২৬ত অসমত যুঁজিবলৈ সৰ্বশক্তিৰে সাজু তৃণমূল কংগ্রেছ

dainik janambhumi August 10, 2025

ডিজিটেল ডেস্ক : অসম বিধানসভাৰ নির্বাচনক লৈ সাজু হৈছে তৃণমূল কংগ্ৰেছ। পশ্চিম বংগৰ দৰেই অসমতো সর্বশক্তি প্রয়োগেৰে ২০২৬-ৰ বিধানসভাৰ নিৰ্বাচনত প্রতিদ্বন্দ্বিতা কৰাৰ সিদ্ধান্ত গ্ৰহণ কৰিছে তৃণমূল কংগ্ৰেছে। এতিয়াও বিধানসভাৰ নিৰ্বাচনলৈ প্রায় আঠ মাহ আছে যদিও দলটোৱে প্রায় ৫০ গৰাকী প্ৰাৰ্থীৰ তালিকা চূড়ান্ত কৰিছে। আনকি দলৰ সাংগঠনিক ভেটি শক্তিশালী কৰি ১৪গৰাকী জিলা সভাপতি, ১৫গৰাকী উপ-সভাপতি, সাধাৰণ সম্পাদককো নির্বাচনত প্রতিদ্বন্দ্বিতা কৰিবলৈ সাজু হোৱাৰ নিৰ্দেশ দিছে দলৰ শীর্ষ নেতৃত্বই। 

একেদৰে বৰাকৰ প্ৰায় সকলো আসনতে প্রতিদ্বন্দ্বিতা কৰাৰ সিদ্ধান্ত লৈছে দলটোৱে। দলৰ এটা শীর্ষ সূত্ৰই প্ৰকাশ কৰা মতে, উজনি অসমৰ তিনিচুকীয়া, ডিব্ৰুগড়, খোৱাং, সৰুপথাৰ, মাহমৰা, শদিয়া, ধেমাজি, টীয়ক সমষ্টিত প্রতিদ্বন্দ্বিতা কৰিব তৃণমূল কংগ্ৰেছে। নির্বাচনৰ পূর্বে অহা অক্টোবৰত পশ্চিম বংগৰ মুখ্যমন্ত্রী মমতা বেনাৰ্জীয়ে অসম ভ্রমণ কৰিব বুলি উল্লেখ কৰি সূত্ৰটোৱে লগতে কয় যে দীয় টিকটৰ পৰা বঞ্চিত হ'লে কংগ্রেছ, এ আই ইউ ডি এফ আৰু বিজেপিৰ বহু বঞ্চিত নেতাই শেষ মুহূর্তত তৃণমূল কংগ্ৰেছত যোগদান কৰি প্ৰতিদ্বন্দ্বিতা কৰিব। 

ইফালে দলটোৱে প্ৰদান কৰিব লগীয়া সম্ভাব্য প্রার্থীসকল হৈছে ক্রমে বকো-ছয়গাঁও সমষ্টিত লাৱণ্য বড়ো (সভানেত্রী, দক্ষিণ কামৰূপ জিলা), মঙলদৈ সমষ্টিত হৰেকৃষ্ণ ডেকা (সভাপতি, দৰং জিলা), জলেশ্বৰ সমষ্টিত আৰিফ আখতাৰ (সভাপতি, গোৱালপাৰা জিলা), বিলাসীপাৰাত মমিনুৰ ইছলাম (সভাপতি, ধুবুৰী জিলা), লখিমপুৰত লিখন বুঢ়াগোহাঁই (সভাপতি, লখিমপুৰ জিলা), ডিমৰীয়াত মনোজ সেনাপতি (সভাপতি, গুৱাহাটী মহানগৰ জিলা), মানকাচৰত তাজলিয়া বানু (সভানেত্রী, দক্ষিণ শালমাৰ জিলা), বটদ্ৰৱাত ময়ূৰ মজুমদাৰ (সভাপতি, নগাঁও জিলা), বাক্সাত দ্বীপেন ৰামছিয়াৰী (সভাপতি, বাক্সা জিলা), গোসাইগাঁৱত ছেমছুং নাৰ্জাৰী (সভাপতি, কোকৰাঝাৰ জিলা), ভৱানীপুৰ-সৰভোগত হাৰুনুৰ ৰছিদ (সভাপতি, বজালী জিলা), বৰপেটাত প্রদীপ ৰয় (সভাপতি, বৰপেটা জিলা), ডিব্ৰুগড়ত প্রদীপ দহোটীয়া, (সভাপতি, ডিব্ৰুগড় জিলা), শিলচৰত ৰাজেশ দেৱ (সভাপতি, শিলচৰ জিলা), ৰঙিয়া নতুবা বৰক্ষেত্ৰীত দুলু আহমেদ (উপ-সভাপতি), কোকৰাঝাৰত লাইপুং নাৰ্জাৰী (উপ-সভাপতি), ধুবুৰীত এন আই চৌধুৰী (উপ-সভাপতি), বজালীত সঞ্জীৱ মহন্ত (সাধাৰণ সম্পাদক), ছিপাঝাৰত শিশিৰ দেৱ কলিতা (সাধাৰণ সম্পাদক), মানস টৰিত চেটার্জী (সাধাৰণ সম্পাদক), গোৰেশ্বৰত সহদেব দাস (সাধাৰণ সম্পাদক), বিহপুৰীয়াত অতুল দত্ত (সাধাৰণ সম্পাদক), তিনিচুকীয়াত চিন্তু বৰুৱা (সম্পাদক), দিছপুৰত শ্যামল হাজৰিকা (সম্পাদক), কমলপুৰত কংকন নাথ (সাধাৰণ সম্পাদক, তৃণমূল যুব), দুলীয়াজানত অভিজিত কমল ভূঞা (সাধাৰণ সম্পাদক, তৃণমূল যুৱ), হাজো-শুৱালকুছিত জুৰি মালী, বৰক্ষেত্ৰীত ৰেহেনা বেগম, চেঙাত বাপুকণ আলী, ছমৰীয়াত অনিমা আহমেদ, বিজনীত অভিজিত মজুমদাৰ, পাকা বেতবাৰীত ছফিউৰ ৰহমান, জাহিদুল ইছলাম। ইয়াৰ উপৰি বীৰসিং জাৰুৱা, খোৱাং, টীয়ক, সৃজনগ্রাম, ৰহা, মন্দিয়া, দলগাঁও, শিলচৰ, চাপাগুৰি, বিনাকান্দি, লাহৰীঘাট, ধিং, যমুনামুখ, গোৱালপাৰা পূব, গোলকগঞ্জ, গৌৰীপুৰ, জাগীৰোড, ৰূপহীটো প্রার্থী থিয় কৰাব তৃণমূল কংগ্ৰেছে।

Share This