ভনী জোঁৱাই আৰু ভাগিনৰ দলে মিলি হত্যা কৰিলে মোমায়েকক

Kakali Deka March 28, 2025

ডিজিটেল ডেস্ক : ঈদৰ প্ৰাকক্ষণত ধিঙৰ ঢাকাইবস্তিত সংঘটিত হৈছে নৃশংস হত্যাকাণ্ডৰ ঘটনা ।
মাটি-বাৰীক লৈ ভনী জোঁৱাই আৰু ভাগিনৰ দলে দিনদুপৰতে হত্যা কৰিলে মোমায়েকক ।

মাটি-বাৰী সংক্ৰান্তীয় সামান্য কথাৰ বাবেই সংঘটিত হয় এই নৃশংস হত্যাকাণ্ডৰ ঘটনাটো ।

বুধবাৰে, দুপৰীয়া ভিনিয়েক আব্দুল বাৰেক আৰু খুলশালি ইমান হুছেইনৰ মাজত সৃষ্টি হৈছিল মাটি-বাৰীক লৈ তৰ্কাতৰ্কি আৰু তাৰ পাছতেই ভিনিয়েক আব্দুল বাৰেকে ইমান হুছেইনক আক্ৰমণ কৰিবলৈ ফ’ন কৰি চৰৰ পৰা মাতি নিছিল নিজৰ সন্তানকেইটাক।

খবৰ পাই ল'ৰাকেইজন উপস্থিত হোৱাত আব্দুল বাৰেকৰ নেতৃত্বত ইমান হুছেইনৰ ঘৰৰ দৰ্জা ভাঙি ভিতৰত প্ৰৱেশ কৰি দলবদ্ধভাৱে পত্নী আৰু দুটি কণমানি সন্তানৰ সন্মুখত লোহাৰ ৰড আৰু বিভিন্ন চোকা অস্ত্ৰৰে কোবাই কোবাই মূৰত আৰু শৰীৰত প্ৰহাৰ কৰিছিল ইমান হুছেইনক।

এই দলবদ্ধ আক্ৰমণৰ বলি হৈছিল ইমান হুছেইনৰ পত্নী আৰু বৃদ্ধ মাতৃও। আক্ৰমণৰ ফলত ইমান হুছেইনৰ পিঠিৰ ৰাজহাড় ভাঙি যায়।

পৰৱৰ্তী সময়ত ইমান হুছেইনক তাৎক্ষণিকভাৱে লৈ যোৱা হয় ধিঙৰ পৰা নগাঁও আৰু নগাঁৱৰ পৰা গুৱাহাটীৰ এখন ব্যক্তিগত চিকিৎসালয়লৈ আৰু এটা সপ্তাহ চিকিৎসাধীন অৱস্থাত মৃত্যুৰ সৈতে যুঁজি যুঁজি অৱশেষত মৃত্যুক ইমানে সাবটি লয়।

ইমান হুছেইনক নৃশংসভাৱে হত্যা কৰা হত্যাকাৰীৰ মূল নায়ক আব্দুল বাৰেক আৰু তেওঁৰ সন্তান মোজ্জাফৰ, মোজ্জামেল, ইনামুল, ইক্ৰামুল আৰু মেহেদি আলমৰ বিৰুদ্ধে ইমান হুছেইনৰ পৰিয়ালে ধিং আৰক্ষী থানাত দাখিল কৰিছিল এজাহাৰ।

এজাহাৰ দাখিল কৰাৰ পিছতেই ধিং আৰক্ষীয়ে এজন হত্যাকাৰীক কৰায়ত্ত কৰিবলৈ সক্ষম হয় যদিও বাকী হত্যাকাৰীকেইটা বৰ্তমানেও পলাতক বুলি

জানিব পৰা গৈছে।
ইতিমধ্যে ইমান হুছেইনৰ মৃতদেহটো মৰণোত্তৰ পৰীক্ষা কৰি ঘৰলৈ নি জানাজা নামাজ সম্পন্ন কৰিছে পৰিয়ালৰ লোকে।