এবাৰতে শৰীৰৰ তিনিটা অংগৰ জটিল অস্ত্ৰোপচাৰ কৰি তেজপুৰৰ যুৱ চিকিৎসকৰ সাফল্য 

Dainik janambhumi February 16, 2025

ডিজিটেল ডেস্কঃ চিকিৎসা বিজ্ঞানৰ বিশেষ সফলতাৰে তেজপুৰৰ এগৰাকী যুৱ শৈল ৰোগ বিশেষজ্ঞই এগৰাকী মহিলাৰ শৰীৰৰ তিনি অংগত দেখা দিয়া জটিল ৰোগ একেটা অস্ত্রোপচাৰতে সম্পন্ন কৰি সফলতা লাভ কৰাত চিকিৎসা বিজ্ঞানৰ বাবে এয়া এক প্রথম অস্ত্রোপচাৰ হিচাপে প্রতিপন্ন হৈছে। উল্লেখযোগ্য যে এই বিৰল অস্ত্রোপচাৰ লেপৰোস্কপী পদ্ধতিৰে অতি সফলতাৰে সম্পন্ন কৰা যুৱ চিকিৎসকগৰাকী হৈছে তেজপুৰৰ বিশিষ্ট শৈল চিকিৎসক ডাঃ গোপেন্দ্র মোহন দাস আৰু বিশিষ্ট চিকিৎসক তথা জনপ্রিয় অভিনেত্রী ডাঃ জাহানাৰা বেগমৰ জ্যেষ্ঠ পুত্র ডাঃ অংকুৰ গোপেন্দ্ৰ দাস।

 

তেজপুৰ চিকিৎসা মহাবিদ্যালয়ৰ শৈল ৰোগ বিভাগৰ সহকাৰী অধ্যাপক ডাঃ অংকুৰ গোপেন্দ্ৰ দাসৰ ওচৰত কালি এই ৰোগ ধৰা পৰা মহিলাগৰাকীৰ ঘৰ ৰৌতাত। ঊষা সৰকাৰ নামৰ ৪৫ বছৰীয়া মহিলাগৰাকী কালি চিকিৎসাধীন হৈছিল তেজপুৰ মূঢ়াতেঁতেলীৰ অনন্ত মেমৰিয়েল হস্পিটেলত। চিকিৎসালয়খনত ভর্তি হোৱাৰ পাছতেই ডাঃ অংকুৰ গোপেন্দ্ৰ দাসে মহিলাগৰাকীৰ সকলো দিশ পৰীক্ষা কৰাৰ পাছত জানিব পাৰে যে মহিলাগৰাকীৰ গল্ড ব্লাডাৰত বুজন পৰিমাণৰ পাথৰৰ লগতে পিত্ত নলীতো এটা ডাঙৰ পাথৰ থকাত মহিলাগৰাকী গুৰুতৰভাৱে জণ্ডিচ ৰোগত আক্ৰান্ত হৈ আছে। আনহাতে একে সময়তে শৰীৰত যথেষ্ট পৰিমাণে এপেণ্ডিছ বৃদ্ধি পাই ইনফেক্সনৰ বাবে জটিল ৰূপ ধাৰণ কৰিছে। একেলগে মহিলাগৰাকীৰ শৰীৰৰ তিনি অংগৰ অস্ত্রোপচাৰৰ কথা আহি পৰাত সমগ্ৰ প্রক্রিয়াটোৱেই যথেষ্ট জটিল হৈ পৰে যদিও মহিলাগৰাকীৰ জীৱন ৰক্ষাৰ বাবে তাৎক্ষণিকভাৱে অস্ত্রোপচাৰৰ সিদ্ধান্ত গ্রহণ কৰে যদিও জটিলতাৰ প্ৰতি লক্ষ্য ৰাখি অপেন ছাৰ্জাৰী কৰাৰ সমস্যাত পৰে যুৱ চিকিৎসকগৰাকী। শেষত লেপৰোস্কপী পদ্ধতিৰে অতি প্ৰত্যাহ্বানেৰে শৰীৰত ছয়টাকৈ ফুটা কৰি একেবাৰতে ১ ঘণ্টা ৪০ মিনিট সময়ত সফলতাৰে সম্পন্ন কৰিলে এই জটিল অস্ত্রোপচাৰ। অস্ত্রোপচাৰৰ ২৪ ঘণ্টাৰ পাছতো আন সাধাৰণ অস্ত্রোপচাৰতকৈও মহিলাগৰাকী সুস্থ হৈ থকাৰ বাবে যথেষ্ট আনন্দিত তেজপুৰৰ এই যুৱ চিকিৎসকগৰাকীয়ে সাংবাদিকৰ আগত তিনিটা বিশেষ দলীয় চিকিৎসক দলৰ দ্বাৰাহে পৃথক পৃথককৈ কৰিব লগা অস্ত্রোপচাৰ একেলগে কৰি সফলতা লাভ কৰাত যথেষ্ট মানসিক প্রশান্তি লাভ কৰিছে বুলি মন্তব্য কৰাৰ লগতে মহিলাগৰাকীৰ স্বামীয়ে মৃত্যুৰ দুৱাৰডলিৰ পৰা পত্নীক জীৱন দান কৰা চিকিৎসকগৰাকীক কৃতজ্ঞতাৰে ওপচাই পেলায়।

 

প্রণিধানযোগ্য যে ৰাজ্যখনৰ ভিতৰতেই লেপৰোস্কপী পদ্ধতিৰে কৰা এনে জটিল অস্ত্রোপচাৰ এইটোৱেই প্রথম বুলি এতিয়া সর্বত্র চর্চা হোৱা পৰিলক্ষিত হৈছে। এই অস্ত্রোপচাৰত এনাষ্ঠেছিয়া বিশেষজ্ঞ ডাঃ তপন তালুকদাৰে চিকিৎসকগৰাকীক সহযোগ কৰাৰ লগতে চিকিৎসালয়খনৰ অস্ত্রোপচাৰ সহায়ক চন্দন নায়কে সহযোগিতা আগবঢ়ায়। মন কৰিবলগীয়া যে ইয়াৰ পূৰ্বেও ডাঃ অংকুৰ গোপেন্দ্ৰ দাসে তেজপুৰ চিকিৎসা মহাবিদ্যালয় হস্পিটেলৰ লগতে অনন্ত মেমৰিয়েল হস্পিটেলত কেইবাটাও অতি জটিল অস্ত্রোপচাৰ সফলতাৰে সম্পন্ন কৰি কৃতিত্বৰ পৰিচয় দিবলৈ সক্ষম হৈছে। তেজপুৰৰ সমাজ আৰু সংস্কৃতিৰ সৈতে সক্রিয়ভাৱে জড়িত হৈ থকা বিশিষ্ট চিকিৎসক তথা চলচ্চিত্র প্রযোজক ডাঃ গোপেন্দ্র মোহন দাস আৰু বিশিষ্ট চিকিৎসক তথা জনপ্রিয় অভিনেত্রী ডাঃ জাহানাৰা বেগমৰ সন্তানৰ এনে সফলতাত উৎফুল্ল হৈ পৰিছে তেজপুৰবাসী।

Share This