উৰিয়ামঘাটৰ উচ্ছেদিত স্থানত পুলি ৰোপণ কাৰ্যসূচীৰ শুভাৰম্ভ

dainik janambhumi August 10, 2025

ডিজিটেল ডেস্ক : ৰেংমা নদীৰ উৰিয়াম গছৰ কাষত থকা ঘাটৰ নামেৰে নামকৰণ হোৱা উৰিয়ামঘাটক পুনৰ প্ৰাকৃতিক সেউজীয়া আৱৰণলৈ ঘূৰাই অনাৰ এক পদক্ষেপ হিচাপে শনিবাৰে উৰিয়ামঘাটৰ সোণাৰিবিলত এক বৃহৎ গছপুলি ৰোপণ কাৰ্যসূচীৰ শুভাৰম্ভ কৰা হয়। উল্লেখযোগ্য যে যোৱা ২৯ জুলাইৰ পৰা ৩ আগষ্টলৈকে উৰিয়ামঘাট সীমান্তৰ ৰেংমা বনাঞ্চল আৰু দক্ষিণ নামবৰ বনাঞ্চলত উচ্ছেদ অভিযান চলোৱা হৈছিল। এই অভিযান কালত সন্দেহজনক লোকে বনাঞ্চল ধ্বংস কৰি দখল কৰি ৰখা প্রায় ১০ হাজাৰ বিঘা বেদখলমুক্ত কৰা হৈছিল। এই বেদখলমুক্ত ভূমি পুনৰ সেউজীয়া কৰাৰ লক্ষ্যৰে শনিবাৰে সোণাৰিবিল অঞ্চলত বৃক্ষৰোপণ আৰম্ভ কৰে উচ্ছেদ অভিযানৰ সন্মুখত থাকি নেতৃত্ব লোৱা বিশেষ মুখ্য সচিব এম কে যাদবে। এই উচ্ছেদ 'উৰিয়ামঘাট উচ্ছেদ' নামেৰে চিহ্নিত হোৱাৰ শনিবাৰে প্ৰথমে উৰিয়াম গছৰ পুলি ৰোপণ কৰা হয়। 

কেইবাটাও ব্লকত ভগাই লোৱা এই গছপুলি ৰোপণ কাৰ্যসূচীৰ শনিবাৰে প্রথম ব্লকত ১৫ হাজাৰ কেৱল উৰিয়াম গছৰ পুলিহে ৰোপণ কৰা হয়। অহা ২৩ ছেপ্টেম্বৰলৈকে চলিব লগা এই বৃক্ষৰোপণ কাৰ্যসূচীত মুঠ ৬০ হেক্টৰ ভূমিত মূল্যৱান গছপুলি ৰোপণ কৰা হ'ব। তাৰ পাছত পুনৰ অহা বছৰ ফেব্ৰুৱাৰী-মাৰ্চ মাহত ৰেংমা বনাঞ্চলত বেদখলমুক্ত স্থানত গছপুলি ৰোপণ কৰা হ'ব বুলি বিশেষ মুখ্য সচিব এম কে যাদৱে জানিবলৈ দিয়ে। তদুপৰি তেওঁ এই গছপুলিসমূহ সংৰক্ষণ আৰু সংবর্ধনৰ বাবে স্থানীয় জনজাতি লোকসকলক লৈ যুটীয়া বন পৰিচালনা সমিতি গঠন কৰাৰ পোষকতা কৰে। অৱশ্যে তেওঁ মুখ্যমন্ত্রী ড° হিমন্ত বিশ্ব শর্মাই দিয়া পৰিকল্পনা আৰু আদেশ মতে কাম কৰি যাব বুলি মন্তব্য কৰে। তেওঁ উৰিয়ামঘাট উচ্ছেদৰ সময়ত চুবুৰীয়া ৰাজ্য নগালেণ্ডৰ প্ৰশাসনে কৰা সহযোগিতা কেতিয়াও পাহৰি নাযায় বুলি অৱগত কৰে। তেওঁ ৰেংমা বনাঞ্চলখন এখন পর্যটন ক্ষেত্রলৈ উন্নীত কৰিবৰ বাবেও চেষ্টা কৰিব বুলি জানিবলৈ দিয়ে। এই ক্ষেত্ৰত তেওঁ আশা কৰে যে স্থানীয় ৰাইজ, দল-সংগঠনৰ সহযোগিতা লাগিব। 

শনিবাৰৰ বৃক্ষৰোপণ কাৰ্যসূচীত অংশগ্ৰহণ কৰি গোলাঘাট জিলা আয়ুক্ত পুলক মহন্তই কয় যে পূর্বে উৰিয়ামঘাট সীমান্তৰ যি দুর্নাম আহিল সেই দুর্নাম নাইকিয়া কৰি 'ৰেংমা সংৰক্ষিত বনাঞ্চল'ৰ ঠাইত সেউজী ধৰণীৰ 'ৰেংমা বনাঞ্চল' কৰি তোলাৰ মানসেৰে সকলোকে আগবাঢ়ি আহিবলৈ আহ্বান জনায়। ইয়াত থকা সোণাৰিবিলক পর্যটন ক্ষেত্র হিচাপে গঢ়ি তুলিবলৈ আহ্বান জনাই জিলা আয়ুক্তগৰাকীয়ে কয় যে নগা পাহাৰৰ কাষত থকা সোণাৰিবিলক যদি পৰ্যটনৰ ক্ষেত্ৰ হিচাপে গঢ়ি তুলিব পৰা যায় তেতিয়া দেশ- বিদেশৰ পৰিভ্ৰমী চৰাই ইয়ালৈ আহিব আৰু এক সুন্দৰ পর্যটন ক্ষেত্র হিচাপে চিহ্নিত হ'ব। তেওঁ পুনৰ কয় যে উৰিয়ামঘাটৰ পূৰ্বে যি মর্যাদা আৰু ঐতিহ্য আছিল সি পুনৰ ঘূৰি আহক আৰু ৰেংমা বনাঞ্চল পুনৰ সেউজীয়া হৈ উঠক। শনিবাৰৰ কাৰ্যসূচীত আৰক্ষী অধীক্ষক ৰাজেন সিং, অতিৰিক্ত প্রধান মুখ্য বন সংৰক্ষক, চি আৰ পি এফৰ ডি আই জি, অসম বন বিভাগ, জিলা প্রশাসন, অসম আৰক্ষী আৰু চি আৰ পি এফৰ উচ্চপদস্থ বিষয়াৰ লগতে স্থানীয় দল-সংগঠন, জনগোষ্ঠীয় লোকসকল উপস্থিত আছিল।

Share This