আজি ৰঙৰ উৎসৱ ফাকুৱা, পোন প্ৰথমে কেতিয়া পালন কৰা হৈছিল দৌল উৎসৱ

rashmi March 14, 2025

ডিজিটেল ডেস্ক : ফাগুন মানেই ৰঙৰ উৎসৱ।প্রতি বছৰে ফাগুন মাহৰ পূৰ্ণিমা তিথিত দৌল উৎসৱ বা ফাকুৱা পালন কৰা হয়।আজি ৰঙৰ উৎসৱ ফাকুৱা। পলাশৰ ৰঙতকৈও ৰঙীণ হোৱাৰ সময় এয়া। চঞ্চল ফাগুনৰ আচলত ধৰি আনন্দ উদযাপন কৰাৰ সময় ফাকুৱা। ৰাজ্যৰ ভিন্ন প্ৰান্তত দৌল উৎসৱ উপলক্ষে উদযাপন কৰা হৈছে বিভিন্ন অনুষ্ঠানৰ । 

দেশৰ লগতে ৰাজ্যৰ বিভিন্ন প্ৰান্ত যেনে বৰপেটা, বটদ্ৰৱা আৰু মাজুলী ইত্যাদিত আৰম্ভ হৈছে দৌল যাত্ৰাৰ উলাহ। কিয়নো আজি ৰঙৰ উৎসৱ হোলী। আবিৰৰ ৰঙেৰে ৰঙীন হৈ পৰিছে চৌদিশ। ৰঙীন,ফাকুৱা, ফিচকাৰীৰে ভৰপূৰ হৈ পৰিছে ৰাজ্যৰ বজাৰসমূহ ।

বৰদোৱাত এই ৰঙৰ উৎসৱৰ সূচনা কৰি অসমীয়া সাংস্কৃতিক চেতনাত এক নৱ দিশৰ সূচনা কৰে মহাপুৰুষ শ্ৰীমন্ত শংকৰদেৱে।  ২১ বছৰ বয়সতে গুৰুজনাই বৰদোৱাত এই উৎসৱ পালন কৰিছিল। 
দ্বিতীয়তে বৈকুণ্ঠপুৰী বৰপেটা ধামত দৌল উৎসৱ প্ৰচলন কৰিছিল বৰপেটা সত্ৰৰ মথুৰা দাস বুঢ়া আতাই। আৰু সেই তেতিয়াৰে পৰা পৰম্পৰাগতভাৱে জাকজমকতাৰে বৰপেটা সত্ৰত দৌল উৎসৱ পালন কৰি অহা হৈছে।আজি কৃষ্ণ বন্দনা আৰু হোলী গীতৰ মূৰ্ছনাৰে মুখৰিত হৈ পৰিছে ৰাজ্যৰ ভিন্ন প্ৰান্ত। সকলোৰে মাজত কেৱল আনন্দৰ বন্যা।

Share This