভিন্ন পুষ্টিৰ খাদ্যৰ তালিকাৰে মধ্যাহ্ন ভোজনৰ ব্যৱস্থা কৰা হৈ আহিছে চৰকাৰী শিক্ষানুষ্ঠানত। পুষ্টিকৰ খাদ্যৰ এই তালিকাত ইতিমধ্যে কণীও সংযোজন কৰা হৈছে। কর্ণাটকৰ শ্রীসত্য সাই অন্নপূর্ণা ট্রাষ্টৰ সহযোগত অসমৰ চাহ বাগিচা আৰু অনুসূচিত জাতি অধ্যুষিত অঞ্চলত পি এম পোষানৰ অধীনত সামৰি লোৱা বিদ্যালয়ৰ ছাত্ৰ-ছাত্ৰীক ছাইছুৰ ৰাগী মাল্টি-নিউট্রিয়েন্ট হেলথ ড্রিংক পৰিৱেশনৰ বাবে এটা পাইলট প্রজেক্ট ইতিমধ্যে আৰম্ভ হৈছে। স্বাস্থ্যৰ বাবে পুষ্টিকৰ পানীয় পৰিৱেশনৰ পাইলট প্রকল্পটো চলিত বছৰৰ ৩১ মাৰ্চলৈকে পি এম পোষান চলি থকা প্ৰতিখন বিদ্যালয়ৰ প্ৰতিগৰাকী শিক্ষাৰ্থীক সামৰি লোৱা হ'ব। প্ৰতিগৰাকী শিক্ষার্থীক প্ৰাৰ্থনাৰ পাছত বা শ্ৰেণী আৰম্ভ হোৱাৰ আগত ২৫০ মিলিলিটাৰকৈ এক গিলাচকৈ ছাইছুৰ ৰাগী মাল্টি-নিউট্রিয়েন্ট হেলথ ড্রিংক পানৰ ব্যৱস্থা কৰিব। শৈক্ষিক দিনপঞ্জীৰ সূচীৰ সময়ৰ ভিতৰত মধ্যাহ্ন ভোজনৰ লগতে এতিয়াৰে পৰা বিশেষ পানীয় পৰিৱেশনৰ তদাৰক কৰা আৰু পান কৰাৰ বাবে শিক্ষক-শিক্ষার্থী ব‍্যস্ত থাকিব লাগিব।

সমগ্র শিক্ষাৰ মিছন সঞ্চালকে ইতিমধ্যে জিলা মিছন সমন্বয়কসকললৈ লিখা পত্রত এই বিশেষ পানীয়বিধ শিক্ষার্থীক পান কৰাবলৈ কেতবোৰ নীতি-নির্দেশনা জাৰি কৰিছে। মধ্যাহ্ন ভোজনৰ বাবে নিয়োজিত ৰান্ধনি আৰু সহায়িকাসকলে পানীয়বিধ পৰিৱেশনৰ ১৫ৰ পৰা ৩০ মিনিট আগতে প্রস্তুত কৰিব লাগিব। বিদ্যালয়সমূহে ছাইছুৰ ৰাগী মাল্টি-নিউট্রিয়েন্ট হেলথ ড্রিংক পৰিৱেশনৰ আগতে কোনো শিক্ষক, ৰান্ধনি, সহায়িকা বা মাতৃ গোটৰ সদস্যই ছাত্র-ছাত্রীসকলক পৰিৱেশন কৰাৰ আগতে পানীয় বিধৰ সোৱাদ ল'ব লাগিব। বিদ্যালয়সমূহে নিজ নিজ শিক্ষা খণ্ডৰ কাৰ্যালয়ৰ পৰা আবণ্টিত পৰিমাণৰ ছাইছুৰ ৰাগী মাল্টি-নিউট্রিয়েন্ট হেলথ পাউদাৰ আৰু গুড় সংগ্রহ কৰি পৰিষ্কাৰ-পৰিচ্ছন্নভাৱে মজুত কৰাটো নিশ্চিত কৰিব লাগিব আৰু সামগ্ৰীসমূহ কীট-পতংগৰ পৰা সুৰক্ষিত কৰি ৰাখিব লাগিব। 

উল্লেখযোগ্য যে এশগৰাকী শিক্ষাৰ্থীৰ বাবে বিশেষ পানীয়বিধ প্রস্তুত কৰিবলৈ ২৫ লিটাৰ খোৱা পানী, এক কেজি ৰাগী আৰু এক কেজি গুড়ৰ প্ৰয়োজন হ'ব। ছাইছুৰ ৰাগী মাল্টি-নিউট্রিয়েন্ট হেলথ পাউদাৰ আৰু গুড় সংগ্ৰহ কৰিবলৈ বিদ্যালয়সমূহলৈ পৰিবহণ ব্যয় মুকলি কৰিব সমগ্র শিক্ষাই। অর্থাৎ চৰকাৰী খণ্ডৰ বিদ্যালয়ৰ শিক্ষক, শিক্ষার্থী, ৰান্ধনি, সহায়িকা, মাতৃগাটে শিক্ষাদানতকৈ মধ্যাহ্ন ভোজনে নহয় এতিয়াৰ পৰা বিশেষ পানীয় পৰিৱেশনতো ব্যস্ত থাকিব লাগিব। কাৰণ বিশেষ পানীয়বিধ পান কৰাৰ প্ৰায় তিনি ঘণ্টাৰ পাছত শিক্ষার্থীয়ে খাবলৈ পাব তালিকা অনুসৰি মধ্যাহ্ন ভোজন। সমগ্ৰ শিক্ষাৰ মিছন সঞ্চালকে দিয়া নির্দেশনাত বিদ্যালয়সমূহৰ প্ৰধান শিক্ষক অধ্যক্ষ আৰু ৰান্ধনি, সহায়িকাসকলৰ ছাইছুৰ ৰাগী পুষ্টিকৰ স্বাস্থ্য পানীয় প্ৰস্তুত কৰাৰ পদ্ধতিৰ ওপৰত আগতীয়াকৈ প্রশিক্ষণ কার্যসূচী আয়োজন কৰিবলৈ কোৱা হৈছে। নিজ নিজ শিক্ষা খণ্ডৰ পৰা ছাইছুৰ ৰাগী মাল্টি-হেলথ পাউদাৰ আৰু গুড় সংগ্ৰহ কৰি ছাইছুৰ ৰাগী মাল্টি-নিউট্রিয়েন্ট হেলথ ড্রিংক পৰিৱেশনৰ পাইলট প্রজেক্ট ৰূপায়ণ কৰিবলৈ পি এম পোষানৰ অধীনৰ বিদ্যালয়সমূহক নির্দেশ দিবলৈ শিক্ষা খণ্ড বিষয়া তথা জিলা সমন্বয়কসকলক নির্দেশ দিয়া হৈছে। সমগ্র শিক্ষাই গুণোৎসৱ অনুষ্ঠিত কৰি শৈক্ষিক বিকাশ কৰাই নহয় বিনামূলীয়ৰ পাঠ্যপুথি, ইউনিফর্ম, মধ্যাহ্ন ভোজনত ভাত, দাইল, কণী আদি পৰিৱেশন কৰাই নহয়, এতিয়া বিশেষ পানীয়ৰ ব্যৱস্থাও কৰিছে।

Share This