'ব্ৰহ্মপুত্ৰ মেইল'ৰ  সুবিধা নাপায় উজনি অসমৰ যাত্ৰীয়ে 

dainik janambhumi May 29, 2025

ডিজিটেল ডেস্কঃ উত্তৰ-পূব সীমান্ত ৰে'লৱেৰ কৰ্তৃপক্ষই তিনিচুকীয়া জিলাক চৰম প্ৰতাৰণা কৰাৰ অভিযোগ উত্থাপন হৈছে। ৰে'লৰ মানচিত্রত ঐতিহাসিকভাৱে স্বীকৃত তিনিচুকীয়া জিলাত ৰে'ল বিভাগে আচলতে কৰিছে কি সেয়াহে লক্ষণীয় বিষয় হৈ পৰিছে। তিনিচুকীয়া জিলাত ৰে'ল চলাচল কৰাৰ ক্ষেত্ৰত ৰে'ল বিভাগে গুৰুত্ব আৰোপ নকৰাৰ অভিযোগ উঠিছে।

চলাব লাগে বাবেই নামমাত্র ৰে'ল চলোৱা বুলি সর্বত্র চর্চা চলিছে। ন'হলেনো মাকুমৰ পৰা ডাঙৰীলৈকে চলোৱা ডেম' ৰে'লখনৰ বাবে আজি পর্যন্ত সঠিক সময় নির্ধাৰণ কৰিব নোৱাৰিলে কিয় ৰে'ল বিভাগে? কম দূৰত্ব, চলোৱাৰ সময় নিমিলাৰ বাবে যাত্রী নাথাকে। কেৱল চলি আছে। ৰাইজৰ স্বাৰ্থত ডেম' ৰে'ল চলাচল কৰাৰ বাবে এটা পর্যাপ্ত সময় নির্ধাৰণ নকৰাটো ৰহস্যজনক হিচাপে বিবেচিত হৈছে।

আনহাতে, কেৱল মাকুমৰ পৰা ডাঙৰীলৈকে চলাচল কৰা বিষয়টোৱে কি সূচাইছে? ৰে'ল বিভাগৰ অকর্মণ্যতা নে হঠকাৰিতা? উল্লেখযোগ্য যে ৰে'ল বুলি ক'লেই তিনিচুকীয়া জিলাৰ স্থান সুকীয়া। কাৰণ ব্ৰিটিছ অসমৰ প্ৰথম ৰে'ল প্রতিষ্ঠান তিনিচুকীয়া জিলাতে আছিল। 'ডিব্রু শদিয়া ৰে'লৱে' নামেৰে ৰে'ল চলাচল কৰিছিল। ৰে'লৰ মানচিত্রত তিনিচুকীয়া জিলাৰ এক উল্লেখযোগ্য স্থান আছে। আছাম ৰে'লৱে ট্রেডিং কোম্পানীয়ে ১৮৮২ চনত ৰে'ল চলাচল কৰাইছিল। ১৮৮৩ চনত ডিব্ৰুগড় আৰু মাকুমৰ মাজত ৰে'ল চলে। ১৮৮৪ চনত ডিব্ৰুগড়ৰ পৰা লিডুলৈকে ৰে'ল চলাচল কৰে। ডি এছ আৰৰ পৰাই এক সফল বাণিজ্যিক প্রতিষ্ঠান হিচাপে চিনাকি দিবলৈ সক্ষম হোৱা ৰে'ল বিভাগৰ এই অংশ সম্প্রতি উত্তৰ-পূব সীমান্ত ৰে'লৱেৰ অন্তর্ভুক্ত হয়। কিন্তু ইতিহাস বিজড়িত এই উত্তৰ-পূব সীমান্ত ৰে'লৱেৰ অন্তৰ্গত বহু ৰে'লৰ পৰা এটা সময়ৰ ডি এছ আৰৰ লগতে তিনিচুকীয়া-ডিব্রুগড় জিলাই ৰে'লৰ সা-সুবিধা লাভৰ পৰা বঞ্চিত হ'ব লগা হৈছে। অন্য এক উদাহৰণ হৈছে- 'ব্ৰহ্মপুত্ৰ মেইল'ৰ চলাচল বন্ধ কৰি দিয়া কাৰ্য। অসমৰ এখন পুৰণি ৰে'ল হিচাপে পৰিচিত 'ব্রহ্মপুত্র মেইল' প্ৰথম অৱস্থাত 'তিনিচুকীয়া মেইল' হিচাপেই জনাজাত আছিল।

ভাৰতৰ দীর্ঘ দূৰত্বৰ ৰে'ল হিচাপে পৰিচিত ব্ৰহ্মপুত্ৰ মেইলে পুৰণি দিল্লীলৈকে চলাচল কৰিছিল। এই ৰে'ল ডিব্ৰুগড়-তিনিচুকীয়া হৈ চলাচল কৰিছিল। কিন্তু কভিডৰ সময়ত ৰে'লখন বন্ধ কৰিলে। অৱশ্যে পাছত চলাচল কৰে যদিও উজনি অসমবাসীক বঞ্চিত কৰে। তেতিয়াৰ পৰা তেতিয়াৰ 'তিনিচুকীয়া মেইল' আৰু এতিয়াৰ 'ব্ৰহ্মপুত্ৰ মেইল'ৰ পৰা তিনিচুকীয়াবাসী দূৰৈৰে কথা, সমগ্রকে উজনি অসমবাসী বঞ্চিত হৈ পৰিল। এই ৰে'ল এতিয়া কামাখ্যা ষ্টেছনৰ পৰা চলাচল কৰে। ৰাইজৰ দাবী- অতি শীঘ্ৰে ব্ৰহ্মপুত্ৰ মেইল পুনৰ ডিব্ৰুগড়-তিনিচুকীয়া হৈ চলাচল কৰাৰ ব্যৱস্থা গ্রহণ কৰিব লাগে। বিষয়টোৰ ক্ষেত্ৰত ৰে'ল বিভাগকো গুৰুত্ব আৰোপ কৰিবলৈ ৰাইজে আহবান জনাইছে।

Share This