নিজৰাপাৰত সুধাকণ্ঠৰ ভাতৃ সমৰ হাজৰিকা-পৰিয়ালক সাক্ষাৎ সোণোৱালৰ

dainik janambhumi July 27, 2025

ডিজিটেল ডেস্ক : কেন্দ্ৰীয় মন্ত্রী সৰ্বানন্দ সোণোৱালে শনিবাৰে গুৱাহাটীৰ নিজৰাপাৰস্থিত সুধাকণ্ঠ ড° ভূপেন হাজৰিকাৰ বাসগৃহত জন্ম শতবর্ষ উদ্যাপনৰ পূৰ্বে উপস্থিত হৈ মহান শিল্পীগৰাকীৰ প্ৰতি শ্রদ্ধাঞ্জলি জ্ঞাপন কৰে। কেন্দ্ৰীয় মন্ত্রী সর্বানন্দ সোণোৱালে সুধাকণ্ঠৰ ভাতৃ সমৰ হাজৰিকা আৰু পৰিয়ালক দেখা কৰি বাৰ্তালাপ কৰাৰ লগতে পুৰণি দিনৰ স্মৃতি ৰোমন্থন কৰে। 

কেন্দ্ৰীয় মন্ত্ৰী সৰ্বানন্দ সোণোৱালে শনিবাৰে কয়, 'ভাৰত ৰত্ন ড° ভূপেন হাজৰিকাৰ অমৰ সৃষ্টিৰাজি ভাৰতবাসীৰ বাবে এক অমূল্য সম্পদ। অসমীয়া জাতিৰ সাংস্কৃতিক পৰিচয়ক বিশ্ব মঞ্চত চিনাকি কৰাই দিয়া সুধাকণ্ঠৰ জন্ম শতবর্ষ উদ্যাপনৰ পূৰ্বে আজি গুৱাহাটীৰ নিজৰাপাৰস্থিত বাসগৃহত উপস্থিত হৈ ড° হাজৰিকাৰ ভাতৃ সমৰ হাজৰিকা আৰু পৰিয়ালবৰ্গক দেখা কৰি বহু মধুৰ স্মৃতি ৰোমন্থন কৰোঁ। ভূপেনদাৰ এইবাৰ জন্ম শতবর্ষ। এই অনুষ্ঠান বৰ্ষজোৰা অনুষ্ঠানেৰে উদ্যাপন কৰা হ'ব। ভূপেনদাৰ জন্ম শতবৰ্ষৰ উদ্যাপনত প্রধানমন্ত্রী নৰেন্দ্ৰ মোদীয়ে মুখ্য অতিথি হিচাপে অংশগ্রহণ কৰিব। ভূপেনদাক 'ভাৰত ৰত্ন' সন্মানেৰে বিভূষিত কৰি মোদী চৰকাৰে উচিত সন্মান প্রদর্শন কৰিলে আৰু অসমীয়া জাতিৰ আৱেগ-অনুভূতিৰ প্ৰকৃত মূল্যায়ন কৰিলে। মানৱতাবোধ, গভীৰ জীৱনবোধ, সমন্বয় আৰু ভাতৃত্ববোধৰ জয়গান গাই যোৱা সুধাকণ্ঠ ড° ভূপেন হাজৰিকাদেৱ প্ৰকৃতাৰ্থতে এগৰাকী বিশ্ব নাগৰিক, যাৰ বুকুৱেদি অনবৰতে বৈ আছিল দেশমাতৃৰ প্ৰতি ভালপোৱাৰ নিজৰা।

 ড° ভূপেন হাজৰিকাৰ গীতসমূহে মানৱ সমাজক দি আহিছে অফুৰন্ত প্ৰেৰণা, সাহস আৰু একতাৰ বাৰ্তা। ভাৰত ৰত্ন ভূপেনদাৰ অপৰিসীম সাংস্কৃতিক-বৌদ্ধিক অৱদানেৰে ধন্য গংগা, লুইতৰ দুয়োপাৰ। সমগ্ৰ অসমবাসীৰ লগতে দেশবাসীৰ হিয়াৰ আমঠু ভূপেনদাক আজি গভীৰ শ্ৰদ্ধাৰে সুঁৱৰিছোঁ। 
ভূপেনদাৰ গীতৰ প্ৰাণস্পর্শী ভাষা, সুৰ, সুৱদি কণ্ঠই প্ৰজন্মৰ পাছত প্ৰজন্মক অনুপ্রাণিত কৰি থাকিব।'

Share This