বাঁহৰ দলঙেৰে যাতায়াত শিক্ষাৰ্থীৰ

dainik janambhumi August 09, 2025

ডিজিটেল ডেস্ক : মুখ্যমন্ত্রী ড° হিমন্ত বিশ্ব শর্মা নেতৃত্বাধীন বিজেপি চৰকাৰে গ্ৰামাঞ্চলৰ উন্নয়নৰ দিনে-নিশাই ঢাক-ঢোল বজাই আঁচনি ঘোষণা কৰি কোটি কোটি টকা মোকলাই দিয়াৰ পিছতো নৱগঠিত টিহু বিধানসভা সমষ্টিৰ ৩৫ নং পশ্চিম নামবৰভাগ গাঁও পঞ্চায়তৰ অন্তৰ্গত বালি গাঁৱৰ কৈহাটিপাৰাত এতিয়াও অব্যাহত আছে বাঁহৰ
দলঙেৰে যাতায়াত ব্যৱস্থা। মৰাপাগলাদিয়া নদীৰ ওপৰত থকা এই বাঁহৰ দলংখনেই হৈছে উত্তৰ বালি আৰু কৈহাটিপাৰাৰ একমাত্র সংযোগী যাতায়াত ব্যৱস্থা। 

এই দলংখন পাৰ হৈ যাব লাগে কৈহাটিপাৰাৰ ছাত্ৰ-ছাত্ৰীসকলে বালি হাইস্কুল শিয়ালমাৰীলৈ। আকৌ শিয়ালমাৰী, পামৈপাৰা, ৰতনপুৰ, উত্তৰবালি, বড়ো চুবুৰি আদিৰ ৰাইজে উক্ত বাঁহৰ দলংখন পাৰ হৈ নদলা, চামতা, সাহপুৰ, কৈঠালকুছি আদিলৈ বজাৰ-সমাৰ কৰিবলৈ অহা-যোৱা কৰে। বৃহত্তৰ অঞ্চলৰ ছাত্ৰ-ছাত্ৰীৰ লগতে কৃষক ৰাইজৰ বাবে অতি গুৰুত্বপূৰ্ণ এই বাঁহৰ দলংখন। 

তৎসত্ত্বেও আজিলৈকে জনপ্রতিনিধি আৰু বিভাগীয় বিষয়া-কৰ্মচাৰীৰ মইমতালিৰ বাবেই ৰাইজে বাঁহৰ দলঙেৰে অব্যাহত ৰাখিব লগা হৈছে যাতায়াত ব্যৱস্থা। সেয়েহে স্থানীয় ৰাইজে নৱগঠিত টিহু সমষ্টিৰ দায়িত্বত থকা অসম চৰকাৰৰ জ্যেষ্ঠ তথা কেবিনেট মন্ত্রী চন্দ্রমোহন পাটোৱাৰীক এখন পকী দলং নির্মাণ কৰি যাতায়াত ব্যৱস্থা সুচল কৰিবলৈ আহ্বান জনাইছে।

Share This