গোসাইগাঁৱত পুনৰ ডাইনীৰ সন্দেহত চাৰি সন্তানৰ মাতৃক নিৰ্মমভাৱে হত্যা

Kakali Deka March 17, 2025

ডিজিটেল ডেস্কঃ সমাজক লজ্জানত কৰা এক ঘটনা সংঘটিত হৈছে। গোসাইগাঁৱত পুনৰ ডাইনীৰ সন্দেহত ৪৫ বছৰীয়া তথা চাৰি সন্তানৰ মাতৃ এগৰাকীক নিৰ্মমভাৱে হত্যা। গোসাইগাঁও মহকুমাৰ কচুগাঁও থানাৰ অন্তৰ্গত জলেশ্বৰী আদিবাসী গাঁৱত শনিবাৰে নিশা ডাইনীৰ সন্দেহত ভৰত মুৰ্মু নামৰ এজন লোকৰ পত্নীক হত্যা কৰা হয়। হত্যাৰ বলি হোৱা মহিলাগৰাকীৰ নাম দুলাৰ হাসদা (৪৫)। দুলাৰক বাঁহৰ লাঠীৰে মূৰত উপৰ্যুপৰি কোবাই কোবাই নিৰ্মমভাৱে হত্যা কৰে পাশৱিক মনৰ লোকে। 

হত্যাৰ পাছত গাঁওখনৰে এখন বাঁহনিত মৃতদেহটো পেলাই দিয়ে। দেওবাৰে পুৱা হত্যাকাণ্ডৰ বিষয়ে অৱগত হৈ পৰিয়াল তথা স্থানীয় ৰাইজে আৰক্ষীক অৱগত কৰে। আৰক্ষীয়ে ঘটনাস্থলীত উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে কোকৰাঝাৰলৈ প্ৰেৰণ কৰে। 

স্থানীয় ৰাইজৰ ভাষ্য তথা গাঁওখনৰ সামাজিক গাঁওবুঢ়া সুশীল হেমব্ৰমে কোৱা মতে মহিলাগৰাকীক গাঁৱৰে কোনোবাই ডাইনীৰ সন্দেহত হত্যা কৰিছে। পৰিয়ালৰ লোকেও ডাইনীৰ সন্দেহত হত্যা কৰা হৈছে বুলি গাঁওবুঢ়াক অৱগত কৰে। উক্ত ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে।

আনহাতে আৰক্ষীৰ মতে এয়া কোনো ডাইনী-কাণ্ড নহয় এয়া হত্যাকাণ্ডহে। আৰক্ষীয়ে বিষয়টোৰ সন্দৰ্ভত তদন্ত অব্যাহত ৰাখিছে৷ 

 

উৎস প্ৰাগ নিউজ ডিজিটেল

 

Share This