১০৫ কোটি টকাৰ বিলাসী হোটেল নিৰ্মাণ কৰিব এছ এন গ্ৰুপ অব্ কম্পেনীজে

Dainik janambhumi February 27, 2025

ডিজিটেল ডেস্কঃ এডভাণ্টেজ আছাম ২.০ৰ দ্বিতীয় দিনাও এছ এন গ্রুপ অব্ কম্পেনীজে অসম চৰকাৰৰ সৈতে এক বুজাবুজিৰ চুক্তি সম্পাদন কৰে। বুধবাৰে প্রতিষ্ঠানটোৱে গুৱাহাটীত এখন বিলাসী হোটেল নিৰ্মাণৰ বাবে ১০৫ কোটি টকা বিনিয়োগ কৰাৰ বাবে বুজাবুজিৰ চুক্তি কৰে। লক্ষণীয় যে মঙলবাৰে স্বাস্থ্য খণ্ডৰ অধীনত যোৰহাট আৰু গুৱাহাটীত দুখন চিকিৎসালয় নিৰ্মাণৰ বাবে ৩৮০ কোটি টকা বিনিয়োগ কৰিবলৈ চৰকাৰৰ সৈতে এছ এন গ্রুপ অব্ কম্পেনীজে বুজাবুজিৰ চুক্তি কৰিছিল।

বুধবাৰে পর্যটন খণ্ডত তৃতীয়খন বুজাবুজি চুক্তি সম্পাদন কৰে। এই চুক্তি অনুসৰি বেলতলাত এখন বিলাসী হোটেল নিৰ্মাণ কৰা হ'ব। এই প্ৰকল্পৰ বাবে ১০৫ কোটি টকা বিনিয়োগ কৰাৰ চুক্তি হয়। অসমৰ পৰ্যটন মন্ত্রী ৰঞ্জিত কুমাৰ দাসৰ সৈতে এছ এন গ্ৰুপৰ স্বত্বাধিকাৰী সঞ্জীৱ নাৰায়ণে এই বুজাবুজি চুক্তিত স্বাক্ষৰ কৰে। প্রণিধানযোগ্য যে এডভাণ্টেজ আছাম ২.০ৰ আজিৰ অনুষ্ঠানত অসমৰ পৰ্যটনক সৰ্বঋতুৰ সৈতে সহমতেৰে আগুৱাই নিয়াৰ ক্ষেত্ৰত এখন বৈঠক অনুষ্ঠিত হয়। এই বৈঠকত মুখ্য বক্তা হিচাপে অংশগ্রহণ কৰে কেন্দ্ৰীয় চৰকাৰৰ পৰ্যটন বিভাগৰ প্ৰাক্তন সচিব তথা হোটেল এছ'চিয়েশ্যন অব্ ইণ্ডিয়াৰ মহাসচিব মদন প্রসাদ বেজবৰুৱাই।

তেওঁৰ উপৰি আন্দামান নিকোবৰ প্ৰশাসনৰ মুখ্য সচিব ড° চন্দ্ৰ ভূষণ কুমাৰ, ইজিডিনাৰ আৰু দ্য প'ষ্টকার্ড হোটেলৰ প্ৰতিষ্ঠাপক কপিল চোপ্রা, ইণ্ডিয়ান এছ'চিয়েশ্যন অব্ ট্যুৰ অপাৰেটৰৰ সভাপতি ৰাজীৱ মেহৰা, ভাৰতীয় গ'ল্‌ফ পৰ্যটন সংস্থাৰ সভাপতি ৰঞ্জন ছেহগল আৰু হৰিজন ট্যুৰ প্রাইভেট লিমিটেডৰ অধ্যক্ষ সঞ্জয় বসুৰ লগতে মন্ত্ৰী ৰঞ্জিত দাস উপস্থিত থাকে।

Share This