বোকাজানত উপাধ্যক্ষৰ পুত্তলিকা দাহ কার্বি ছাত্ৰ সন্থাৰ

dainik janambhumi August 05, 2025

ডিজিটেল ডেস্ক : অসম বিধানসভাৰ উপাধ্যক্ষ তথা বোকাজান বিধানসভা সমষ্টিৰ বিধায়ক ডাঃ নোমন মমিনে এখন ৰাজহুৱা সভাত আওপকীয়াকৈ কার্বি আংলঙত ২৪৪ (এ) অনুচ্ছেদৰ প্রয়োজন নহ'ব বুলি বক্তব্য ৰখাৰ পাছতেই উত্তপ্ত হৈ পৰিছে কাৰ্বি আংলং জিলা। প্রসংগক্রমে তেওঁ উল্লেখ কৰি কয় যে অনুচ্ছেদ ২৪৪(এ)ৰ অধীনত জিলাখনে লাভ কৰিবলগীয়া সুবিধাতকৈ বর্তমান অধিক সুবিধা লাভ কৰিছে। এই কথা ডিফুৰ ৰাজহুৱা সভাত খোদ মুখ্যমন্ত্ৰীগৰাকীয়েও ঘোষণা কৰিছে। কাৰ্বি আংলং জিলাত ইতিমধ্যে আইন মহাবিদ্যালয়, চিকিৎসা মহাবিদ্যালয়, বি এড কলেজ, পশু চিকিৎসা মহাবিদ্যালয় আদি লাভ কৰিছে। স্বায়ত্ত শাসনৰ উপৰি নিজেই বাজেট প্ৰস্তুত কৰিব পৰা ক্ষমতা লাভ কৰিছে জিলাখনে। কংগ্ৰেছৰ দিনত উগ্রপন্থী তৈয়াৰ হোৱা জিলাখনত এতিয়া ডাক্তৰ তৈয়াৰ হৈছে। 

গতিকে আমি ২৪৪(এ) অনুচ্ছেদ বিচাৰি পিছুৱাই গৈ এই চুক্তিত লাগি থাকিলে আমাৰ ক্ষতিহে হ'ব। বিধায়ক মমিনৰ এই বক্তব্যৰ পাছতেই জিলাখনৰ ছাত্ৰ ৰাজনীতি উত্তপ্ত হৈ পৰা দেখা গৈছে। মমিনৰ এই প্ৰসংগৰ বিৰোধিতা কৰি সোমবাৰে কাৰ্বি ছাত্ৰ সন্থাই সৰিয়হজানত তেওঁৰ পুত্তলিকা দাহ কৰে। তেওঁলোকে নোমল মমিন গ' বেক, নোমল মমিন মুর্দাবাদ ধ্বনি দিয়ে। কাৰ্বি ছাত্ৰ সন্থাৰ নেতৃত্বই সাংবাদিকৰ আগত কয় যে ২৪৪(এ) অনুসৰি কাৰ্বি জাতিৰ যি দীর্ঘদিনীয়া স্বায়ত্তশাসিত ৰাজ্যৰ দাবী নোমন মমিনে তাক আওপকীয়াকৈ উলাই কৰি কাৰ্বি জাতিৰ বাবে অতি নিন্দনীয় কাম কৰিছে। ভাৰত স্বাধীনৰ ২২ বছৰৰ পাছত ১৯৬৯ চনতে তেতিয়াৰ কংগ্ৰেছ দলে ২৪৪ (এ) অনুচ্ছেদ উঠাই দিয়াৰ পৰৱৰ্তী সময়ত শিক্ষিত কার্বি সমাজে তেওঁলোকৰ প্ৰাপ্যৰ ন্যায্যতা বিচাৰি ১৯৮৬ চনৰ পৰা পুনৰ ২৪৪(এ) অনুচ্ছেদৰ দাবীৰে সোমবাৰে সুদীর্ঘ ৪০ বছৰে আন্দোলন কৰি আহিছে। এই আন্দোলনত সহস্রজনে আৰক্ষীৰ গুলী খাবলগীয়া হৈছে আৰু জে'ল যাবলগীয়া হৈছে। তথাপি থমকি ৰোৱা নাই আন্দোলন। 

ইমানৰ পাছতো এগৰাকী দায়িত্বশীল জনপ্রতিনিধিয়ে স্বায়ত্তশাসিত ৰাজ্যৰ বিপৰীতে কোৱাটো কাৰ্বি ছাত্ৰ সন্থাই তীব্র বিৰোধ কৰিছে। বিধায়কজন অ-কাৰ্বি হোৱাৰ বাবেই ২৪৪(এ) অনুচ্ছেদৰ বিৰোধ কৰা বুলি ছাত্র নেতাসকলে সাংবাদিকৰ আগত মত প্রকাশ কৰে। অনুচ্ছেদ ২৪৪(এ), স্বায়ত্তশাসিত ৰাজ্য তেওঁলোকৰ প্ৰাপ্য অধিকাৰ, গতিকে তেওঁলোকক এই অধিকাৰ লাগিবই বুলি দাবী কৰে। অচিৰেই স্বায়ত্তশাসিত ৰাজ্যৰ প্ৰসংগ লৈ বিজেপি চৰকাৰে কেন্দ্ৰীয় নেতৃত্বৰ সৈতে দিল্লীত এলানি আলোচনাতো মিলিত হ'ব বুলি তেওঁলোকে জানিবলৈ দিয়ে।

Share This