আজি বিশ্ব হস্তী দিৱস, আপুনি জানেনে কাজিৰঙা ৰাষ্ট্ৰীয় উদ্যানত হাতীৰ সংখ্যা কিমান?

Rashmi August 12, 2025

ডিজিটেল ডেস্কঃ বিশ্বত হাতীৰ সুৰক্ষা আৰু হাতী-মানুহৰ সংঘাত দূৰীকৰণৰ বাবে ২০১২ চনৰ পৰাই প্ৰতিবছৰে উদযাপন কৰা হৈছে বিশ্ব হাতী দিৱস৷ বিশ্ব ঐতিহ্যক্ষেত্ৰ কাজিৰঙাৰ বিগ ফাইভৰ অন্যতম এই হাতী।

২০২৪ চনৰ গণনা অনুসৰি কাজিৰঙা ৰাষ্ট্ৰীয় উদ্যানত হাতীৰ সংখ্যা ১২৮৮ টা। DFO অৰুণ ভিগ্নেশৰ মতে হাতীক পৰিবৱশতন্ত্ৰৰ অভিযন্তা বুলি অভিহিত কৰা হয়। বানপানীৰ পূৰ্বানুমান হাতীৰ পৰাই কৰিব পাৰি, কিয়নো বানপানীৰ পূৰ্বে কাজিৰঙা ৰাষ্ট্ৰীয় উদ্যানৰ পৰা ওলাই কাৰ্বি পাহাৰলৈ ধাৱমান হয় হাতীৰ জাক।

আৱাসস্থল প্ৰৱন্ধন কৰাত হাতীৰ ভূমিকা অপৰিসীম বুলি কয় বিষয়াগৰাকীয়ে। ইপিনে কাজিৰঙাত পৰ্যটকৰ অন্যতম আকৰ্ষণ হাতী।বৰ্তমান হাতী আৰু মানুহৰ সংঘাতে তীব্ৰ ৰূপ ধাৰণ কৰিলেও অতীজৰে পৰা হাতী–মানুহৰ মাজত আছে এক নিবিড় সম্পৰ্ক৷ এই সম্পৰ্ক অব্যাহত আছে কাজিৰঙা ৰাষ্ট্ৰীয় উদ্যানত।

কাজিৰঙা ৰাষ্ট্ৰীয় উদ্যানৰ অন্যতম সৌন্দৰ্যৰ প্ৰতীক হ’ল বিশাল হস্তী বাহিনী৷ কাজিৰঙা ৰাষ্ট্ৰীয় উদ্যানৰ নিৰাপত্তা আৰু দেশী-বিদেশী পৰ্যটকৰ সেৱাত আৰম্ভণিৰে পৰা নিয়োজিত হৈ আহিছে হাতীৰ জাক৷ দীৰ্ঘদিন ধৰি চোৰাং চিকাৰীৰ বিৰুদ্ধে চলা অভিযান, দুৰ্গম এলেকাত বনকৰ্মীৰ সৈতে কৰ্তব্য পালনৰ দৰে গধূৰ দায়িত্ব পালন কৰি আহিছে হস্তী বাহিনীয়ে।

কাজিৰঙা ৰাষ্ট্ৰীয় উদ্যানত থকা ৬৫টা বিভাগীয় হাতীয়ে পালন কৰি আহিছে বিভিন্ন দায়িত্ব। উল্লেখ্য যে বিগত সময়ত কাজিৰঙাত পূৰ্বৰ ৰাষ্ট্ৰপতি ৰামনাথ কবিন্দ আৰু বৰ্তমানৰ প্ৰধানমন্ত্ৰী নৰেন্দ্ৰ মোদীয়ে কাজিৰঙা ভ্ৰমণৰ সময়ত কৰা হাতী ছাফাৰীৰ কথা উল্লেখ কৰে DFO অৰুণ ভিগ্নেশে।


উৎস : প্ৰাগ নিউজ ডিজিটেল

Share This