সেউজীয়া ক'ভাৰেৰে ঢকা হ'ল ভৰলু

Rashmi March 23, 2025

ডিজিটেল ডেস্ক : ভৰলুক ঢাকি লজ্জা নিবাৰণৰ চেষ্টা কৰিছে অসম চৰকাৰে। অসমলৈ অহা আলহীয়ে নেদেখিবলৈ আৱৰ্জনা কঢ়িয়াই ভাগৰি পৰা মৰা ভৰলুত দেখা গ'ল সেউজ আৱৰণ। গুৱাহাটীত অনুষ্ঠিত হ'বলগীয়া আই পি এলৰ খেলুৱৈ-দৰ্শকৰ পৰা লজ্জা নিবাৰণৰ বাবে পুনৰ ভৰলুক ঢাকি দিয়া হ'ল । উল্লেখযোগ্য যে পূর্বেও বর্ষাপাৰাত আন্ত:ৰাষ্ট্ৰীয় খেল অনুষ্ঠিত হোৱাৰ সময়ত মৰা ভৰলুক ঢাকি দিয়া হৈছিল সেউজীয়া ক'ভাৰেৰে। 

ইয়াক লৈ বিভিন্ন দল-সংগঠনে তীব্র প্রতিক্রিয়া প্রকাশ কৰাৰ পাছত চৰকাৰে স্পষ্টীকৰণ দি কৈছিল মহ নিবাৰণৰ বাবে আঁৰি দিয়া হৈছে সেউজীয়া ক'ভাৰ অর্থাৎ এগ্রো হার্ভেষ্টিং নেট। গুৱাহাটীত প্ৰথমবাৰলৈ অনুষ্ঠিত হ'ব ক্ৰিকেট টেষ্ট মেচ। এয়া অসম তথা গুৱাহাটীৰ বাবে গৌৰৱ আৰু আনন্দৰ কথা। কিন্তু এই আনন্দৰ মাজতেই অসম তথা গুৱাহাটীবাসীৰ বাবে আছে ষ্টেডিয়ামৰ কাষেৰে বৈ যোৱা মৰা ভৰলু নৈৰ কদৰ্য ৰূপ। 

এসময়ৰ মাছ-পুঠিৰে পৰিষ্কাৰ পানীৰ বোৱঁতী নৈখন আজি হৈ পৰিছে আৱৰ্জনাপূর্ণ দুৰ্গন্ধময় ক'লা বৰণৰ পানীৰ এক স্থবিৰ নলা মাথোঁ। বছৰৰ পিছত বছৰ ধৰি গুৱাহাটী মহানগৰীৰ সকলোধৰণৰ আৱৰ্জনা কঢ়িয়াই ভাগৰি পৰা মৰা ভৰলু নৈখন আজি মৃতপ্ৰায় ।এনেদৰে আৰু কিমান দিনলৈ ভৰলুক সেউজীয়া ক'ভাৰেৰে ঢাকি ৰখাৰ কাম চলি থাকিব সেয়াহে এতিয়া এক চিন্তনীয় বিষয় হৈ পৰিছে।এই ক্ষেত্ৰত অনাগত দিনত চৰকাৰে কেনেধৰণৰ পদক্ষেপ গ্ৰহণ কৰে সেয়া পৰৱৰ্তী সময়তহে লক্ষণীয় হৈ পৰিব।

Share This