শ্বহীদ হ'ল কোকৰাঝাৰৰ পৰ্ণেশ্বৰ কোচ

dainik janambhumi July 17, 2025

ডিজিটেল ডেস্ক : ঝাৰখণ্ডৰ বোকাৰু জিলাৰ জাগেশ্বৰ বিহাৰ আৰক্ষী চকীৰ অন্তর্গত কাশীলুগু পার্বত্য অঞ্চলৰ কাশীতন বনাঞ্চলত আৰক্ষী আৰু নক্সালবাদীৰ মাজত হোৱা সংঘর্ষত কোব্রা বেটেলিয়নৰ জোৱান অসম সন্তান পৰ্ণেশ্বৰ কোচ শ্বহীদ হয়। এই সংঘর্ষত ২জন নক্সালবাদী নিহত হয়। সংঘৰ্ষত শ্বহীদ হোৱা অসমৰ কোকৰাঝাৰৰ পৰ্ণেশ্বৰ কোচ কেন্দ্ৰীয় সংৰক্ষিত আৰক্ষী বাহিনী (চি আৰ পি এফ)ৰ ২০৯ নম্বৰ কোৱা বেটেলিয়নৰ জোৱান আছিল। আৰক্ষীৰ সূত্রসমূহে কয় যে এই সংঘৰ্ষত সুৰক্ষা বাহিনীয়ে উপ-মাণ্ডলিক কমাণ্ডাৰ কুঁৱৰ মাঝি ওৰফে ছাহদেউ মাঝি ওৰফে ছাদেক গুলীয়াই নিহত কৰে। সংঘৰ্ষস্থলীৰ পৰা আৰক্ষীয়ে এটা এ কে-৪৭ ৰাইফল উদ্ধাৰ কৰে। 

উল্লেখযোগ্য যে সংঘর্ষত নিহত দুর্ধর্ষ নক্সাল কুঁৱৰ মাঝিৰ মূৰৰ ওপৰত ৫ লাখ টকাৰ পুৰস্কাৰ ঘোষণা কৰা হৈছিল। বুধবাৰে পুৱা জিলা আৰক্ষী, কোৱা বেটেলিয়ন আৰু চি আৰ পি এফৰ এটা যৌথ দলে অঞ্চলটোত অভিযানৰ নেতৃত্ব দিয়ে। অঞ্চলটোৰ ওচৰ-পাঁজৰৰ এলেকাসমূহতো তালাচী অভিযান তীব্ৰতৰ কৰি তোলা হৈছে। 

অসমৰ মুখ্যমন্ত্ৰী ড° হিমন্ত বিশ্ব শৰ্মাই কোকৰাঝাৰৰ সু-সন্তান, শ্বহীদ পৰ্ণেশ্বৰ কোচৰ বলিদানক শ্রদ্ধা জনাই তেওঁৰ বিদেহ আত্মাৰ চিৰশান্তিৰ বাবে প্ৰাৰ্থনা জনায় আৰু শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰে।

Share This