কয়লা খনিৰ দুর্বিষহ জীৱন সুঁৱৰি শিয়ৰি উঠে সৃজনগ্ৰামৰ কুমুদ দস

dainik janambhumi January 29, 2025

ডিজিটেল ডেস্কঃ  উমৰাংছ'ৰ অবৈধ কয়লা খনিত শ্রমিকৰ শোকাৱহ মৃত্যুৰ ঘটনাই সমগ্র দেশতে চাঞ্চল্যৰ সৃষ্টি কৰিছে। ভাতমুঠি যোগাৰৰ বাবে জীৱনকো তুচ্ছ কৰি কয়লা খননত নিয়োজিত হয় একো একোজন শ্রমিক। এনেদৰে দুপইচা অৰ্জনৰ আশাৰে মেঘালয়ৰ কয়লা খনিত কাম কৰিবলৈ গৈ ভয়ংকৰ অভিজ্ঞতা লাভ কৰিছিল সৃজনগ্রামৰ এজন যুৱকে।

সৃজনগ্রামৰ কুমুদ দাস নামৰ যুৱকজন সুদীর্ঘকাল মেঘালয়ৰ গাৰো পাহাৰ জিলাৰ দুৰ্গম কয়লা খনিত কাম কৰিছিল। অসমৰ বহু শ্রমিকে এই দুর্গম অঞ্চলসমূহত জীৱিকাৰ সন্ধানত ঢাপলি মেলে। দাসে জনোৱা অনুসৰি, কয়লা খনিসমূহ এনেকুৱা স্থানত অৱস্থিত, য'ত হয়তো হাজাৰ হাজাৰ বছৰ ধৰি সূৰ্যৰ কিৰণে স্পৰ্শ কৰা নাই। কয়লাৰ সুৰংগবোৰ বহল খুব বেছি এক মিটাৰ, ওখ ক'ৰবাত ১৮-২০ ইঞ্চি। অন্ধকাৰ গুহাবোৰ আকৌ বাদুলী, মকৰাৰো বাসস্থান। 

কুমুদৰ ভাষ্য অনুসৰি 'কয়লা যেতিয়া এজন মিস্ত্রীয়ে কাটিবলৈ লয় তাৰ বহল এক মিটাৰৰ কিছু আশে-পাশে থকাটো বাঞ্ছনীয়। যদি কোনোবাই তাতকৈ বেছি বহলকৈ খান্দিবলৈ যায় আৰু খনিটো যদি পুৰণি হয়, তেন্তে কয়লা ওপৰৰ পৰা পৰি

শ্রমিকৰ মৃত্যু হোৱাৰ সম্ভাৱনা থাকে।' কয়লা খননৰ বিভিন্ন স্তৰ থাকে। এনে প্রতিটো স্তৰতে থাকে বিপদ। তেনে বিপদৰ মুখামুখি হৈছিল কুমুদো। তেওঁ জনোৱা মতে গভীৰ সুৰংগত বৈদ্যুতিক বিজুতিৰ ফলত এক ভয়ংকৰ দুর্ঘটনাৰ পৰা কথমপি ৰক্ষা পৰিছিল তেওঁৰ লগতে আন কেইবাজনো শ্রমিক। এজন শ্রমিকৰ বুদ্ধিমত্তাৰ ফলত ৰক্ষা পৰিছিল শ্রমিক দলটোৰ জীৱন। 'সেই দুর্ঘটনাটোৰ কথা মনত পৰিলে আজিও মোৰ গা শিয়ৰি উঠে। ভাগ্যক্রমে আমাৰ জীৱন ৰক্ষা পৰিছিল। 

অন্যথা উমৰাংছ'ৰ শ্রমিকসকলৰ দৰেই আমাৰো লগত একেই ঘটনা ঘটিলহেঁতেন। মূলতঃ দৰিদ্ৰতাৰ বাবে শ্রমিকসকলে এনেকুৱা বিপজ্জনক জীৱিকাৰ পথ বাছি ল'বলৈ বাধ্য হয়।' কুমুদ দাসে এনেদৰে প্রকাশ কৰে। উল্লেখযোগ্য যে কয়লা খনিৰ শ্রমিক হিচাপে লাভ কৰা এনে ভয়ংকৰ অভিজ্ঞতাৰ বাবে এদিন সেই পথ ত্যাগ কৰিছিল কুমুদ দাসে। এতিয়া ক্ষুদ্র ব্যৱসায়েৰে স্বাৱলম্বী দাস। 

তদুপৰি তেওঁ এগৰাকী সুলেখকো। কয়লা খনিৰ অভিজ্ঞতাৰ ভিত্তিত তেওঁৰ দ্বাৰা লিখিত প্রবন্ধ আলোচনীতো প্রকাশ পাইছে।

Share This