ৰাজ্য চৰকাৰৰ ঝুমইৰ নৃত্যক বিশ্ব দৰবাৰত প্ৰতিষ্ঠা কৰোৱাৰ প্ৰয়াস

Rashmi February 18, 2025

ডিজিটেল ডেস্ক: অসম চৰকাৰে সাংস্কৃতিক পৰিক্ৰমা বিভাগৰ উদ্যোগত ঝুমইৰ নৃত্যক বিশ্ব দৰবাৰত প্ৰতিষ্ঠা কৰোৱাৰ বাবে ব্যাপক প্ৰস্তুতি চলাইছে। ৰাজ্য চৰকাৰে অসমীয়াৰ বাপতিসাহোন  বিহুৰ পিছত এইবাৰ ঝুমইৰ নৃত্যক বিশ্ব দৰবাৰত প্ৰতিষ্ঠা কৰিব। ইয়াকে লৈ ৰাজ্যৰ চাহ বাগিচাসমূহত সৃষ্টি হৈছে এক  উৎসৱমুখৰ পৰিৱেশ। সমান্তৰালকৈ মৰিগাঁও জিলাৰ জাগীৰোড বিধানসভা সমষ্টিৰ অন্তৰ্গত গোপাল কৃষ্ণ আৰু আমচৈ চাহ বাগিচাতো সৃষ্টি হৈ উৎসৱমুখৰ পৰিৱেশ। 

মৰিগাঁও জিলাৰ সাংস্কৃতিক উন্নয়ন বিষয়া অংশুমান দত্তৰ তত্ত্বাৱধানত ইতিমধ্যে দুয়োখন চাহ বাগিচাৰ পৰা প্ৰশিক্ষিত ৪৭ জনীয়া এটা দল নিৰ্বাচিত কৰি উলিয়াইছে। মৰিগাঁও জিলা প্ৰশাসন আৰু জিলা সাংস্কৃতিক উন্নয়ন বিভাগৰ জৰিয়তে নিৰ্বাচিত দলটোৱে সকলো ধৰণৰ প্ৰস্তুতি সাজু কৰি তুলিছে। মৰিগাঁও জিলা সাংস্কৃতিক উন্নয়ন বিষয়া অংশুমান দত্তই জানিবলৈ দিয়া মতে ঝুমইৰ দলটো যাতে কোনো ধৰণৰ সমস্যা সন্মুখীন হ'ব লগীয়াত নপৰে তাৰ প্ৰতি লক্ষ্য ৰাখি জিলা প্ৰশাসনে এটা ১৯ জনীয়া অফিচিয়েল দল প্ৰেৰণ কৰিব। তদুপৰি চাহ বাগিচাৰ লোকসকলে সেই দিনা পোনপটীয়াকৈ প্ৰত্যক্ষ কৰিবৰ বাবে গোপাল কৃষ্ণ চাহ বাগিচাৰ তিনি স্থানত আৰু আমচৈ চাহ বাগিচাৰ এটা স্থানত প্ৰজেক্টৰৰ জৰিয়তে পোনপটীয়াকৈ সম্প্ৰচাৰৰো ব্যৱস্থা কৰিব বুলি অৱগত কৰে। উল্লেখ্য যে অসমৰ চাহ উদ্যোগৰ দুশ বছৰ উপলক্ষে ৰাজ্য চৰকাৰে অহা ২৪ ফেব্ৰুৱাৰীত গ্ৰহণ কৰিছে এক বিশাল আৰু বৰ্ণাঢ্য কাৰ্যসূচী।ৰাজ্য চৰকাৰে অসমৰ চাহ জনগোষ্ঠী আৰু আদিবাসীসকলৰ ঝুমইৰ নৃত্যক বিশ্বমুখী কৰি তোলাৰ উদ্দেশ্যে সেই দিনটোত গুৱাহাটীৰ সৰুসজাই ষ্টেডিয়ামত ঝুমইৰ নৃত্য প্ৰদৰ্শন কৰাৰ বাবে ৰাজ্য চৰকাৰৰ সাংস্কৃতিক পৰিক্ৰমা বিভাগৰ দ্বাৰা আয়োজন কৰিছে এক বৰ্ণাঢ্য কাৰ্যসূচী। 

দেশৰ প্ৰধানমন্ত্ৰী নৰেন্দ্ৰ মোদীকে ধৰি ২১খন ৰাষ্ট্ৰৰ ৰাষ্ট্ৰদূত, বিভিন্ন উদ্যোগপতি, ৰাজনৈতিক নেতা,সাংস্কৃতিক ক্ষেত্ৰৰ লগত জড়িত ব্যক্তি উপস্থিত থাকিব লগীয়া অনুষ্ঠানটোত ৮ হাজাৰতকৈ অধিক কলা-কুশলীয়ে অংশগ্ৰহণ কৰিব। ইফালে অসম চৰকাৰৰ তথ্য আৰু জনসংযোগ, জলসম্পদ আদি বিভাগৰ মন্ত্ৰী পীয়ূষ হাজৰিকাই মৰিগাঁও জিলাৰ ঝুমইৰ নৃত্যৰ শিল্পী দলটোক শুভেচ্ছা জ্ঞাপন কৰি কয় যে
আমাৰ চাহ জনগোষ্ঠীয় চহকী সংস্কৃতিৰ বৰ্ণিল উদযাপনে লাভ কৰিব বিশ্ব পৰিচিতি। দেশৰ প্ৰধানমন্ত্ৰী নৰেন্দ্ৰ মোদীৰ উপস্থিতিত ৮ হাজাৰৰো অধিক যুৱক-যুৱতীয়ে একেলগে অংশগ্ৰহণ কৰিব 'ঝুমইৰ বিনন্দিনী' শীৰ্ষক মেগা ঝুমইৰ নৃত্যানুষ্ঠানত। অসমৰ প্ৰতিটো প্ৰান্তত ঝুমইৰ বিনন্দিনীৰ বাবে চাহ বাগিচা অঞ্চলৰ ৰাইজৰ মাজত ব্যাপক উৎসাহ-উদ্দীপনা পৰিলক্ষিত হৈছে। চাহ বাগিচা সম্প্ৰদায়ৰ চহকী সংস্কৃতিৰ ঝংকাৰত অহা ২৪ ফেব্ৰুৱাৰীত গুৱাহাটীৰ আকাশ-বতাহ মুখৰিত হৈ পৰিব বুলি মন্তব্য কৰে।

Share This