শোণিতপুৰৰ দুখন গাঁৱত 'ৰাছেল ভাইপাৰʼৰ আতংক 

dainik janambhumi March 08, 2025

ডিজিটেল ডেস্কঃ শোণিতপুৰ জিলাৰ তেজপুৰৰ পশ্চিম অঞ্চলৰ দ-বেছেৰীয়া আৰু বিহগুৰি গাঁৱত এতিয়া ৰাছেল ভাইপাৰৰ আতংকই বিৰাজ কৰিছে। পৃথিৱীৰ অতি বিষাক্ত সাপ ৰূপে পৰিচিত ৰাছেল ভাইপাৰৰ আগমনত গাঁওবাসী শংকিত হৈ পৰিছে। আজি অসম চৰকাৰৰ বঁটা প্রাপ্ত প্রাক্তন অবৈতনিক বন্যপ্রাণী বার্ডেন তথা সর্প বিশেষজ্ঞ সৌৰভ বৰকটকীয়ে দ-বেছেৰীয়াৰ শশাংক বৰাৰ ঘৰৰ পৰা এডাল ৰাছেল ভাইপাৰ উদ্ধাৰ কৰে। উদ্ধাৰৰ পাছত বৰকটকীয়ে 'ৰাছেল ভাইপাৰ'ডাল নি বন বিভাগক অর্পণ কৰে।

বন বিভাগক অর্পণৰ লগতে বৰকটকীয়ে সাপডাল গুৱাহাটীৰ চিৰিয়াখানাত ৰখাৰ পৰামৰ্শ আগবঢ়ায়। বিশেষজ্ঞগৰাকীয়ে কয় যে ৰাইজে এতিয়া নিজেই সতর্কতা অৱলম্বন কৰা উচিত। কাৰণ এতিয়া বিহগুৰি গাঁৱত ৰাছেল ভাইপাৰৰ সংখ্যা বৃদ্ধি হৈছে। এইসমূহ নিয়ন্ত্ৰণৰ বাবে 'সর্পবান্ধৱ গোটে' অহৰহ কৰ্ম কৰি আছে।

সৌৰভ বৰকটকীয়ে নিশ্চিতি প্রদান কৰি উল্লেখ কৰে যে পূৰ্বৰ ৰাছেল ভাইপাৰক লৈ কৰা সজাগতাসমূহ অথলে নাযায়। উল্লেখযোগ্য যে যোৱা ৩০ ডিচেম্বৰত এই সাপডালৰ দংশনতেই মৃত্যু হৈছিল বিহগুৰিৰ তন্ময় কেওট নামৰ এটি ১৩ বছৰীয়া শিশুৰ। মন কৰিবলগীয়া যে ৰাছেল ভাইপাৰৰ দংশনৰ ফলত মৃত্যু হোৱা অসমৰ প্ৰথম আছিল তন্ময় কেওট নামৰ শিশুটি।

ইয়াৰ পাছতে শোণিতপুৰত ৰাছেল ভাইপাৰৰ আতংকক লৈ বৰকটকীৰ নেতৃত্বত কৃষকসকলৰ মাজত আৰম্ভ হৈছিল বিশেষ সজাগতা। আনহাতে আজিৰ সৈতে শোণিতপুৰ জিলাত ২০২৫ বৰ্ষৰ তৃতীয়টো ৰাছেল ভাইপাৰ সাপ উদ্ধাৰ হৈছে। তিনিওডাল সাপেই সর্পবান্ধৱ সৌৰভ বৰকটকীৰ দ্বাৰা উদ্ধাৰ হৈছে। এইবাৰৰ সৈতে বৰকটকীয়ে শোণিতপুৰ জিলাত মুঠ ১২ ডাল ৰাছেল ভাইপাৰ সাপ উদ্ধাৰৰ লগত জড়িত হৈ পৰে।

Share This