জলজীৱন আঁচনিৰ কামৰ ধন এৰি নিদিলে আত্মজাহৰ ভাবুকি

dainik janambhumi August 10, 2025

ডিজিটেল ডেস্কঃ ঘৰে ঘৰে বিশুদ্ধ খোৱাপানী প্ৰদানৰ উদ্দেশ্যেৰে কেন্দ্ৰীয় চৰকাৰে প্ৰৱৰ্তন কৰা জনজীৱন আঁচনিৰ কাম কৰি অসমত সৰ্বস্বান্ত হৈছে একাংশ ঠিকাদাৰ। ৰাজ্যৰ একাংশ নিবনুবা যুৱকৰ লগতে ঠিকাদাৰসকলে ৰাজ্য চৰকাৰৰ নিবিদা অনুসৰি জলজীবন মিছন আঁচনিখনত থলুৱা যুৱকে বহু আঁচনিত বিনিয়োগ কৰি কাম কৰিছিল যদিও এই আঁচনি ৰূপায়ণৰ পাছতো বিগত ২১ মাহে ধন নাপাই হাহাকাৰ কৰিব লগা হৈছে ঠিকাদাৰসকলে।

ৰাজ্যৰ জনস্বাস্থ্য কাৰিকৰী বিভাগে ৰূপায়ণ কৰা জলজীৱন মিছন আঁচনিখনত বহু থলুৱা ঠিকাদাৰে নিবিদা লাভ কৰিছিল। আঁচনিৰ বহু কাম সমাপন কৰাৰ পাছতো বৃহৎ পৰিমাণৰ ধন পাবলৈ বাকী থকাত ধন লাভ কৰা ঠিকাদাৰসকলে বিল নাপাই আত্মজাহ দিয়াৰো ভাবুকি দিছে। ইফালে, অনাদায় টকা আদায় দিবলৈ বিভাগীয় মন্ত্রীক হেঁচা প্রয়োগ কৰিলেও মন্ত্ৰীগৰাকীয়ে জুন মাহত হ'ব, জুলাই মাহত হ'ব আদি প্রলোভনেৰে দিনবোৰ পিছুৱাই আছে। পৰিতাপৰ বিষয় যে বহুসংখ্যক থলুৱা ঠিকাদাৰে জলজীৱন মিছন আঁচনিৰ কাম কৰিবলৈ বেংকৰ পৰা টকা ধাৰ লোৱাৰ পাছত এতিয়া বিল অনাদায়ৰ পৰিপ্ৰেক্ষিতত সদায় বেংকৰ পৰা দিয়া তাগিদাত বিল আদায় নোপোৱাত ঠিকাদাৰসকল অসহায় হৈ পৰিছে।

এফালে আবণ্টিত ধনৰ ব্যয়ৰ ক্ষেত্ৰত ব্যর্থতা আৰু আনফালে ঠিকাদাৰে প্ৰাপ্য আদায় নোপোৱা কাণ্ডই ঠিকাদাৰৰ অৱস্থা শোচনীয় কৰি তুলিছে। বিভাগটোৱে কম সময়ৰ ভিতৰত জলজীৱন মিছন আঁচনিৰ ঠিকাদাৰৰ অনাদায় ধন মুকলি কৰি নিদিলে আঁচনিখনে ঠিকাদাৰসকলক মৃত্যুৰ পথলৈ ঠেলি দিয়াটো প্রায় নিশ্চিত হৈ পৰিছে। অতিশীঘ্ৰে ঠিকাদাৰৰ অনাদায় বিলৰ টকা মুকলি কৰি দিবলৈ দাবী জনাইছে। এক প্রেছ বিজ্ঞপ্তিযোগে ঠিকাদাৰসকলে অভিযোগ কৰা অনুসৰি মুখ্যমন্ত্ৰীয়ে কোৱাৰ দৰে ৰাজ্যৰ ঠিকাদাৰসকলক কোনো সকাহ দিয়া নাই। বৰঞ্চ ঠিকাদাৰসকলে টেণ্ডাৰৰ সময়তে যি পার্ফমেঞ্চ গ্যেৰাণ্টি দিব লাগে মুঠ প্রকল্প ব্যয়ৰ ৫ শতাংশ সেই ধনৰাশিহে মোকলাই দিয়াৰ কথা কৈছে। ইফালে ঠিকাদাৰসকলৰ প্ৰাপ্য ধন দিবলৈ অপাৰগ ৰাজ্য চৰকাৰে নতুনকৈ পুনৰ এছ অ'পি কামৰ বাবে নিবিদা গ্রহণ প্ৰক্ৰিয়া আৰম্ভ কৰা কাৰ্যত ক্ষুব্ধ হৈ পৰিছে। তেওঁলোকে এই আঁচনি বন্ধ কৰিবলৈ দাবী উত্থাপন কৰাৰ লগতে কোনো ঠিকাদাৰে এই নিবিদা প্রক্রিয়াত অংশ গ্ৰহণ নকৰে বুলি স্পষ্ট কৰি দিয়ে।

উল্লেখযোগ্য যে কার্যালয়সমূহত মুঠ ৪,৫০০ কোটি টকাৰ বিল মুখ্য অভিযন্তাৰ কাৰ্যালয়ৰ পৰা পাছ হৈ আহি পৰি আছে, কিন্তু চৰকাৰে ধন মুকলি কৰি দিয়া নাই বাবে পৰি ৰৈছে ফাইলসমূহ। আনহাতে, ৭,৫০০ কোটি টকাৰ বিল এই পর্যন্ত অনুমোদনৰ বাবেই যোৱা নাই বুলি তাৎপর্যপূর্ণ মন্তব্য কৰে।

দেশৰ আন ৰাজ্যসমূহত ৰাজ্য চৰকাৰে ৫০ শতাংশ ব্যয় কৰা বাবে ঠিকাদাৰে প্ৰতিবাদ কৰিব লগা হোৱা নাই বুলি মন্তব্য কৰি কয় যে কেন্দ্ৰৰ পৰা অসমৰ প্ৰকল্পত ৯০ শতাংশ ব্যয় কৰিব লগা হোৱা বাবেই এতিয়ালৈকে ঠিকাদাৰে প্রাপ্য ধন লাভ কৰা নাই। বৰ্তমান কেন্দ্ৰ চৰকাৰে কামসমূহৰ তদন্ত কৰি আছে বুলি ৰাজ্য চৰকাৰে কৰা মন্তব্য সম্পৰ্কত কয় যে চৰকাৰে যিসমূহ কোম্পানীৰ সামগ্ৰী ব্যৱহাৰৰ বাবে অনুমতি দিছিলে সেইসমূহ কোম্পানীৰ বস্তুৱেই ব্যৱহাৰ কৰাৰ পাছত পুনৰ তদন্তৰ কি প্রয়োজন হ'ল বুলি প্রশ্ন কৰিছে

Share This